Karemdbã sogsgo
Yɩɩn-sõamyã 12:7 wã pʋgẽ, b sẽn yeel tɩ “yãmb na n kogl-b lame” wã, yaa “nimbãan-nebã” (vɛrse a 5) yell la b gomd bɩ, bɩ yaa “a Zeova goamã” (vɛrse a 6) yell la b gomda?
Yɩɩn-sõamyã 12 vɛrse-rãmb a taabã wilgdame tɩ yaa neb yell la b gomda.
Yɩɩn-sõamyã 12:1-4 pʋgẽ, b yeelame tɩ “neb nins d sẽn tõe n teegã menema ninsaalbã sʋka.” Rẽ poore, b yeela Yɩɩn-sõamyã 12:5-7 pʋgẽ yaa:
“A Zeova yeelame: ‘B sẽn namsd nimbãan-nebã yĩnga,
la naong rãmbã sẽn wẽed sirã yĩnga,
mam na n yikame n maan bũmbu.
Mam na n fãag-b-la neb nins sẽn paoogd-bã nusẽ.’
A Zeova goamã yaa yɩlma.
B yaa wa wanzuri b sẽn yɩlg tãnd wʋng pʋgẽ, wa wanzuri b sẽn yɩlg naoor a yopoe.
Zeova, yãmb na n kogl-b lame.
Yãmb na n kogla b ned kam fãa zãmaan-kãngã yĩnga, wakat fãa yĩnga.”
Vɛrse a 5 wã wilgda bũmb ning Wẽnnaam sẽn na n maan nimbãan-nebã yĩngã. A na n fãag-b lame.
Vɛrse a 6 paasame t’a “Zeova goamã yaa yɩlma,” “wa wanzuri b sẽn yɩlge.” Kiris-neb hakɩɩkã fãa kɩsa sɩd ne rẽ.—Yɩɩn. 18:30; 119:140.
La Yɩɩn-sõamyã 12:7 wã yeelame yaa: “Zeova, yãmb na n kogl-b lame. Yãmb na n kogla b ned kam fãa zãmaan-kãngã yĩnga, wakat fãa yĩnga.” Yaa bõe la a Zeova sẽn na n koglã?
B sẽn gom “a Zeova goamã” yell vɛrse a 6 pʋgẽ wã yĩnga, neb kẽer tõe n tagsdame tɩ b sẽn yeel tɩ b na n “kogl-b lame” wã, yaa Wẽnnaam goamã yell la b gomda. Sɩd me, Wẽnnaam kogla Biiblã tɩ bɛɛbã pa tõog t’a meneme, baa ne b sẽn maan b sẽn tõe fãa n na n gɩdg-a la b sãam-a wã.—Eza. 40:8; 1 Pɩy. 1:25.
La a Zeova kogenda neb nins yell b sẽn gomd vɛrse a 5 wã pʋgẽ wã me. A Zeova sõng-a “nimbãan-nebã” ne sẽn “namsd-bã” la a fãag-ba, n na n ket n maand woto.—Zoob 36:15; Yɩɩn. 6:4; 31:1, 2; 54:7; 145:20.
Woto wã, yaa bõe yell la b gomd vɛrse a 7 wã pʋgẽ?
D sã n karem Yɩɩn-sõamyã 12 sõma, d yãtame tɩ yaa neb yell la b sẽn gomdã.
Yɩɩn-sõamyã 12:1 wã pʋgẽ, a Davɩɩd yeelame tɩ nebã pa le maand sɩda, la tɩ b yaa pʋ-lik rãmba. Yaa vẽeneg tɩ rẽ ra namsda a Davɩɩd ne neb a taaba. Rẽ poore a wilgame t’a Zeova na n sɩbga neb nins sẽn yagd ziri la b gomd gom-yoodã. Yɩɩn-gʋlsdã yeelame tɩ d tõe n kɩsa sɩd tɩ Wẽnnaam na n sõnga a nin-buiidã, bala a goamã yaa yɩlma.
Rẽnd vɛrse a 7 wã sẽn yeel t’a Zeova na n “kogl-b lame” wã, yaa nin-wẽnsã sẽn yaa sabab tɩ neb nins namsdẽ wã yell la b gomda.
Biiblã babg ning b sẽn da gʋls ne Ebre wã seb-kʋd d sẽn tõe n bas d yam ne pʋsẽ, b ninga gom-bil sẽn wilgd tɩ yaa neb yell la b sẽn gomdã. Sɛptãntã sẽn yaa ne Gɛrkã pʋgẽ, b ninga gom-bil ning sẽn yaa “tõndã” vɛrse a 7 wã pʋgẽ naoor a yiibu, tɩ yaa sẽn maand-b sɩdã sẽn namsdã yell la b gomda. Sẽn na n baase, vɛrse a 7 wã yeelame tɩ b na n kogla sẽn maand-b sɩdã “ned kam fãa zãmaan-kãngã yĩnga,” rat n yeel tɩ nin-wẽnsã sẽn kɩt tɩ wẽnemã tar paasgã yĩnga. (Yɩɩn. 12:7, 8) Targum-dãmbã sẽn yaa ne Arameyẽ wã pʋgẽ, vɛrse a 7 wã yetame yaa: “ZU-SOABA, yãmb na n kogla nin-tɩrsã. Yãmb na n kogl-b-la zãmaan-kãngã sẽn yaa wẽngã yĩng wakat fãa yĩnga. Nin-wẽnsã gilgda zĩig fãa, n yaa wa rendeed sẽn yũud ninsaalb zɩɩmã.” Rẽ me yaa kaset sẽn wilgd tɩ Yɩɩn-sõamyã 12:7 wã pa gomd Wẽnnaam goamã yell ye.
Rẽnd vɛrse-kãngã kõta sẽn maand-b sɩd ne Wẽnnaamã saagre. Wilgdame tɩ Wẽnnaam na n sõng-b lame.