D sõng zoensã tɩ b bãng a Zeova

1. Wãn to la a Zezi wilg t’a kʋmda zoensã?

¹ A Zezi kũumã sẽn wa n ket rasem a wãna, a yii Zeriko soolmẽ wã n loogdẽ, tɩ zoens a yiib sẽn yaa bõos-rãmb zẽk b koees n kos-a woto: “Zu-soaba . . . zoe-y tõnd nimbãanega.” Baa a Zezi sẽn da tagsd toog ning a sẽn na n paamã yell tɩ namsd-a wã, a yalsame n bool rapã, n puk b ninã. (Mat. 20:29-34) Wãn to la d tõe n dɩk a Zezi togs-n-taar n kʋm zoensã nimbãanega?

2. D sã n seg zoang zãma sʋka, wãn to la d tõe n taas-a koɛɛgã?

² Bao-y n sõng-ba: Y sã n seg zoanga, baa yaa zãma sʋka, bɩ y pʋʋs-a, n wilg-a y sẽn yaa ned ninga, la y bao n sõng-a. Neb kẽer mi n wẽgda zoensã. Rẽ kɩtame tɩ zoang sã n pa mi ned t’a soab kolg n na n gom ne-a, rabeem tõe n tar-a lame. La y sã n modg t’a bãng t’a yell pak-y lame, la tɩ y rat n sõng-a lame, tõe n gãnega a yam. Y sã n tẽegdẽ me tɩ zoensã pa taaba, y bãngda y sẽn na n sõng-b to-to. Y sã n sõng zoang n sa, y tõe n wilg-a lame tɩ y zãmsda nebã Biiblã. Rẽ poore, y tõe n kos-a-la sor n karem vɛrse-rãmba, wala makre, Yɩɩl Sõamyã 146:8 bɩ Ezai 35:5, 6. A sã n tõe n karma zoensã sɛba, bɩ y sok-a n ges a sã n datame tɩ y wa kõ-a sɛb sẽn na n sõng-a t’a bãng Biiblã n paase. Y leb n tõe n sõng-a lame t’a paam bũmb kẽer tõnd sɩtã pʋgẽ n kelge. A sã n tara ordinatɛɛr sẽn tõe n karem bũmb ne Format de texte enrichi (RTF), bɩ y telesarz sɛb tõnd sɩtã pʋgẽ n kõ-a.—Ges-y zĩ-gũbr ning gom-zug sẽn yaa: “Y sã n wa sõngd zoanga . . . ”

3. Wãn to la d tõe n bao zoensã d koe-moonegã zĩigẽ?

³ Bao-y zoensã: Zak-zak koe-moonegã sasa, d pa wae n segd zoens ye. Bala, b wʋsg pa nong n sõsd ne sãan sẽn wa b zakẽ ye. Woto kɩtame tɩ yɩl n paam nin-kãensã n taas-b koɛɛgã, rẽnda f mao. (Mat. 10:11) Yãmb tara tʋmd-n-taag wall karen-bi-taag sẽn yaa zoang bɩ? Bao-y n sõs-y ne-a. Zoens lekoll sã n bee yãmb moonegã zĩigẽ, bɩ y kos lekollã rãmb sore, n kõ lekollã tõnd sɛb kẽer b sẽn yiisd zoensã yĩnga. Yãmb mii ned roagd sẽn yaa zoang bɩ? Siglg sẽn get zoens yell bee yãmb koe-moonegã zĩigẽ bɩ? Sã n yaa rẽ bɩ y togs zoangã roagdã, pa rẽ bɩ siglgã sãamb rɛɛgdã, wall a taoor soabã t’a Zeova Kaset rãmbã sõngda zoensã, la tɩ y rat n kõ-b-la zoensã sɛba, la bũmb toor-toor b sẽn tõe n kelge. Rẽ poore, bɩ y karem vɛrse sẽn wilgd tɩ Wẽnnaam pʋlmame tɩ ka la bilfu, a na n menesa zondã wakat fãa yĩnga. Y leb n tõe n wilga tõnd sɩtã video ning gom-zug sẽn yaa: “Sans elle, je serais perdu” wã. A gomda zoensã Biiblã sẽn naf zoang yelle. B sã n bãng y waoongã võore, tõe tɩ b sak n kõ-y sor tɩ y sõs ne zoensã.

4. Bõe la a Janet kibarã wilgda?

⁴ Saam-bi-poak sẽn yaa zoang t’a yʋʋr la a Janet ra kẽnd n kaagda zoense. A Janet wa n sɩnga sõsg ne pʋg-bɩɩg a yembre, n yeel-a woto: “A Zezi sãooga zoense, n wilg bũmb ning a sẽn na n wa maan zoensã fãa yĩngã.” Rẽ poore, b sõsa Wilgr 21:3, 4 sẽn yetã zugu, t’a Janet bilg-a Wẽnnaam Rĩungã sẽn na n pids vɛrse-kãensã goamã to-to. Pagã maaga a yĩng n kelg a Janet neere, n yaool n leok woto: “Mam da nan zɩ n wʋm zoang sẽn gomd gom-kãensã ye. Neb wʋsg tagsdame tɩ yaa bũmb zoang sẽn maane, pa rẽ bɩ a yaab-rãmb sẽn maan yĩng n kɩt t’a yaa zoangã.” A Janet tũnuga ne ẽntɛrnetã n tool-a adɛrs a sẽn tõe n kilik n paam Biiblã yetame sebrã tõnd sɩtã zugu. Rũndã-rũndã, b zãmsda Biiblã ne taab naoor a yiib semen fãa.

5. Baa tõnd sẽn pa tõe n puk zoang nin wa a Zezi wã, d sã n kʋmd zoensã, nafa bʋs la d na n paame?

⁵ Yaa sɩd tɩ tõnd pa tõe n puk zoang nin wa a Zezi ye. La d tõe n sõnga neb nins fãa dũni-kãngã wẽnnaamã sẽn lud b yamã, hal baa zoens meng-mengã, tɩ b bãng sɩdã. (2 Kor. 4:4) A Zezi sãooga zoens a yiibã sẽn da be Zeriko noorã, bala, b “nimbãaneg” yõk-a lame. (Mat. 20:34) Tõnd me sã n zoeta zoensã nimbãanega, d na n tõog n sõnga b kẽer tɩ b bãng a Zeova, a soab ning sẽn na n wa kɩt tɩ zond buudã fãa menem wakat fãa yĩngã.