Tõnd zɩ n yɩ d yembr ye

1-2. a) Bõe yĩng tɩ d tõe n yeel tɩ d pa na n tol n mao ne d zu-loɛɛg d yembre? b) Bõe yell la d na n gom sõs-kãngã pʋgẽ?

D SÃ N wa tar zu-loe-kɛgemse, d tõe n wa getame tɩ yaa wa d bee kom-kogl-bil pʋgẽ d yembre, n be mogrã sʋk tɩ sob-kãseng tar-d n lengdẽ. La d pa maood ne d zu-loeesã d yembr ye. D saasẽ Ba wã sẽn nong-dã nee d sẽn maood ne d zu-loeesã. A pʋlmame me t’a na n sõng-d lame. A Zeova pʋlma neb nins sẽn maand sɩd ne-a wã ned kam fãa yaa: “Mam na n sõnga foom.”—Eza. 41:10.

² Sõs-kãngã pʋgẽ, d na n yãa a Zeova sẽn sõngd tõnd to-to wã. 1) A wilgd-d-la sore. 2) A kõt-d-la bũmb nins sẽn yaa tɩlɛ ne-dã. 3) A kogend-d lame. La 4) a belsd-d lame. A Zeova pʋlem-d lame tɩ sẽn wa n yaa zu-loɛɛg ning fãa la d maood ne, a pa na n tol n yĩm d yell ye. A pa na n tol n daag-d n bas ye. Rẽnd d pa na n tol n yɩ d yembr ye.

A ZEOVA WILGD-D-LA SORE

3-4. Wãn to la a Zeova wilgd-d sore? (Yɩɩn-sõamyã 48:14)

³ Karm-y Yɩɩn-sõamyã 48:14. A Zeova pa rat tɩ d wilg d meng sor ye. Wãn to la a wilgd neb nins sẽn tũud-a wã sor rũndã-rũndã? Bũmb a ye a sẽn tũnugd ne n wilgd-d sor yaa Biiblã. (Yɩɩn. 119:105) A Zeova tũnugda ne a Gomdã n sõngd tõnd sẽn na yɩl tɩ d bãngd n yãkd yam la d bɩɩsd zʋg-sõma sẽn na n sõng tõnd tɩ d paam sũ-noog hakɩɩk masã menga, la vɩɩm sẽn ka sɛt beoog sẽn wate.a Wala makre, a sagenda tõnd tɩ d bas sũ-kẽka, tɩ d yɩ pʋ-peelem dãmb bũmb fãa pʋgẽ, la tɩ d nong d taabã wʋsg ne nonglem sẽn yit sũurẽ. (Yɩɩn. 37:8; Ebre. 13:18; 1 Pɩy. 1:22) D sã n bɩɩs zʋg-sõma-kãense d lebgda roagdb sẽn get b kamb yell sõma, pʋg-sõma wall sɩd-sõma, la zo-rãmb hakɩɩka.

⁴ Sẽn paase, a Zeova kɩtame tɩ b gʋls neb sẽn mao ne zu-loees la sẽn da tar tagsa sẽn wõnd tõnd rẽndã kibay Biiblã pʋgẽ. (1 Kor. 10:13; Zak 5:17) D sã n karemd kiba-kãens la d tũud yam ning d sẽn dɩkd b pʋsẽ wã, nafda tõnd bũmb a yiib wɛɛngẽ. Pipi, d bãngdame tɩ d pa d yembr ye. Neb a taab n mao ne tõnd zu-loeesã buud n tõoge. (1 Pɩy. 5:9) Yiibu, d bãngda d sẽn tõe n mao ne d zu-loeesã to-to.—Rom. 15:4.

5. Ãnd dãmb la a Zeova tũnugd ne n wilgd tõnd sore?

⁵ A Zeova tũnugda ne d tẽed-n-taasã me n wilgd-d sore.b Wala makre, tigims sull yel-gɛtbã kaagda tigimsã, n kengd b raoodo. Sõss nins b sẽn wɛgsdã paasda d tẽebã pãnga, n sõngdẽ tɩ zems-n-taar ket n be d sʋka. (Tʋʋ. 15:40–16:5) Kãsem-dãmbã me modgda wʋsg n sõngd tigingã ned kam fãa sẽn na yɩl t’a tẽebã kell n tall pãnga. (1 Pɩy. 5:2, 3) Roagdbã sõngda b kambã n dat tɩ b tẽebã paam pãnga, tɩ b bãngd n yãkd yam la b tall minim-sõma. (Yel. 22:6) Saam-bi-pogs nins tẽeb sẽn bɩ wã kõta mak-sõng tɩ nafd saam-bi-pogs a taabã. B leb n kõt-b-la sagls la b kengd b raood ne nonglem.—Tɩt 2:3-5.

6. Bõe la d segd n maan t’a Zeova saglsã naf tõndo?

⁶ A Zeova kõo tõnd bũmb nins fãa sẽn yaa tɩlɛ sẽn na yɩl tɩ d bãngd n yãkd yamã. Bõe la d tõe n maan n wilg tɩ d sũur nooma ne rẽ? Yel-bũn 3:5, 6 yetame: “Teeg a Zeova ne f sũur fãa, la f ra teeg f meng bãngr ye.” D sã n maan woto, ‘a na n kɩtame tɩ d soayã yɩ tɩrse,’ rat n yeel t’a na n sõng-d lame tɩ d gil zu-loees wʋsgo, n paam sũ-noogo. D sũur yaa noog wʋsgo, a Zeova sẽn kõt d ned kam fãa sagls ne nonglmã.—Yɩɩn. 32:8.

A ZEOVA KÕTA TÕND BŨMB NINS SẼN YAA TƖLƐ NE-DÃ

7. Wãn to la a Zeova sõngd tõnd tɩ d paamd bũmb nins sẽn yaa tɩlɛ ne-dã? (Filip rãmbã 4:19)

⁷ Karm-y Filip rãmb 4:19. A Zeova pa wilgd tõnd sor bal ye. A sõngdame tɩ d paamd rɩɩbo, fut la ro-gãaga. (Mat. 6:33; 2 Tes. 3:12) D sã n maand yɩɩr d sẽn na n ges d meng yell to-to wã wɛɛngẽ, pa wẽng ye. La a Zeova pa rat tɩ d maan yɩɩr tɩ loog noor bõn-kãens wɛɛngẽ ye. Bõe yĩnga? Bala tõnd Ba wã pa na n tol n daag neb nins sẽn maand sɩd ne-a wã n bas b sẽn wat n dat sõngr ye. (Mat. 6:8; Ebre. 13:5) D tõe n basa d yam t’a sẽn yeel t’a na n kõo tõnd bũmb nins sẽn yaa tɩlɛ ne-dã yaa sɩda.

8. Wãn to la a Zeova ges a Davɩɩd yelle?

⁸ Tẽeg-y-yã a Zeova sẽn sõng a Davɩɩd to-to wã. A Davɩɩd sẽn wa n zoet n na n põs rĩm a Sayullã, a Zeova sõnga yẽ ne a nebã tɩ b paam bũmb nins sẽn yaa tɩlɛ ne-bã. A Davɩɩd tagsa a Zeova sẽn ges a yell to-to yʋʋm wʋsg pʋgẽ wã yell n yeel yaa: “Mam da yaa bi-bɩɩga, la masã mam kʋʋlame, la mam zɩ n yã tɩ b raag nin-tɩrg n base, wall nin-tɩrg kamb sẽn bõosd rɩɩb ye.” (Yɩɩn. 37:25) Yaa vẽeneg tɩ yãmb me yãa a Zeova sẽn ges neb sẽn maan sɩd ne-a yell ne nonglem naoor wʋsgo.

9. Sabab-wẽng sasa, bõe la a Zeova maand n sõngd a nin-buiidã rũndã-rũndã? (Ges-y fot-rãmbã me.)

⁹ A Zeova sõngda a nin-buiidã tɩ b paamd bũmb nins sẽn yaa tɩlɛ ne-bã sabab-wẽns sasa me. Wala makre kom n zĩnd Zide pipi kiris-nebã wakatẽ, tɩ kiris-neb nins sẽn be zĩis a taabã tool bũmb toor-toor tɩ b sõng saam-biisã la saam-bi-pogsã sẽn da rat sõngrã. (Tʋʋ. 11:27-30; Rom. 15:25, 26) A Zeova Kaset rãmbã wilgda rũndã-rũndã me tɩ b yaa kõatba. Sabab-wẽng sã n mi n maane, a Zeova kɩtdame t’a Kaset rãmbã sẽn be zĩis a taabã kõ rɩɩbo, koom, fut la tɩɩm tɩ b reeg n sõng sabab-wẽngã sẽn paam b rãmbã. Meebã sul lebsd n manega nebã rot la Rĩung rot nins sẽn sãamã. Sẽn paase, a Zeova Kaset rãmbã yɩta tao-tao n tik Biiblã n bels neb nins rot sẽn sãamã wall b neb sẽn maan kaalmã la b keng b raoodo.

10-11. Yam-bʋg la y rɩk a Boriis kibarã pʋgẽ?

¹⁰ A Zeova sõngda neb nins sẽn nan pa tũud-a wã me ne yamleoogo. Tõnd me tũnugda ne segb buud fãa n maand neb nins sẽn nan pa tũud a Zeova wã neere. (Gal. 6:10) D sã n maand woto wae n womda bi-sõma. D gom a Boriis sẽn yaa Ikrɛn lekoll a ye taoor soabã yelle. Baa a Boriis sẽn pa a Zeova Kaset soabã, a ra maanda a karen-biis nins sẽn yaa a Zeova Kaset rãmbã neer wakat fãa, n pa sãbsd-b b tũudmã yĩng ye. A Boriis sẽn wa n yãk yam n na n zoe n kẽng tẽngã zĩig a to zabrã sẽn pa ta wã, saam-biisã sõng-a lame. A Boriis wa n kẽnga a Zeezi kũumã tẽegre. A tagsa bũmb nins saam-biisã sẽn maanã yell n yeel yaa: “A Zeova Kaset rãmbã maan-m-la neer wʋsgo. B gesa m yell sõma. M pa tõe n pʋʋs-b bark n sa ye.”

¹¹ D fãa tõe n dɩka d saasẽ Ba wã sẽn yaa nimbãan-zoɛtã togs-n-taar n maand neb nins sẽn dat sõngrã neere, b yaa d tẽed-n-taas tɩ b pa d tẽed-n-taase. (Luk 6:31, 36) D saagdame tɩ d sã n wilg nebã nonglem woto, na n kɩtame tɩ b sak n lebg Kirist karen-biisi. (1 Pɩy. 2:12) La baa sã n pa yɩ woto, d tõe n paama sũ-noog wʋsg d sẽn yaa kõatbã yĩnga.—Tʋʋ. 20:35.

A ZEOVA KOGENDA TÕNDO

12. Bõe la a Zeova pʋlem a nin-buiidã? (Yɩɩn-sõamyã 91:1, 2, 14)

¹² Karm-y Yɩɩn-sõamyã 91:1, 2, 14. Rũndã-rũndã, a Zeova pʋlma tõnd t’a na n kogl-d lame tɩ bũmb ra sãam d tẽebã ye. A pa na n tol n bas t’a Sʋɩtãan rẽgem tũudum hakɩɩkã ye. (Zã 17:15) Sẽn paase “to-kãsengã” sã n wa sɩnge, d tõe n basa d yam t’a Zeova na n pidsa a pʋlengã n sõng-d tɩ d tẽebã kell n tall pãnga, la a kogl-d tɩ d põse.—Vẽn. 7:9, 14.

13. Bõe la a Zeova maand n kogend tõnd ned kam fãa yembr-yembre?

¹³ Bõe la a Zeova pʋlem tõnd ned kam fãa yembr-yembre? A Zeova tũnugda ne Gʋls-sõamyã n sõngd tõnd tɩ d bãngd sõma la wẽng n bakdẽ. (Ebre. 5:14) D sã n tũud Wẽnnaam saglsã sẽn be Biiblã pʋgẽ wã kogenda tõnd tɩ bũmb pa tõe n sãam d tẽebã, la kɩtdẽ tɩ d gind zu-loees me. (Yɩɩn. 91:4) Sẽn paase a Zeova tũnugda ne tigingã n kogend tõndo. (Eza. 32:1, 2) D sã n wae n be ne neb nins sẽn nong a Zeova la b tũud a noyã, d paamdame tɩ b kengd d raood la b sõngd-d tɩ d zãagd d meng ne wẽng maanego.—Yel. 13:20.

14. a) Bõe yĩng tɩ Wẽnnaam mi n bas tɩ d paam zu-loeese? b) Yɩɩn-sõamyã 9:10 kɩtame tɩ d tõe n bas d yam ne bõe? (Ges-y tẽngr notã me.)

¹⁴ Pĩnd wẽndẽ wã, a Zeova ra mi n kogla a nin-buiidã tɩ bũmb pa paam-b ye. La pa wakat fãa la a ra maand woto ye. Wakat ninga, “yel-lingdem” tõe n paam-d lame. (Koɛ. 9:11) Sẽn paase pĩnd wẽndẽ wã a Zeova basame tɩ b nams neb sẽn da tũud-a hal n kʋ kẽer menga, sẽn na yɩl n wilg t’a Sʋɩtãan yaa pʋ-yagda. (Zoob 2:4-6; Mat. 23:34) Yaa woto rũndã-rũndã me. Baa a Zeova sẽn pa na n kɩt tɩ d zu-loeesã fãa sa wã, d tõe n basa d yam t’a pa na n tol n daag neb nins sẽn nong-a wã n bas ye.c—Yɩɩn. 9:10.

A ZEOVA BELSDA TÕNDO

15. Wãn to la pʋʋsgã, Wẽnnaam Gomdã la d tẽed-n-taasã belsd tõndo? (2 Korẽnt rãmbã 1:3, 4)

¹⁵ Karm-y 2 Korẽnt rãmb 1:3, 4. D mi n paamda zu-loees sẽn sãamd d sũuri, n kɩtdẽ tɩ d maand yɩɩre. Tõe tɩ y maooda ne zu-loees rũndã-rũndã tɩ kɩt tɩ y getẽ tɩ y pa tar sõangd ye. Ned beeme n wʋmd y zu-loɛɛgã sẽn namsd-y to-to wã bɩ? N-ye. A Zeova. A pa kʋmd-d bal ye. A “belsda tõnd d zu-loeesã fãa pʋgẽ.” Wãn to la a maand rẽ? D sã n pelg d pʋg n pʋʋs a Zeova, a kõta tõnd “Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã.” (Fili. 4:6, 7) D sã n karemd a Zeova goamã sẽn be Biiblã pʋgẽ wã me, d paamda belsgo. D yãta goam sẽn wilgd t’a Zeova nonga tõndo, goam sẽn kõt yam la sẽn wilgd tɩ manegr n wate, tɩ kengd d raoodo. Sẽn paase d paamda belsg tigissã sasa. Bala d kelgda goam sẽn tik Biiblã zug tɩ kengd d raoodo, la d paamd n be ne d tẽed-n-taasã sẽn nong-dã.

16. Yam-bʋg la y rɩk a Natã ne a Pirsila kibarã pʋgẽ?

¹⁶ Ad kibar sẽn wilgd a Zeova sẽn tũnugd ne a Gomdã n belsd-d la a kengd d raood to-to. Yaa a Natã ne a Pirsila sẽn be Etazĩni wã kibare. Yʋʋm a wãn sẽn looge, b yãka yam n yik n kẽng zĩig koe-moondbã sẽn pa waooge. A Natã yeelame: “D ra kɩsa sɩd t’a Zeova na n ninga d modgrã barka.” La b sẽn ta be wã poore, b tiig n paama zu-loeese. Bãas n nams-ba, tɩ ligd paoong me ra pa nana ye. B wa n kong n leba b ba-yirã. La paam n kõ noorã ra ket n pa nana ye. A Natã yeelame yaa: “M da sokda m meng bõe yĩng la Wẽnnaam sẽn pa ning-d bark wa d sẽn da tẽedã. M wa n sãmbdame meng m sã n pa beega Wẽnnaam.” La a Natã ne a Pirsila wa n bãngame tɩ Wẽnnaam pa raag-b n bas b zu-loeesã sasa ye. A Natã paasame: “Tõnd zu-loeesã sasa fãa, Biiblã ra yaa wa d zoa sẽn tar yam n kengd d raood la a wilgd-d sore. D sẽn zʋʋg zu-loees nins d sẽn da tarã n get a Zeova sẽn sõngd tõnd tɩ d tõogd toog to-to wã sõnga tõnd tɩ d wa tõog n mao ne zu-loees a taaba.”

17. Wãn to la saam-bi-poak a Helga paam belsgo? (Ges-y fotã me.)

¹⁷ D tẽed-n-taasã me tõe n bels-d lame. Wãn to? D gom saam-bi-poak a Helga sẽn be Hõngri wã yelle. Yʋʋm wʋsg pʋgẽ, a maoo ne zu-loees toor-toor hal tɩ koms a raood wʋsgo, t’a ra tagsdẽ t’a ka võor ye. La a sã n lebg n tẽeg yɛlã sẽn yɩ to-to wã, a neeme t’a Zeova tũnuga ne tigingã neb n bels-a. A yeelame: “A Zeova sã n wa getẽ tɩ m nug tʋʋmdã, m sẽn segd n ges m biigã sẽn yaa bãadã yellã n paas zu-loees a taabã rat n looga m nugu, a sõngd-m lame. Yʋʋm pis-tã wã sẽn loogã pʋgẽ, daar pa tol n zĩnd t’a Zeova pa bels maam wa a sẽn pʋlmã ye. Naoor wʋsgo, a kɩtame tɩ m taabã togs-m gom-noodo, goam sẽn kengd raood la sẽn wilgd tɩ m yell pak-b lame. M da mi n paama mesaaze, lɛtr wall pẽgr goam tɩ kell n zems ne a wakate.”

18. Bõe la d tõe n maan n bels d taabã?

¹⁸ D paam n tõe n dɩka a Zeova togs-n-taar n belsd d taabã tɩ yaa zu-zẽkre. Wãn to la d tõe n maan dẽ? D tõe n maaga d yĩng n kelg-ba, n gomd goam sẽn belsd ne-ba, la d maand bũmb toor-toor n sõngd-ba. (Yel. 3:27) D maanda d sẽn tõe n belsd neb nins fãa sẽn namsdã, baa b rãmb nins sẽn nan pa tũud Wẽnnaamã. B ned sã n wa maan kaalem, b sã n wa lʋɩ bãag wall b maand yɩɩre, d kẽngd n tɩ kaag-b lame n maag d yĩng n kelg-ba, la d tik Biiblã n keng b raoodo. D sã n dɩkd a Zeova sẽn yaa “belsg fãa Wẽnnaamã” togs-n-taare, d pa na n sõng d tẽed-n-taasã tɩ b mao ne b zu-loeesã bal ye. Tõe n kɩtame me tɩ neb nins sẽn pa mi Wẽnnaamã bao n bãng-a.—Mat. 5:16.

A ZEOVA BEE NE-D WAKAT FÃA

19. Bõe la a Zeova maand n sõngd tõndo, la wãn to la d tõe n dɩk a togs-n-taare?

¹⁹ A Zeova geta neb nins fãa sẽn nong-a wã yelle. D sã n wa maood ne zu-loeese, a pa na n daag-d n bas ye. A Zeova geta neb nins sẽn maand sɩd ne-a wã yell wa ba sẽn nong a kamb sẽn get b yell to-to wã. A wilgd-d-la sore, n kõt-d bũmb nins sẽn yaa tɩlɛ ne-dã, n kogend-d la a belsd-do. Tõnd me rɩkda d saasẽ Ba wã sẽn nong-dã togs-n-taar n teend d taabã la d kengd b raoodo, b sã n wa maood ne zu-loeese. Baa d sẽn pa tõe n pa paam zu-loeesã, d tõe n kɩsa sɩd t’a Zeova bee ne-do. Sɩd me, a pʋlem-d lame yaa: “Ra zoe rabeem ye. Bala mam bee ne foo.” (Eza. 41:10) Rẽnd d tõe n basa d yam zãng-zãng tɩ d pa na n tol n yɩ d yembr ye.