A Zeova “belsda sũ-sãang rãmbã”

1. A Zeova tagsg yaa wãn ne neb nins sẽn tũud-a wã?

A ZEOVA mii bũmb nins fãa sẽn paamd sẽn be-b tẽngã zug n tũud-a wã. A mii bũmb nins sẽn kõt tõnd sũ-noogo, la bũmb nins sẽn sãamd d sũurã me. (Yɩɩn. 37:18) A sã n ne d sẽn maand d sẽn tõe fãa n tũud-a baa ne zu-loeesã, a sũur noomame. Sẽn yɩɩd fãa a rata ne a sũur fãa n sõng-d la a bels-do.

2. Bõe la a Zeova maand n sõngd sũ-sãang rãmbã, la bõe la d tõe n maan n paam t’a ges d yelle?

² Yɩɩn-sõamyã 147:3 yetame t’a Zeova ‘vinda sũ-sãang rãmbã noada.’ Vɛrse-kãng wilgda a Zeova sẽn get sũ-sãang rãmbã yell ne bʋgsem to-to. La bõe la d tog n maan t’a Zeova ges d yelle? D rɩk makre. Logtor sẽn mi a tʋʋmd sõma tõe n sõnga ned sẽn pogl t’a paam laafɩ. La sẽn pogl-a wã sã n dat n paam laafɩ, a segd n tũu logtorã sẽn yeelã kɛpɩ. Sõs-kãngã pʋgẽ, d na n yãa a Zeova sẽn yet sũ-sãang rãmbã bũmb ning a Gomdã pʋgẽ, la d ges d sẽn tõe n tũ saglsã a sẽn kõt-d ne nonglmã to-to.

A ZEOVA RATAME TƖ D BAS D YAM TƖ D TARA YÕOD A NIFẼ

3. Tõe tɩ bõe n kɩt tɩ neb kẽer getẽ tɩ b ka tar yõodo?

³ Rũndã-rũndã, neb wʋsg pa nong taab ye. B kɩtame tɩ sãnda getẽ tɩ b ka yõod ye. Saam-bi-poak yʋʋr sẽn boond t’a Elɛna yeelame: “M sẽn wa n yaa bilfã, nonglem ra pa be tõnd zakẽ wã ye. M baaba ra yaa nen-kɛglem soaba. Daar fãa, a ra yet-d lame tɩ d ka võor ye.” Tõe tɩ yãmb me paama a Elɛn zu-loɛɛgã buudu. Tõe tɩ b ra namsd-y lame, n tʋʋd-y wakat fãa wall b kɩtame tɩ y tagsdẽ tɩ y pa tar yõod ye. Sã n yaa woto, tõe tɩ yɩ toog tɩ y tags tɩ ned n be n sɩd nong yãmba.

4. Sã n yaa ne Yɩɩn-sõamyã 34:18 wã, a Zeova ratame tɩ d bas d yam ne bõe?

⁴ Baa b sã n namsa yãmba, y tõe n basa y yam t’a Zeova nong-y lame la t’a nand-y lame. A “pẽe sũ-sãang rãmbã.” (Karm-y Yɩɩn-sõamyã 34:18.) Y sã n wa ‘koms raood’ bɩ y tẽeg t’a Zeova yãa bõn-sõma y sũurẽ wã, n tak yãmb n wa a nengẽ. (Zã 6:44) A segl n saa wakat fãa n na n sõng-yã, bala y tara yõod a nifẽ.

5. A Zeezi manesem sẽn da yaa to-to ne neb nins b sẽn pa nandã wilgda tõnd bõe?

⁵ A Zeezi manesmã tõe n sõng-d lame tɩ d bãng a Zeova tagsg sẽn yaa a soab ne tõndo. A Zeezi sẽn wa n be tẽngã zugã, a wilgame tɩ neb nins neb a taabã sẽn da pa nandã yell pak-a lame, n zoe b nimbãanega. (Mat. 9:9-12) Wala makre, daar a ye, pag sẽn da bẽed bã-kɛgeng n sɩɩs a fuugã n saagdẽ t’a na n paama laafɩ. A Zeezi bels-a lame la a pẽg-a a tẽeba yĩnga. (Mark 5:25-34) A Zeezi rɩka a Ba wã togs-n-taar kɛpɩ. (Zã 6:44) Woto wã, y tõe n basa y yam t’a Zeova nand-y lame la t’a nee y zʋg-sõma wã, wala makre y tẽebã la y sẽn nong-a wã.

6. Ned sã n tagsdẽ t’a ka võore, bõe la a tõe n maan tɩ sõng-a?

⁶ Y sã n wa tagsdẽ tɩ y ka võore, bõe la y tõe n maane? Karm-y Biiblã vɛrse-rãmb sẽn wilgd t’a Zeova nand-y lame, la y bʋgs b zutu.b (Yɩɩn. 94:19) Y sã n pa tõog n maan bũmb y sẽn da magd n na n maane, wall y sã n komsda raood y sẽn pa tõe n maan wa neb a taabã yĩnga, bɩ y ra ning y meng taal tɩ loog ye. A Zeova pa baood tɩ y maan sẽn yɩɩd y pãng ye. (Yɩɩn. 103:13, 14) Ned sã n maan-y-la wẽng pĩnd bɩ y ra ning y meng taal rẽ yĩng ye. A sẽn maan bũmb ningã pa yãmb yell ye. Tẽeg-y tɩ yaa neb nins sẽn maand wẽngã la a Zeova ningd taale, pa neb nins b sẽn maan wẽngã ye. (1 Pɩy. 3:12) B namsa a Sãndra wʋsg a sẽn wa n yaa bilfã. A yeelame: “M wae n pʋʋsda a Zeova n kotẽ t’a sõng-m tɩ m tall tagsg sẽn zems m mengã zugu. Rat n yeel t’a sõng-m tɩ m yã zʋg-sõma nins a sẽn ne mam nengẽ wã.”

7. Wãn to la zu-loees nins ned sẽn mao ne pĩndã tõe n naf-a a Zeova tʋʋmdã pʋgẽ?

⁷ Bãng-y me t’a Zeova tõe n tũnuga ne yãmb n sõng neb a taabã. A sẽn sak tɩ y yaa a tʋm-n-taag n moond koɛɛgã yaa zu-zẽkre. (1 Kor. 3:9) Bũmb nins sẽn paam yãmbã tõe n kɩtame tɩ y bãng neb a taabã zu-loeesã sẽn namsd-b to-to, n tõog n kʋm b nimbãanega. Y tõe n sõng-b-la wʋsgo. A Elɛn sẽn yaa saam-bi-poak ning yell d sẽn zoe n gomã paama sõngre, n bãng a sẽn tõe n maan to-to n sõng neb a taaba. A yeelame: “Pĩndã m da getame tɩ m ka võor ye. La a Zeova kɩtame tɩ m neẽ t’a nong-m lame la t’a tũnugda ne maam n sõngd neb a taaba.” Rũndã-rũndã a Elɛn yaa wakat fãa so-pakd hal t’a sũur noomẽ.

A ZEOVA RATAME TƖ D SAK N DEEG T’A KÕ-D-LA SUGRI

8. Ezayi 1:18 kɩtame tɩ d tõe n bas d yam ne bõe?

⁸ Neb kẽer sẽn tũud a Zeova sũy sãamda wʋsg yel-wẽn b sẽn maan pĩnd yĩnga. Tõe tɩ yaa nand tɩ b reeg lisgu, wall b lisgã poor menga. La yɩta sõma tɩ d tẽeg t’a Zeova kɩtame t’a Zeezi wa ki tõnd yĩnga, a sẽn nong tõnd wʋsgã yĩnga. Yaa vẽeneg t’a ratame tɩ d bas d yam tɩ d tõe n paama d yel-wẽnã sugr a Zeezi maoongã maasem yĩnga. A Zeova pʋlma tõnd tɩ d sã n “welg yell ning” sẽn be tõnd ne yẽ sʋkã, a kõt-d-la sugr zãnga.c (Karm-y Ezayi 1:18.) D sẽn paam tɩ d Ba a Zeova yĩmd yel-wẽn nins d sẽn maan pĩndã pa noom-d sɩda? La a pa yĩmd bõn-sõma nins d sẽn maanã ye.—Yɩɩn. 103:9, 12; Ebre. 6:10.

9. Bõe yĩng tɩ d segd n bas sẽn loogã la d tagsd rũndã-rũndã la beoog yelle?

⁹ Y sũur sã n sãamd bũmb kẽer y sẽn maan pĩndã yĩnga, bɩ y tags bũmb nins y sẽn maand rũndã-rũndã la b rãmb nins y sẽn tõe n maan beoogã yelle. Yɩɩ woto ne tẽn-tʋmd a Polle. A ra maanda a bãngẽ ne a sẽn nams kiris-nebã ne toolmã yĩnga, la a ra kɩsa sɩd t’a Zeova kõ-a-la sugri. (1 Tɩm. 1:12-15) A ra tagsda yel-wẽn nins a sẽn maan pĩndã yell wakat fãa bɩ? Yaa vẽeneg t’a zãgsa rẽ maanego, wa a sẽn da pa le tagsd bũmb nins a sẽn maan Zʋɩf-rãmbã tũudmã pʋgẽ tɩ nebã ra pẽgdã yellã. (Fili. 3:4-8, 13-15) A Poll kell n tʋma Wẽnnaam tʋʋmdã ne yẽesem la a gũud bõn-sõma nins sẽn wat beoogã. Yãmb me yaa wa a Polle, n pa tõe n toeem sẽn loogã ye. La y tõe n tũnuga ne y yɛlã sẽn yaa to-to rũndã-rũndã wã n waoog a Zeova la y tagsd bõn-sõma nins a sẽn pʋlm-yã yelle.

10. Y sã n maana bũmb n sãam y to sũuri, bõe la y tõe n maane?

¹⁰ Tõe tɩ bũmb kẽer la y maan pĩnd n sãam y to sũuri, tɩ ket n namsd-yã. Sã n yaa woto, bõe la y segd n maane? Maan-y y sẽn tõe fãa n dems yɛlã la y bõos a soabã sugri. (2 Kor. 7:11) Pʋʋs-y-yã a Zeova n kos t’a sõng a soabã. A tõe n sõnga yãmb ne ned ning sũur y sẽn sãamã tɩ y tõog toogo, la a sõng-y tɩ y yam gãand bãane.

11. Yam-bʋg la d tõe n dɩk a Zonas kibarã pʋgẽ? (Ges-y fotã me.)

¹¹ Rɩk-y yam bũmb nins y sẽn tudg n maan pĩndã pʋgẽ, la y sak tʋʋmd ning fãa a Zeova sẽn na n kõ-yã. D gom no-rɛɛs a Zonas yelle. Wẽnnaam tʋma a Zonas Niniiv sẽn be yaang sẽnesã, la a Zonas basame n zoe n keng nin-taoore. A Zeova kibla a Zonas t’a rɩk yam a kongrã pʋgẽ. (Zon. 1:1-4, 15-17; 2:7-10) A Zeova pa yeel t’a Zonas pa na n le yɩ a no-rɛɛs ye. A le yeela a Zonas t’a keng Niniivi. La so-kãnga, a Zonas saka zĩig pʋgẽ. A pa bas t’a pĩnd kongrã kɩt t’a pa sak tʋʋmd ning a Zeova sẽn kõ-a wã ye.—Zon. 3:1-3.

A ZEOVA TŨNUGDA NE A VƲƲSEM SÕNGÃ N BELSD TÕNDO

12. Yel-beed sã n paam-do, bõe la d tõe n maan t’a Zeova kõ-d a laafɩ wã? (Filip rãmbã 4:6, 7)

¹² Yel-beed sã n paam-do, a Zeova tũnugda ne a vʋʋsem sõngã n belsd tõndo. D ges bũmb ning sẽn paam saam-biig a Rolã ne a pag a Karollã. B bi-riblã kʋʋ a menga. B yeelame: “D mao ne zu-loees pĩndã, la zu-loe-kãng n nams-d n yɩɩda. Yʋnd wʋsgo, d maka gõeem n konge. Rẽ n so tɩ d ra pʋʋsd a Zeova. D paamame t’a kõ-d laafɩ ning yell b sẽn gomd Filip rãmb 4:6, 7 pʋgẽ wã.” (Karm-y-yã.) Y sã n maooda ne zu-loɛɛg sẽn sãamd y sũur wʋsgo, bɩ y pelg y pʋg n togs a Zeova yellã sẽn namsd-y to-to wã. Y tõe n pʋʋsa a Zeova wakat ning fãa y sẽn date, la y pʋʋs n kaoos wa y sẽn date. (Yɩɩn. 86:3; 88:1) Kos-y-yã a Zeova a vʋʋsem sõngã n yɩlme. A na n sõng-y-la wakat fãa.—Luk 11:9-13.

13. Wãn to la vʋʋsem sõngã tõe n sõng-d tɩ d kell n maan sɩd ne a Zeova? (Efɛɛz rãmbã 3:16)

¹³ Zu-loɛɛg n namsd yãmb hal tɩ y koms raood n pa le tar pãng bɩ? Vʋʋsem sõngã tõe n kõ-y-la raood tɩ y kell n maan sɩd ne a Zeova. (Karm-y Efɛɛz rãmb 3:16.) D ges bũmb ning sẽn paam saam-bi-poak a Flora wã. Yẽ ne a sɩdã ra naaga taab n yaa misioneer-dãmb t’a sɩdã wa yo tɩ b kao b kãadmã. A yeelame: “A sẽn zãmb-mã sãama m sũurã wʋsgo, hal tɩ m da pa tõe n bas rẽ yell tagsg ye. Mam da pʋʋsda a Zeova n kotẽ t’a kõ-m a vʋʋsem sõngã sẽn na yɩl tɩ m tõog toogo. A Zeova belsa maam la a sõng-m tɩ m le paam pãnga, baa sɩngrẽ m sẽn da get tɩ rẽ pa tõe wã.” A Flora neeme tɩ Wẽnnaam sõng-a lame t’a maneg n kɩs-a sɩda, la a neẽ t’a na n kell sõng-a-la a zu-loeesã fãa pʋgẽ. A paasame: “Yɩɩn-sõamyã 119:32 bilgda a Zeova sẽn sõng maam to-to wã. Be b yeelame yaa: ‘Mam na n tũu yãmb noyã sor ne m sũur fãa, bala yãmb kõo maam bãngr n paase.’”

14. Bõe la d tõe n maan tɩ pak sor tɩ Wẽnnaam vʋʋsem sõngã sõng-do?

¹⁴ Y sã n pʋʋsa a Zeova n kos vʋʋsem sõngã, bõe la yãmb me segd n maane? Maand-y bũmb toor-toor sẽn na n pak sor tɩ vʋʋsem sõngã tõog n sõng-yã. Wala makre, kẽnd-y tigissã la y moond koɛɛgã. Karemd-y Biiblã daar fãa tɩ rẽ n na n sõng-y tɩ y tagsd a Zeova goamã yelle. (Fili. 4:8, 9) Y sã n wa karemd Biiblã, bɩ y bao n bãng zu-loees nins wẽn-sakdb kẽer sẽn mao ne wã la y bʋgs a Zeova sẽn sõng-b to-to tɩ b tõog toogã zugu. A Sãndra sẽn yaa saam-bi-poak ning yell d sẽn zoe n gomã maoo ne zu-loees wʋsgo. A yeelame: “A Zozɛf kibarã kenga m raood wʋsgo. A pa bas tɩ zu-loeesã ne b sẽn maan-a pãngã boog yẽ ne a Zeova zoodã pãng ye.”—Sɩng. 39:21-23.

A ZEOVA TŨNUGDA NE D TẼED-N-TAASÃ N BELSD TÕNDO

15. Ãnd dãmb nengẽ la d tõe n paam belsgo, la wãn to la b tõe n bels-do? (Ges-y fotã me.)

¹⁵ D sã n wa maood ne zu-loeese, d tẽed-n-taasã tõe n ‘bels-d-la wʋsgo.’ (Kolo. 4:11) Sɩd-sɩda, a Zeova tõe n tũnuga ne d tẽed-n-taasã n wilg t’a nong-d lame. D tẽed-n-taasã sã n be ne tõndo, wall b kelgd tõnd tɩ wilgdẽ tɩ b kʋmd-d lame, belsd-d lame. B tõe n tẽeg-d-la vɛrse sẽn kengd raoodo, wall b naagd n pʋʋse.d (Rom. 15:4) Wakat ninga, d saam-biig wall d saam-bi-poak tõe n tẽega tõnd bũmb a Zeova zugu, tɩ sõng-d tɩ d kell n tõog toogo. D tẽed-n-taasã tõe n sõng-d-la ne sõng-vẽeneg me. Wala makre, b tõe n segla rɩɩb n kõ-do.

16. Y sã n dat n paam neb a taabã sõngre, bõe la y tõe n maane?

¹⁶ D sã n dat d tẽed-n-taasã sõngre, wakat ninga yaa tɩlɛ tɩ d kose. D saam-biisã la d saam-bi-pogsã nong-d lame, n dat n sõng-do. (Yel. 17:17) La tõe tɩ b pa mi yellã sẽn namsd tõnd to-to wall bũmb ning d sẽn datã ye. (Yel. 14:10) Y sã n wa maood ne zu-loɛɛg sẽn sãamd y sũur wʋsgo, y tõe n sõsa ne y zoa tẽeb sẽn bɩ n togs-a yellã sẽn namsd-y to-to. Togs-y-yã-a bũmb ning a sẽn tõe n maan n sõng-yã. Y tõe n yãka yam n sõs ne kãsem-soab wall kãsem-dãmb a yiib y sẽn minimi. Saam-bi-pogs kẽer yãame tɩ b sã n sõs ne saam-bi-poak tẽeb sẽn bɩ belsd-b lame.

17. Zu-loe-bʋs n tõe n kɩt tɩ d pa bao d tẽed-n-taasã zĩiga, la bõe la d tõe n maan tɩ sõng-do?

¹⁷ Ra nong-y n yaa y yembr ye. Bũmb sã n sãam y sũur wʋsgo, y tõeeme n pa baood neb a taabã zĩigẽ ye. Wakat ninga, d tẽed-n-taasã tõeeme n pa mi zu-loɛɛgã sẽn namsd tõnd to-to wã sõma, wall b gom goam tɩ sãam d sũuri. (Zak 3:2) La ra bas-y tɩ yɛl a woto kɩt tɩ y lak y meng ne y tẽed-n-taasã ye. A Zeova tõe n tũnuga ne-b n keng y raoodo. Kãsem-soab a ye yʋʋr sẽn boond t’a Kevin ra maooda ne yam-ka-m-meng bãaga. A yeelame: “Naoor wʋsgo, mam da pa rat m zo-rãmbã zĩigẽ ye.” Baa ne rẽ, a Kevin ra modgdame n be ne a saam-biisã tɩ ra sõngd-a wʋsgo. Saam-bi-poak a ye yʋʋr sẽn boond t’a Ami yeelame: “Zu-loees nins m sẽn paam pĩndã kɩtame tɩ yaa toog ne-m tɩ m kõ ned sɩda. La m modgame n nong m tẽed-n-taasã la m kɩs-b sɩd wa a Zeova. M miime tɩ rẽ nooma a Zeova. Kõta ma-me sũ-noogo.”

A ZEOVA SẼN PƲLEM BÕN-SÕMA NINSÃ TÕE N BELS-D LAME

18. Bõe n na n maan kala bilfu, la bõe la d segd n maan masã menga?

¹⁸ Ka la bilfu, a Zeova na n kɩtame tɩ bũmb nins sẽn wat ne toog la yɩɩrã sa. (Vẽn. 21:3, 4) Rẽ poore, d pa na n le tẽeg bũmb nins sẽn maan pĩndã tɩ sãamd d sũurã yell ye. (Eza. 65:17) Baa masã menga, d sã n wa maood ne zu-loees sẽn sãamd sũuri, a Zeova vinda d noadã. A Zeova tũnugda ne bũmb wʋsg n belsd tõnd la sõngd tõndo. Sak-y t’a sõng-yã. Ra sãmb-y baa bilf t’a “geta yãmb yell” ye.—1 Pɩy. 5:7.