Wãn-to la b “makd ned n ges a sã n zemsame”?
1 Nebã sõor sẽn tar fɩɩgr a Zeova siglgã pʋgẽ wã yĩngã, wakat fãa b rata saam-biis sẽn pidsd yɛl nins b sẽn baoodã tɩ b sõgen wala ministɛɛr sõgen dãmba. Saam-biis wʋsg sẽn yɩɩd b sẽn nan ka yãk tɩ b sõgen woto, tʋllame n sõgen tigingã pʋgẽ, kom-bɩɩsã sẽn paase. B sã n kõ-b tʋʋmd n paas tɩ b maane, b neeme tɩ b tara yõodo, la b miẽ tɩ b tʋma tʋʋmd sẽn tar yõodo. Bãmb taoor kẽngr a taabã bee ne b sẽn na n ‘mak-b n ges b sã n zemsame’ wã. (1 Tɩm. 3:10, NW ) Wãn to la b maand rẽ?
2 Kẽem dãmbã tʋʋmde: Kẽem dãmbã makda saam-biig n ges a sã n pidsa yɛl nins b sẽn baood ministɛɛr sõgen dãmbã yĩngã sẽn be Biiblã pʋgẽ 1 Tɩmote 3:8-13 pʋgẽ wã. Mak saam-biigã n ges a sã n zemsa ne zɩɩb tʋkrã segd n zĩnda rẽ sʋka. B tõe n yãk-a lame t’a maan tʋʋm sẽn tõe n sõng sẽn tɩ loe ne periodik rãmbã la sɛbã, mikoro wã zãabo, Rĩungã Roog yell gesgo, la yɛl a taaba. Kẽem dãmbã na n gesa manesem ning a sẽn tar ne tʋʋmã b sẽn kõt-a wã la a sẽn maand-b to-to. B na n gesa a sã n yaa ned b sẽn tõe n teege, sẽn wat lɛɛre, sẽn tʋmd neere, sẽn tar sik-m-menga, sẽn yaa sakda, sẽn tõe n tʋm ne neb a taabã zems-n-taar pʋgẽ. (Fil. 2:20) A kõta mak-sõng a futã la a mengã manegr pʋgẽ bɩ? A mii zɩɩb tʋkr bɩ? B ratame n yã “a tʋʋma ne a yel-manesem sõama ne sũ-bʋgsem yam sẽn wat ne” wã. (Zak 3:13) A sɩd baoodame n na n sõng tigingã bɩ? A tũuda a Zezi noor ning sẽn yeel tɩ b ‘maan neb tɩ b yɩ karen-biisã’ n kẽesd a meng ne yẽesem koe-moonegã tʋʋmd pʋgẽ bɩ?—Mat. 28:19; Ges-y yʋʋmd 1990, bõn-bɩʋʋng kiuug 1 daar Gũusg Gasgã (farende), seb-nens 18-28.
3 Baa ne Biiblã sẽn ka yãk yʋʋmd n yeel tɩ ned sã n ka ta rẽ b ka tõe n yãk-a t’a lebg ministɛɛr sõgenã, a gomda saam-biis a woto yell n yetẽ tɩ b yaa “roap sẽn sõgenda.” Yɩta toog tɩ d gũ tɩ roap a woto bee b bi-bɩɩlem sɩngrẽ bɩ a pʋɩ-sʋka, sẽn yɩɩd fãa b sẽn yeel tɩ b tõeeme n tar pag la kambã. (1 Tɩm. 3:12, 13, NW ) Roap a woto ka segd n sakd ‘yãadem datem wẽng’ ye, la b segdame n zãad b mens sõma, n kõt mak-sõng la b tar sũur kaset sẽn yaa yɩlemd Wẽnnaam ne ninsaalb taoore.—2 Tɩm. 2:22.
4 Baa ne sẽn tar yõod tɩ ned tall tõodã, sẽn pak n yɩɩdã yaa manesem la yam ning a soabã sẽn tarã. Saam-biig n dat ne sik-m-meng n pẽg Wẽnnaam la a sõng a saam-biisã bɩ? Sã n yaa woto, a Zeova na n barka modgr ning a sẽn maand sẽn na yɩl n kẽng taoor tigingã pʋgẽ wã.