‘A Zeova na n kõ-y-la pãnga’: Wãn to?

1. Yɛ la pĩnd wẽndẽ wẽn-sakdbã ra paamd pãnga?

WẼNNAAM GOMDÃ wae n yetame tɩ neb nins sẽn maand sɩdã yaa neb sẽn tar daoodo. La pa wakat fãa la b ra tagsd tɩ b tara raood ye. Wala makre, wakat n zĩnd tɩ rĩm a Davɩɩd ra getẽ t’a “tara pãng wa tãnga,” la wakat ninga “rabeem-kãseng” yõkd-a lame. (Yɩɩn. 30:7) Baa ne Wẽnnaam vʋʋsem sõngã sẽn da kɩt t’a Sãmsõ tar pãng wʋsgã, a ra miime tɩ pãng ning sẽn yit Wẽnnaam nengẽ wã sã n da pa be ne-a, ‘a pãngã na n loog m bas-a lame t’a lebg wa neb a taabã.’ (Bʋ. 14:5, 6; 16:17) Nin-kãensã sẽn da maand sɩdã ra tara pãnga, a Zeova sẽn da kõt-b pãngã yĩnga.

2. Bõe yĩng tɩ tẽn-tʋmd a Poll yeel t’a ra pa tar pãnga, la t’a tara pãnga? (2 Korẽnt rãmbã 12:9, 10)

² Tẽn-tʋmd a Poll me sak n deegame tɩ ra yaa tɩlɛ t’a paam pãng ning sẽn yit a Zeova nengẽ wã. (Karm-y 2 Korẽnt rãmb 12:9, 10.) A Poll maoo ne bãas wa tõnd sʋkã neb wʋsgo. (Gal. 4:13, 14) Wakat kẽere, yɩl n maan sẽn yaa tɩrg pa yɩ nana ne-a ye. (Rom. 7:18, 19) Wakat n zĩnd me t’a ra maand yɩɩre, n pa mi bũmb ning sẽn na n paam-a ye. (2 Kor. 1:8, 9) La yaa a Poll sẽn wat n ka pãng sasa, la a tar pãng wʋsgo. Wãn to? A Zeova ra kõta a Poll pãng t’a tõogd n maood ne a zu-loeesã.

3. Sogs-bʋs la d na n leok sõs-kãngã pʋgẽ?

³ A Zeova pʋlmame t’a na n kõo tõnd me pãnga. (1 Pɩy. 5:10) La tõnd mengã segd n modgame n yaool n paam t’a kõ-d pãn-kãnga. D rɩk makre. Yaa mobill montɛɛr n kɩtd t’a kẽnda. La yaa tɩlɛ tɩ sofɛɛr ning vɩtɛɛse, tɩ mobillã yaool n tõog n kẽne. Woto me, a Zeova rat n kõ-d-la pãnga, la yaa tɩlɛ tɩ tõnd me maan bũmb kẽer n yaool n paam pãngã. Bõe la a Zeova maand n kõt tõnd pãnga? Bõe la d segd n maane, n tõog n paam pãn-kãnga? Sẽn na yɩl n paam sogs-kãensã leoore, d na n goma a Zeova sẽn sõng neb a tãab to-to yelle. Yaa no-rɛɛs a Zonase, a Zeezi ma a Maari la tẽn-tʋmd a Polle. D leb n na n yãa a Zeova sẽn sõngd a nin-buiidã to-to rũndã-rũndã.

PƲƲSGÃ LA BIIBLÃ ZÃMSGÃ TÕE N SÕNG-Y LAME TƖ Y TÕOG TOOGO

4. Bõe la d tõe n maan n paam t’a Zeova kõ-d raoodo?

⁴ Bũmb a ye d sẽn tõe n maan n paam t’a Zeova kõ-d pãnga, yaa d sẽn na n pʋʋsd-a. A Zeova tõe n leoka d pʋʋsgã, n kõ-d “pãng ning sẽn yɩɩd ninsaal rẽndã.” (2 Kor. 4:7) D leb n tõe n paama pãnga, d sã n karemd a Gomdã la d bʋgsdẽ. (Yɩɩn. 86:11) Koɛɛg ning a Zeova sẽn taas tõnd tɩ be Biiblã pʋgẽ wã “tara pãnga.” (Ebre. 4:12) Y sã n pʋʋsd a Zeova la y karemd a Gomdã y na n paama raood n tõog toogo, n kell n tall sũ-noogo, wall y tõog n tʋm tʋʋmd sẽn pa nana. D ges a Zeova sẽn kõ no-rɛɛs a Zonas raood to-to.

5. Bõe yĩng tɩ no-rɛɛs a Zonas ra rat raoodo?

⁵ No-rɛɛs a Zonas ra rata raoodo. A ra yɛɛsdame n pa rat n kẽng zĩig ning a Zeova sẽn tʋm-a wã ye. Rẽ n so t’a kẽ koom-koglg n na n kẽng zĩig a to. Rẽ kɩtame tɩ yẽ ne neb nins sẽn da be koom-koglgã pʋgẽ ne-a wã naan n ki sob-kãseng yĩnga. Koom-koglgã pʋgẽ tʋm-tʋmdbã sẽn lob a Zonas koomẽ wã, zĩm-bedr n vel-a, t’a be zĩig sẽn kẽesd rabeem pʋgẽ. Sã n yaa ne yãmba, a Zonas tagsg yɩɩ wãna? A ra tagsdame t’a na n kii be bɩ? A tagsame t’a Zeova raag-a lame n bas bɩ? A Zonas tog n da maanda yɩɩr wʋsgo.

6. Sã n yaa ne Zonas 2:1, 2, 7, bõe n kõ a Zonas raood a sẽn wa n be zĩnfã pʋgẽ wã?

⁶ Bõe la a Zonas maan n paam daoodo, a sẽn wa n yaa a yembr zĩnfã pʋgẽ wã? A pʋʋsa a Zeova. (Karm-y Zonas 2:1, 2, 7.) Baa a Zonas sẽn kɩɩs a Zeova wã, a teka yam n kos sugri, n kɩs sɩd t’a Zeova na n kelga a pʋʋsgã. A Zonas bʋgsa Gʋls-sõamyã zug me. Bõe n kɩt tɩ d tõe n yeel woto? A Zonas pʋʋsgã sẽn be Zonas sak a 2 pʋgẽ, a lebs n togsa goam wʋsg sẽn be Yɩɩn-sõamyã pʋgẽ. (Wala makre, ges-y Zonas 2:2, 5 ne Yɩɩn-sõamyã 69:1; 86:7.) Yaa vẽeneg t’a Zonas ra mii vɛrse-kãensã sõma. A sẽn bʋgs b zug a toogã pʋgẽ wã kɩtame t’a bas a yam t’a Zeova na n sõng-a lame. Zĩnfã wa n tɩ wʋka a Zonas tẽn-koɛɛngẽ wã. Rẽ poore, a sakame n na n tʋm tʋʋmd ning a Zeova sẽn kõ-a wã.—Zon. 2:10–3:4.

7-8. Bõe la Tayiwan saam-biig a ye maan n paam daood a zu-loees wakate?

⁷ D sã n wa segd zu-loeese, a Zonas kibarã tõe n sõng-d lame. Wala makre, saam-biig a Zimingb sẽn be Tayiwannã bẽeda bã-kɛgenga. Sẽn paase, a zakã rãmb ra namsd-a-la wʋsg a tũudmã yĩnga. Ne pʋʋsgã la Biiblã zãmsg maasem, a paamame t’a Zeova kõ-a raoodo. A yeelame: “Wakat ninga m zu-loeesã sã n mi n yaa wʋsgo, m maanda yɩɩr hal tɩ Biiblã zãmsg pa nana ne-m ye.” La a pa komsd raood n bas ye. A paasame: “M dengd n pʋʋsa a Zeova. Rẽ poore m ningda m ekutɛɛr-dãmba, n kelg Rĩungã yɩɩlã. Wakat ninga m zẽkda m koɛɛg n yɩɩl yɩɩn-kãens hal tɩ m yamã wa gãande, tɩ m yaool n sɩng zãmsgo.”

⁸ Biiblã zãmsg kõo a Ziming raood hal tɩ ling-a. Wala makre, b sẽn wa n maan-a wopeere sẽn pa yɩ nana poore, logtor n yeel-a t’a zɩɩmã booga wʋsg tɩ yaa tɩlɛ tɩ b ning-a zɩɩm. Yʋng ning sẽn deng a Ziming wopeere wã, a karma saam-bi-poak a ye sẽn maan wopeere-kãng buud kibare. Saam-bi-pog-kãng zɩɩmã ra boog n yɩɩda yẽ, la baa ne rẽ a pa sak tɩ b ning-a zɩɩm ye. La a wa n paama laafɩ. Kiba-kãng sõnga a Ziming t’a kell n maan sɩd ne Wẽnnaam.

9. Zu-loɛɛg sã n kɩt tɩ y maand yɩɩr wʋsgo, bõe la y tõe n maane? (Ges-y fotã me.)

⁹ Zu-loees sasa, yãmb mi n maanda yɩɩr wʋsg hal n pa mi y sẽn na n pʋʋs a Zeova n yeel bũmb ning bɩ? Wall y mi n komsa raood hal n pa tõe n zãms Biiblã bɩ? Tẽeg-y t’a Zeova wʋmda y yɛlã võor sõma. Rẽnd baa y sã n pʋʋs n pa kos bũmb wʋsgo, y tõe n basa y yam t’a na n kõ-y-la bũmb ning sẽn yaa tɩlɛ ne-yã. (Efɛɛ. 3:20) Bãaga, yaams wall sũ-sãams sã n kɩt tɩ kareng la zãmsg yaa toog ne-yã, y tõe n kelga Biiblã wall siglgã sɛbã b sẽn karem tɩ b rɩkã. Y tõe n kelga d yɩɩll wall y ges video sẽn be jw.org pʋgẽ tɩ sõng-y me. Sẽn na yɩl t’a Zeova kõ-y raoodo y segd n pʋʋsd-a lame, la y baood y pʋʋsgã leoor Biiblã pʋgẽ la bũmb nins a Zeova siglgã sẽn yiisdã pʋgẽ.

Y TẼED-N-TAASÃ TÕE N KENGA Y RAOODO

10. Wãn to la d tẽed-n-taasã kengd d raoodo?

¹⁰ A Zeova tõe n tũnuga ne d tẽed-n-taasã n keng d raoodo. B tõe n ‘belsa tõnd wʋsgo,’ d sã n wa maood ne zu-loɛɛga, wall d sã n wa segd n tʋm tʋʋmd sẽn pa nana. (Kolo. 4:10, 11) Yaa “yel-pakr wakat” la d rat zo-rãmb sõngr n yɩɩda. (Yel. 17:17) D sã n wa koms raoodo d tẽed-n-taasã tõe n sõng-d-la sõng-vẽenega, n bels-d la b keng d raood tɩ d kell n tũ a Zeova ne d sũur fãa. D ges a Zeezi ma a Maari sẽn paam tɩ b keng a raood to-to.

11. Bõe yĩng t’a Maari ra rat raood kengre?

¹¹ A Maari ra rata raood kengre. Tags-y n ges-y-yã a Maari sẽn da maand yɩɩr to-to, malɛk a Gabriyɛll sẽn wa n kõ-a tʋʋm-kãsengã. A ra nan pa kẽ kãadem, n yaool n segd n dɩk pʋga. A ra zɩ n wub biiga, n yaool n segd n ges biig ning sẽn da na n wa lebg Mesi wã yelle. Sẽn mik t’a ra nan pa kẽ ne raoã, a ra na n maana wãn n wilg a Zozɛf a sẽn tar pʋgã võore?—Luk 1:26-33.

12. Sã n yaa ne Luk 1:39-45 wã, bõe la a Maari maan n paam tɩ b keng a raoodo?

¹² A Maari maana wãn n paam raood n tõog n tʋm tʋʋm-kãngã sẽn da pa nana wã? A kosa sõngre. Wala makre, a kosa a Gabriyɛll t’a kõ-a vẽenem n paas tʋʋmdã wɛɛngẽ. (Luk 1:34) Rẽ poor bilfu, a yikame n tog so-wok n kẽng Zida tẽng a ye “sẽn be tãensã sʋka,” n na n tɩ ges a roagd a Elizabɛte. A so-toakã naf-a lame. A Elizabɛt pẽga a Maari. Sẽn paase, a Zeova vẽneg-a lame t’a togs bãngr-gomd sẽn kengd raood biig ning a Maari sẽn na n dogã wɛɛngẽ. (Karm-y Luk 1:39-45.) A Maari yeelame t’a Zeova “kangã tʋma pãng tʋʋma.” (Luk 1:46-51) A Zeova tũnuga ne a Gabriyɛll la a Elizabɛt n keng a Maari raoodo.

13. Bolivi saam-bi-poak a ye sẽn kos a tẽed-n-taasã sõngrã, wãn to la rẽ naf-a?

¹³ Yãmb me tõe n paamame tɩ y tẽed-n-taas keng y raood wa a Maari. A Diyan sẽn yaa saam-bi-poak n be Bolivi wã ra rata raood kengre. A ba wã wa n lʋɩɩ bã-kɛgeng sẽn pa tar tɩɩm tɩ b gãneg-a logtor yiri. A Diyan yãka yam n na n zĩnd ne-a n ges a yell wa a sẽn tõe tɛka. (1 Tɩm. 5:4) Pa yɩ nana ne-a ye. A yeelame: “Naoor wʋsgo m tagsame tɩ m pa na n tõog n kell n ges a yell ye.” A Diyan kosa sõngr bɩ? Sɩngrẽ wã a ra pa rat n kos sõngr ye. A paasame: “M da pa rat n nams saam-biisã ye. M da yeta m meng yaa: ‘Yaa a Zeova n na n sõng-ma.’ La m wa n bãngame tɩ m sẽn pa baood neb a taabã sõngrã, m maooda ne m zu-loeesã m yembre.” (Yel. 18:1) A Diyan yãka yam n gʋls a zo-rãmb kẽer n togs-b yellã. A yeelame: “M pa tõe n bãng n bilg m tẽed-n-taasã sẽn keng m raood to-to wã ye. B wa n kõ-d-la rɩɩb logtorã yiri, la b tẽeg-m Biiblã vɛrse-rãmb sẽn kengd raoodo. D sã n neẽ tɩ d pa maood ne zu-loɛɛg d yembre, kengda raoodo. D naaga a Zeova zakã sẽn yaa kãsengã neba. D tẽed-n-taasã na n sak n sõng-d lame, n naag-d n yãb toog wakate, la b keng d raood tɩ d kell n naag-b n tũ a Zeova.”

14. Bõe yĩng tɩ d segd n sak kãsem-dãmbã sõngre?

¹⁴ A Zeova tũnugda ne kãsem-dãmbã me n kengd d raoodo. B yaa kũun a Zeova sẽn tũnugd ne n kengd d raood la a belsd-do. (Eza. 32:1, 2) Woto wã, y sã n wa maand yɩɩr bɩ y gom ne kãsem-dãmbã. B sã n wa rat n sõng-y bɩ y sak ne yamleoogo. A Zeova tõe n tũnuga ne-b n keng y tẽebã.

Y SẼN TẼED TƖ MANEGR N WATÃ TÕE N KENGA Y RAOODO

15. Bõe la kiris-nebã fãa saagd n na n wa paame?

¹⁵ Biiblã sẽn pʋlem tɩ manegr n watã tõe n kõ-d-la pãng la raood tɩ d kell n tũ a Zeova. (Rom. 4:3, 18-20) Tõnd sẽn yaa kiris-nebã, d saagdame n na n wa vɩɩmd wakat sẽn kõn sa, tɩ rẽ yõod pa tõe n bãng n bilg ye. Kẽer saagd n na n tɩ vɩɩmda saasẽ, tɩ sãnda saagd n na n vɩɩmd tẽngã sẽn na n lebg arzãnã zugu. D sẽn tẽed manegrã kõt-d-la raood tɩ d tõogd toog zu-loees sasa, n moond koe-noogã la d tʋmd tʋʋm toor-toor tigingã pʋgẽ. (1 Tes. 1:3) Yaa tẽn-tʋmd a Poll sẽn da tẽed manegrã n kɩt t’a paam raoodo.

16. Bõe yĩng tɩ tẽn-tʋmd a Poll ra baood raood kengre?

¹⁶ A Poll ra rata raoodo. Lɛtr ning a sẽn tool Korẽnt kiris-nebã pʋgẽ, a maka a meng ne tãnd laag sẽn pa tar pãnga. B ra ‘rɩdgd-a lame,’ a ra ‘pa mi a sẽn maandga,’ b ra ‘namsd-a lame,’ la b ra ‘lubd-a tẽnga.’ A vɩɩmã ra bee yell pʋgẽ menga. (2 Kor. 4:8-10) Yaa a Poll sẽn wa n gilgd naoor a tãab-n-soab n moond koɛɛgã la a yeel woto. Tõe tɩ wakat kãng t’a ra pa mi tɩ zu-loees a taab n gũud-a ye. Neb kʋʋng baoome n na n kʋ-a. B yõk-a lame, koom-koglg n sãam t’a ra be a pʋgẽ, b kẽes-a-la bãens roog me.

17. Sã n yaa ne 2 Korẽnt rãmb 4:16-18 wã, bõe n sõng a Poll t’a tõog toog zu-loees taoore?

¹⁷ A Poll sẽn da tagsd manegrã sẽn watã yellã, kõ-a-la raoodo. (Karm-y 2 Korẽnt rãmb 4:16-18.) A yeela Korẽnt kiris-nebã tɩ baa a yĩngã “pãng sã n boogdẽ,” a pa na n tol n bas tɩ rẽ koms a raood ye. A Poll ra tagsda sẽn wat beoogã yell n yɩɩda. A sẽn da saagd n na n wa vɩɩmd wakat sẽn kõn sa saasẽ wã ra yaa bũmb “sẽn pa tar mak-n-taaga,” t’a sak n na n tõog toog zu-loɛɛg buud fãa taoore, sẽn na yɩl n paam bõn-kãnga. A Poll ra bʋgsda a sẽn na n wa paam bũmb ningã zugu, tɩ kɩt t’a paamd raood “beoog sẽn vẽeg fãa.”

18. Wãn to la a Tiyomiir ne a zakã rãmb sẽn saagd tɩ manegr n watã kengd b raoodo?

¹⁸ A Tiyomiir sẽn yaa saam-biig sẽn be Bulgari wã paama raoodo, a sẽn saagd tɩ manegr n watã yĩnga. Yʋʋm a wãn sẽn looge, a yao a Zarko maana agsɩdã n ki. Rẽ sãama a Tiyomiir sũur wʋsgo. A Tiyomiir ne a zakã rãmb ra mamsda kũum vʋʋgrã sẽn na n yɩ to-to wã tɩ belsd-ba. A yeelame: “Wala makre, d ra mi n sõsa d sẽn na n seg a Zarko zĩig ninga zugu, rɩɩb ning d sẽn na n segl n kõ-a, neb nins d sẽn na n bool pipi tigr ning d sẽn na n maan a vʋʋgrã poorã, la bũmb ning d sẽn na n togs-a yaoolem wakatã wɛɛngẽ wã zugu.” A Tiyomiir yeelame tɩ yẽ ne a zakã rãmb sẽn tagsd manegrã sẽn watã yellã kengda b raood tɩ b tõogd toog n gũud wakat ning a Zeova sẽn yãk n na n vʋʋg a yaoã.

19. Bõe la y tõe n maan n maneg n kɩs sɩd tɩ manegr n wate? (Ges-y fotã me.)

¹⁹ Bõe la y tõe n maan n maneg n kɩs sɩd tɩ manegr n wate? Wala makre, y sã n saagd n na n wa vɩɩmd tẽngã zug wakat sẽn kõn sa, bɩ y karemd Biiblã sẽn bilgd arzãnã sẽn na n yɩ to-to wã la y bʋgsd rẽ zugu. (Eza. 25:8; 32:16-18) Mamsd-y vɩɩmã sẽn na n yɩ to-to dũni-paalgã pʋgẽ wã. Mamsd-y yãmb sẽn be dũni-paalgã pʋgẽ. Ãnda la yãmb ne-yã? Bõe rãamd la y wʋmda? Y manesem yaa wãna? Sẽn na yɩl n sõng-y tɩ y mams dũni-paalgã sẽn na n yɩ to-to, bɩ y ges fot-rãmb sẽn be tõnd sɛbã pʋsẽ n bilgd arzãnã sẽn na n yɩ to-to wã, wall y ges yɩɩn-nood nins gom-zut sẽn yaa: Le monde nouveau, bɩ Juste à notre porte, wall Imagine ce jour video-rãmbã. D sã n modg n kɩt tɩ manegrã sẽn watã yaa vẽeneg d yamẽ wã, d na n getame tɩ d zu-loeesã “yaa wakat bilf yĩnga, n leb n yaa faasga.” (2 Kor. 4:17) A Zeova sẽn kɩt tɩ y saagdẽ tɩ manegr n watã tõe n sõng-y lame tɩ y tõog toog namsg taoore.

20. Baa d sã n wa getẽ tɩ d ka pãnga, bõe la d tõe n maan n le paam pãnga?

²⁰ Baa d sã n wa getẽ tɩ d ka pãnga, “tõnd na n paama pãng Wẽnnaam maasem yĩnga.” (Yɩɩn. 108:13) A Zeova zoe n maana bũmb toor-toor sẽn tõe n sõng-y tɩ y paam raoodo. Woto wã, y sã n wa rat sõngr sẽn na yɩl n tõog n tʋm tʋʋmd ninga, wall n mao ne zu-loɛɛga, pa rẽ bɩ sẽn na yɩl n kell n tũ a Zeova ne sũ-noogo, bɩ y pelg y pʋg n pʋʋs-a la y zãms Biiblã n bãng a sẽn dat tɩ y maan bũmb ningã. Sak-y y tẽed-n-taasã sõngre. Kɩt-y tɩ y sẽn saagd tɩ manegr n watã yɩ vẽeneg y yamẽ. Y sã n maan woto, “Wẽnnaam [na n] talla a pãngã sẽn tar ziirã n kõ-y pãn-kãsenga, tɩ y tõog toog bũmb fãa pʋgẽ ne sũ-mar la ne sũ-noogo.”—Kolo. 1:11.