D rɩk yam koe-moondb nins sẽn tar minim wʋsgã nengẽ
D sẽn paam tɩ koe-moondb sẽn tar minim wʋsg be d tigimsẽ wã nafd-d lame. B kẽer sɩng n tũuda a Zeova hal sẽn kaoose. La tõe tɩ b sãnda paama zãmsg sõma koe-moonegã wɛɛngẽ sẽn nan pa kaoose. B sẽn moond koɛɛgã wʋsg la b sõngd neb tɩ b lebgd a Zezi karen-biisã, kɩtame tɩ b ne a Zezi sẽn sõngd tũudum hakɩɩkã to-to yaoolem da-kãensã sasa wã. (Mat. 28:19, 20) B sẽn moond koɛɛgã kɩtame tɩ b paamd ‘pãn-kãsenga,’ n maood ne b zu-loeesã. (2 Kor. 4:7) Dẽnd bũmb wʋsg la nin-kãensã sẽn tar minimã tõe n zãms-do. B sã n paam sore, b sõngda b taabã ne yamleoog tɩ b rɩt b minimã yõodo. (Yɩɩl 71:18) Woto wã, bɩ d mao n pẽneg-ba, n bãng bũmb wʋsgo. La wãn to la d tõe n maan dẽ?
Koe-moonegã sasa. Yɩl tɩ sẽn nan sɩng-b koɛɛgã mooneg paalmã, la sẽn pa tar-b minim wʋsgã koe-moonegã wom biisi, b segd n paama zãmsgo. B sã n get koe-moondb nins sẽn tar minim wʋsgã sẽn moond koɛɛgã to-to wã, na n sõng-b-la sõma. (Ges-y yʋʋmd 2015 wao-fugdg kiuug rasem 15 Gũusg Gasgã sõsg ning gom-zug sẽn yaa “ Garde ton zèle pour le ministère. ” Y na n yãa gom-zu-bil sẽn gʋls tɩ “ Aide les moins expérimentés. ” Karm-y sull a tãab-n-soabã.) Yãmb zoe n moona koɛɛgã ne koe-moond sẽn tar minim wʋsg tɩ naf-y bɩ?
Kos-y koe-moond sẽn tar minim t’a wa naag-y n moon koɛɛgã. La sã n yaa koamsa, y tõe n mi n talla y Biibl karen-biig n kẽng a yirã tɩ y zãms Biiblã. Zãmsgã poor bɩ y sok-a a tagsgo, la y kos-a saglse.
Bao-y sẽk n sõs ne-ba: Y sã n wae n sõsd ne sẽn tar-b minim wʋsgã, y na n bãng-b-la sõma. Kos-y b nin-yɛng t’a wa naag yãmb n maan y zak pʋgẽ Biibl zãmsgã, tɩ y sok-a sogsgo. A sã n yaa koamsa, bɩ y kẽng a yir n tɩ maan zãmsgã. Sok-y-yã-a sẽn sɩng to-to t’a bãng sɩdã. Bark bʋg la a paam-yã? A yãa tẽngã koe-moondbã sõor sẽn fɩɩg to-to bɩ? Sũ-no-bʋg la a paamda, a sẽn tũud a Zeova wã?
Yɩ-y wʋmdba, la y tẽeg tɩ bãmb me tara kogse. Koe-moondb nins sẽn kaoos tʋʋmdã pʋgẽ wã yaa wa tõndo. Bãmb ned kam fãa tara minim koe-moonegã nens takɩ pʋsẽ. (Rom 12:6-8) Sãnda yʋʋm tõe n vẽsgame, tɩ b pa tõe n maan bũmb kẽer koe-moonegã pʋgẽ wall zĩis a taab ye. Baasgo, d tõe n dɩka yam b nengẽ, bala, b tũuda a Zeova ne b sũy fãa n tar minim wʋsgo.