Y SẼN TÕE N MAAN N DA LE KISG Y TAABÃ

4 | Wẽnnaam tõe n sõng-y lame tɩ y bas neba kisgri

Biiblã sẽn yete:

Vʋʋsem sõngã biis yaa nonglem, sũ-noogo, laafɩ, sũ-mare, maan-neere, sõmblem, tẽebo, sũ-bʋgsem, la yõk-m-menga.”—GALAT-RÃMBÃ 5:22, 23.

Rẽ sẽn dat n yɛɛlga:

Ne Wẽnnaam sõngre, d na n tõogame n da le kisg ned ye. A vʋʋsem sõngã tõe n sõng-d lame tɩ d bɩɩs zʋg-sõma d sẽn pa tõe n bɩɩs d toore. Yɩta sõma tɩ d teeg Wẽnnaam la d ra bao ne d meng pãng n na n kɩt tɩ kisgrã sa ye. D sã n teeg Wẽnnaam, d na n paamame t’a sõng-d wa tẽn-tʋmd a Polle. Ad a Poll sẽn yeele: “Bũmb fãa pʋgẽ, mam tara pãnga, sẽn kõt-a maam pãngã maasem yĩnga.” (Filip rãmbã 4:13) Tõnd me tõe n yeelame yaa: “Mam sõngr yita Sẽn-Ka-Saab nengẽ.”—Yɩɩn-sõamyã 121:2.

Y sẽn tõe n maane:

“A Zeova sõnga maam tɩ m toeem fasɩ. M da yaa nen-kɛglem soaba, la m lebga ned sẽn baood laafɩ.”—A VALDO

Pelg-y y pʋg n pʋʋs a Zeova n kos-a a vʋʋsem sõngã. (Luk 11:13) Kos-y-yã-a t’a sõng-y tɩ y bɩɩs zʋg-sõma y vɩɩmã pʋgẽ. Zãms-y Biiblã n bãng zʋg-sõma nins sẽn tõe n sõng-y tɩ y ra le kis nebã. Wala makre, nonglem, laafɩ, maag-m-menga, la yõk-m-menga. Baood-y y sẽn tõe n maan n bɩɩs zʋg-sõma kãensã y vɩɩmã pʋgẽ. Yõg-y zood ne neb sẽn modgd n bɩɩsd zʋg-sõma kãensã. B tõe n sõng-y lame ‘tɩ y bɩɩs nonglem la y tʋm tʋʋm-sõma.’—Ebre-rãmbã 10:24.

Ned vɩɩm kibare—A VALDO

A tõoga beem meng-menga

Rao a ye yʋʋr sẽn boond t’a Valdo sẽn paam wubr ningã kɩtame t’a ra kis neba. Ad a sẽn yeele: “Mam da nong n naagda bi-bees sull n zabd ne dorg koaasdba . . . Daar a ye, bi-bees sull n tɩ yao rao sẽn yaa nin-kʋʋd ligdi, n yeel-a t’a wa kʋ maam. A kõs-m-la ne sʋʋga, la baa ne rẽ, m tõog n zoe n põsame.”

A Valdo sũurã pa yɩ noogo, a pagã sẽn wa n sɩng Biiblã zãmsg ne a Zeova Kaset rãmbã ye. Ad a sẽn yeele: “M da kisa a Zeova Kaset rãmbã, hal n da nong n tʋʋd-ba. La wakat fãa, b ra leokd-m-la noog-noogo.”

Rẽ poor bilfu, a Valdo me wa n sɩnga Biiblã zãmsgo. A yeelame: “Bũmb ning m sẽn da zãmsdã tũub ra yaa toog ne-ma. M da kɩsa sɩd tɩ m pa tol n tõe n bas sũ-yikrã la tʋʋm-wẽnsã ye.” La bũmb la a bãng Biiblã pʋgẽ tɩ sõng-a wʋsgo.

A Valdo yeelame: “Daar a ye, a Alɛgzãndro, sẽn da zãmsd-a maam Biiblã kos-m lame tɩ m karem Galat-rãmb 5:22, 23. . . . A Alɛgzãndro sõnga maam tɩ m bãng tɩ pa ne m meng pãng la m na n tõog n bɩɩs zʋg-sõma nins yell b sẽn gom vɛrse wã pʋgẽ wã ye. Yaa Wẽnnaam vʋʋsem sõngã n tõe n sõng-ma. M sẽn bãng woto wã kɩtame tɩ m toeem m tagsa wã.”

A Valdo sẽn bas tɩ Wẽnnaam sõng-a wã, a tõog n basa nebã kisgri. A yeelame: “Mam zakã rãmb ne m pĩnd zo-rãmbã ra pa tẽed tɩ m tõe n wa toeema woto ye. A Zeova sõnga maam tɩ m toeem fasɩ. M da yaa nen-kɛglem soaba, la m lebga ned sẽn baood laafɩ.”