D sẽn tõe n bɩɩs Wẽnnaam nonglem la d taabã nonglem to-to

Baa a Moyiiz tõogã tũub sẽn pa tɩlɛ ne kiris-nebã, a no-kãsems a yiibã sẽn yaa nong Wẽnnaam la f nong f to wã kʋmsda a Zeova sẽn dat tɩ d maanã. (Mat. 22:37-39) Nonglem-kãng pa rogd ne ye, d segd n bɩɩs-a lame. Wãn to? Bũmb a ye sẽn na n sõng-d yaa d sẽn na n karemd Biiblã daar fãa. Biiblã wilgda a Zeova sẽn yaa Wẽnnaam ningã tɩ d sã n tagsd rẽ yell bɩ d yãt a neermã. (Yɩɩn. 27:4) D sã n maand woto, d na n maneg n nong-a lame, tɩ d tagsa wã ta a yam. Rẽ, d na n nonga d taabã wa Wẽnnaam sẽn datã, la d tũud a noy a taabã me. (Zã 13:34, 35; 1 Zã 5:3) Ad sagls a tãab sẽn tõe n sõng tɩ d Biiblã kareng maneg n yɩ-d noogo:

• Bʋgs la f mams yɛlã sẽn yɩ to-to f yamẽ. Mams wa f zĩnda be. Bõe la f ne? Bõe la f n wʋmda? Kibarã sẽn gomd neb nins yellã manesem yaa wãn-wãna?

  

• Toeem f sẽn karemd to-to wã. Ad sagls a wãna: Zẽk f koɛɛg n karme, wall f lak f Biiblã n tũ karengã b sẽn dɩk ne aparɛy. F tõeeme me n yãk ned kibar wall gom-zug takɩ n karme, la f ra karem sagsã pʋgdg-pʋgdg ye. Wala makre, f tõe n gesa Guide d’étude de la Parole de Dieu babg a 4 ne 16 n karem a Zeezi kibarã. F leb n tõe n karma daar vɛrse wã sẽn yit sak ningã tõre. F tõe n gesa Biiblã sebr fãa sẽn gʋls wakat ningã n karm-b pʋgdg-pʋgdga.

  

• Mao-y n wʋm-y y sẽn karemdã võore. Daar fãa, baa yaa Biiblã sak a 1 la f karemda, n bao n wʋm a võor la f bʋgse, sãoã f sẽn na n karem sags wʋsg bala. F sã n wa karemd kibar bɩ f mams sẽn yɩ zĩig ninga, la kibarã sẽn gomd neb nins yelle. Bao n bãng baa yel-bõonegã. Ges kart-rãmbã, la referãens-rãmbã sẽn be kɩrengã. Yãk bũmb takɩ n bao n wʋm a võor sõma. Sã n tõeyã, bɩ f mao tɩ karengã la bʋgsgã sẽn na n dɩk sẽk ningã ta taaba.