D tall yẽesem koe-moonegã pʋgẽ wa a Zeezi

1. Bũmb a ye n kɩt t’a Zeova Kaset rãmbã yaa toor ne dũniyã nebã. Bõn-kãng yaa bõe?

BŨMB a ye sẽn kɩt t’a Zeova Kaset rãmbã yaa toor ne kiris-neb ne yʋʋrã, yaa b sẽn tar yẽesem koe-moonegã pʋgẽ wã. (Tɩt 2:14) La wakat ninga yaa toog tɩ d tall yẽesem. Tõe tɩ y mi n tagsda wa saam-biig a ye sẽn yaa kãsem-soab sẽn tʋmd wʋsgo. A yeelame: “Wakat ninga, m yam pʋd n pa be koɛɛgã mooneg ye.”

2. Bõe n mi n kɩt tɩ yaa toog tɩ d tall yẽesem koe-moonegã pʋgẽ?

² A Zeova tũudmã tʋʋm kẽer tõe n nooma tõnd n yɩɩd koɛɛgã moonego. Bõe yĩnga? Bala d sã n tʋmd tʋʋm kẽere, d nee b biisã zĩig pʋgẽ. Wala makre, d sã n sõng n me siglgã roog wall n ges a yelle, d sã n sõng d tẽed-n-taas sabab-wẽng sẽn paame, pa rẽ bɩ d sã n keng d tẽed-n-taas raoodo. D sã n naag d tẽed-n-taasã n tʋmdẽ, zems-n-taar la nonglem bee d sʋka. Sẽn paase, d miime tɩ b sũur nooma ne bũmb nins d sẽn maand n kõt-bã. La tõe tɩ d sɩng n moonda d koe-moonegã zĩigẽ na maan yʋʋm tɩ nebã kelgdẽ la b pa tũudẽ, wall b pʋd n pa kelgdẽ meng ye. D miime me tɩ saabã sẽn kolgdã neb wʋsg na n kisga koɛɛgã d sẽn moondã. (Mat. 10:22) Bõe n tõe n sõng-d tɩ d kell n tall d yẽesmã koɛɛgã mooneg pʋgẽ wall d paas-a menga?

3. Wãn to la Luk 13:6-9 wã wilgd t’a Zeezi ra tara yẽesem?

³ A Zeezi mak-sõngã tõe n sõng-d lame tɩ d bãng d sẽn tõe n maan to-to n paam yẽesem koɛɛgã mooneg pʋgẽ. A koe-moonegã sasa, a yẽesmã pa tol n boog ye. Sɩd-sɩda, a yẽesmã ra tara paasg bala. (Karm-y Luk 13:6-9.) A Zeezi maka a tʋʋmdã ne viyn koaad sẽn tʋm yʋʋm a tãab n ges kankang yelle, tɩ kankangã pa wom biis ye. Woto me, a Zeezi moona Zʋɩf-rãmbã yʋʋm a tãabo, la b wʋsgã pa kelg ye. Baasgo, a maana wa viyn koaadã sẽn da saagd tɩ kankangã na n woma biisã. A Zeezi pa bas koɛɛgã mooneg ye. A maneg n moon-b lame sẽn na yɩl t’a goamã kẽ-ba.

4. A Zeezi kõo mak-sõng bũmb a naas wɛɛngẽ. Bãmb la bʋse?

⁴ Sõs-kãngã pʋgẽ d na n yãa a Zeezi sẽn tall yẽesem to-to, sẽn yɩɩd fãa sẽn wa n ket kiuug a yoob t’a koe-moonegã sa wã. D sã n bao n bãng a Zeezi sẽn zãms nebã bũmb ningã la d rɩk a togs-n-taare, na n sõng-d-lame tɩ d kell n tall yẽesem rũndã-rũndã. Bɩ d ges a Zeezi sẽn kõ mak-sõng bũmb a naas wɛɛngẽ: 1) A Zeova raabã maaneg n da pak-a n yɩɩda. 2) A ra wʋmda Biiblã bãngr-goamã võor sõma. 3) A ra teega a Zeova t’a sõng-a, la 4) a ra kɩs sɩd tɩ neb n na n kelg-a.

A RA TAGSDA BŨMB NING A ZEOVA SẼN DATÃ YELLE

5. Bõe la a Zeezi maan tɩ wilg tɩ Wẽnnaam daabã n da pak-a n yɩɩda?

⁵ A Zeezi moona “Rĩungã koe-noogã” ne yẽesem, bala a ra miime tɩ rẽ la Wẽnnaam data. (Luk 4:43) Koɛɛgã mooneg n da tar yõod ne a Zeezi n yɩɩd bũmb fãa. Baa a koe-moonegã sẽn wa n kolg saabã, a ra “kẽngda tẽng-tẽnga, tẽn-bɛd la tẽn-bõonesẽ” n zãmsd nebã. (Luk 13:22) A zãmsa a karen-biis a taab me koɛɛgã moonego.—Luk 10:1.

6. Wãn to la koɛɛgã mooneg ne Wẽnnaam tʋʋm a taabã tũud taaba? (Ges-y fotã me.)

⁶ Rũndã-rũndã me, a Zeova ne a Zeezi ratame tɩ d moond koɛɛgã, bala rẽ n tar yõod n yɩɩda. (Mat. 24:14; 28:19, 20) Koɛɛgã mooneg ne Wẽnnaam tʋʋm a taabã tũuda taaba. Wala makre, d sẽn met siglgã rot wall d tʋmd Betɛllẽ wã yaa sẽn na yɩl n teel koɛɛgã moonego. D sẽn sõngd d tẽed-n-taas sabab-wẽns sẽn paamã pa d sẽn dat tɩ b paam bũmb nins sẽn yaa tɩlɛ ne-bã bal ye. D rat n sõng-b lame me tɩ b le tõog n tʋm tũudmã tʋʋmã, wala makre koɛɛgã moonego. D sã n sak n deeg tɩ koɛɛgã mooneg tara yõod wʋsgo, n tẽeg me tɩ yaa tʋʋmd ning a Zeova sẽn dat tɩ d tʋm n yɩɩdã, na n sõng-d lame tɩ d moond koɛɛgã wakat fãa. Saam-biig a ye yʋʋr sẽn yaa a Zanos n yaa kãsem-soab n be Hõngri yeelame: “M tẽegdame tɩ tʋʋmd kae Wẽnnaam tʋʋmã pʋgẽ n tõe n ledg koɛɛgã mooneg ye. Yẽ n yaa tʋʋmd ning sẽn tar yõod n yɩɩdã.”

7. Bõe yĩng t’a Zeova rat tɩ d ket n moondẽ? (1 Tɩmote 2:3, 4)

⁷ D sã n get nebã wa a Zeova sẽn get-b to-to wã, na n kɩtame tɩ d maneg n moon koɛɛgã ne yẽesem. A ratame tɩ neb wʋsg wʋm koe-noogã la b sak sɩdã. (Karm-y 1 Tɩmote 2:3, 4.) Rẽ n so t’a Zeova sõngd tõnd tɩ d paamd minim n moond koe-kãng sẽn fãagd yõyã. Wala makre, Nong-y nebã: Sõng-y-b tɩ b lebg a Zeezi karen-biisã borsiirã kõta sagls d sẽn tõe n sɩng sõsg ne ned to-to, n bao n bãng d sã n tõe n sõng-a lame t’a lebg a Zeezi karen-biiga. Baa neb kẽer sã n pa sak n na n tũ a Zeova rũndã-rũndã, b ket n tara weer n na n toeem hal n tãag to-kãsengã saabo. Yaa d sẽn yet-b bũmb ning rũndã-rũndã wã n tõe n wa kɩt tɩ b toeem yam. La yaa d sã n ket n moondẽ bal la rẽ tõe n wa yɩ.

A RA WƲMDA BIIBLÃ BÃNGR-GOAMÃ VÕOR SÕMA

8. Wãn to la a Zeezi sẽn da mi Biiblã bãngr-goamã sõng-a t’a pa sãam a sẽka?

⁸ A Zeezi ra mii Biiblã bãngr-goamã sẽn na n pids to-to. A ra miime t’a koe-moonegã na n kaoosa yʋʋm a tãab la pʋɩ-sʋk bala. (Dãn. 9:26, 27) A ra mii a sẽn na n ki wakat ninga la a kũumã sẽn na n yɩ to-to. (Luk 18:31-34) A Zeezi sẽn da mi bũmb ningã kɩtame t’a pa sãam a sẽkã ye. Rẽ n so t’a moon koɛɛgã ne yẽesem sẽn na yɩl n baas tʋʋmd ning b sẽn kõ-a wã.

9. Bõe yĩng tɩ Biiblã bãngr-goamã kɩt tɩ d moond ne yẽesem?

⁹ D sẽn wʋmd Biiblã bãngr-goamã võorã kɩtame tɩ d moond koɛɛgã ne yẽesem. D miime tɩ dũniyã saab kolgame. Biiblã pĩnd n togsa nebã manesem sẽn na n yɩ to-to yaoolem wakatã la yɛl nins sẽn na n maanã. D nee rẽ sẽn pidsd rũndã-rũndã. D neeme tɩ Gãrãnd Bertayn ne Etazĩni sẽn naag taab n yaa dũni gill pãn-soaadã ne Risi la a poorẽ dãmbã pidsda bãngr-gomd ning sẽn wilgd goabg rĩmã la rɩtg rĩmã manesem sẽn na n yɩ to-to “saabã wakatã.” (Dãn. 11:40) D miime me tɩ bõn-naandgã naoã b sẽn gom b yell Dãniyɛll 2:43-45 pʋgẽ wã makda Gãrãnd Bertayn ne Etazĩni sẽn naag taab n yaa dũni gill pãn-soaadã. D kɩsa sɩd tɩ ka la bilf bala, Wẽnnaam Rĩungã na n sãama ninsaalbã goosneema-rãmbã wa bãngr-goamã sẽn wilgã. Bãngr-gom-kãensã wilgdame tɩ yaa yaoolem wakatã la woto, tɩ kɩt tɩ d neẽ tɩ koɛɛgã mooneg sɩd lebga tʋʋm-yãgdem.

10. Bõe la Biiblã bãngr-goamã yet tɩ kɩt tɩ d rat n moon ne yẽesem?

¹⁰ Biiblã bãngr-goamã tara koɛɛg d sẽn dat n taas nebã ne d sũur fãa me. A Kaari sẽn yaa saam-bi-poak sẽn be Repiblik Dominikɛnnã yeelame: “M sã n tags bõn-sõma nins a Zeova sẽn pʋlem t’a na n maana ka la bilfã yelle, kɩtdame tɩ m dat n sõng neb a taabã tɩ b bãng sɩdã.” A paasame: “M sã n get nebã sẽn namsd to-to rũndã-rũndã wã, m neeme tɩ b sã n bãng Wẽnnaam pʋlem-noodã, na n kenga bãmb me raoodo.” Biiblã bãngr-goamã wilgdame t’a Zeova teenda tõnd koɛɛgã mooneg pʋgẽ, tɩ kɩt tɩ d rat n ket n moond ne yẽesem. A Leyila, sẽn be Hõngri wã yeelame: “Ezayi 11:6-9 goamã kɩtame tɩ m dat n taas nebã fãa koe-noogã, baa neb nins sẽn wõnd b pa na n sak n kelgã. M miime tɩ ned buud fãa tõe n toeema ne a Zeova sõngre.” A Kiristofɛɛr sẽn yaa saam-biig n be Zãmbi wã me yeelame: “Koe-noogã piuugda dũniyã gill zug wa Mark 13:10 sẽn yetã. M sẽn paam n sõngdẽ tɩ bãngr-gom-kãng pidsdẽ wã yaa zu-zẽkre.” Biiblã bãngr-gom-bʋs n kɩt tɩ y rat n kell n moon koɛɛgã?

A RA TEEGA A ZEOVA T’A SÕNG-A

11. Bõe yĩng tɩ ra yaa tɩlɛ t’a Zeezi teeg a Zeova n tõog n kell n moon ne yẽesem? (Luk 12:49, 53)

¹¹ A Zeezi teega a Zeova t’a sõng-a t’a kell n moon koɛɛgã ne yẽesem. A Zeezi ra gomda ne gũusgu, la a ra miime tɩ Rĩungã koe-noogã na n yika neb kẽer sũyã, la tɩ sãnda na n kisg-a-la wʋsgo. (Karm-y Luk 12:49, 53.) A Zeezi sẽn da moond koɛɛgã kɩtame tɩ tũudmã taoor dãmb mak naoor wʋsg n na n kʋ-a. (Zã 8:59; 10:31, 39) La a Zeezi kell n mooname, bala a ra miime t’a Zeova bee ne-a. A yeelame yaa: “Mam pa m yembr ye. Ba wã sẽn tʋm maamã bee ne maam. . . . A pa bas maam tɩ m yaa m yembr ye. Bala mam maanda bũmb nins sẽn noom-a wã wakat fãa.”—Zã 8:16, 29.

12. Bõe la a Zeezi yeel a karen-biisã tɩ sõng-b tɩ b kell n moon koɛɛgã baa ne namsgã?

¹² A Zeezi yeela a karen-biisã tɩ b tõe n teega a Zeova t’a sõng-ba. A yeel-b-la naoor wʋsg tɩ b bas b yam t’a Zeova na n sõng-b lame, baa b sã n wa namsd-b koe-moonegã yĩnga. (Mat. 10:18-20; Luk 12:11, 12) A sẽn da mi tɩ neb wʋsg na n namsa a karen-biisã kɩtame t’a sagl-b tɩ b yɩ gũus-m-mens rãmba. (Mat. 10:16; Luk 10:3) A paasame me tɩ ned sã n pa rat n kelg koe-noogã bɩ b ra modg-a ye. (Luk 10:10, 11) A yeel-b lame me tɩ b sã n wa namsd-b bɩ b zoe n looge. (Mat. 10:23) Baa ne a Zeezi sẽn da tar yẽesem la a teeg a Zeova wã, a ra pa ningd a vɩɩmã yell pʋgẽ zaalem yĩng ye.—Zã 11:53, 54.

13. Bõe yĩng tɩ y tõe n bas y yam t’a Zeova na n sõng-y lame?

¹³ D sã n dat n kell n moon koɛɛgã ne yẽesem baa ne namsgã, yaa tɩlɛ tɩ tõnd me paam a Zeova sõngre. (Vẽn. 12:17) Bõe n kɩt tɩ y tõe n bas y yam t’a Zeova na n sõng-y lame? Tẽeg-y-yã a Zeezi pʋʋsg ning sẽn be Zã sak 17 pʋgẽ wã yelle. A kosa a Zeova t’a gũ tẽn-tʋmdbã. A Zeova leoka a pʋʋsgã. Tʋʋm sebrã wilgda a Zeova sẽn sõng tẽn-tʋmdbã tɩ b moon koɛɛgã ne yẽesem to-to, baa ne b sẽn nams-bã. A Zeezi leb n kosa a Zeova t’a gũ neb nins sẽn na n tẽ tẽn-tʋmdbã goamã. Yãmb bee nin-kãens sʋka. A Zeova ket n leokda a Zeezi pʋʋsgã. A na n sõnga yãmb wa a sẽn sõng tẽn-tʋmdbã.—Zã 17:11, 15, 20.

14. Bõe yĩng tɩ d tõe n bas d yam tɩ d tõe n kell n moona koɛɛgã ne yẽesem? (Ges-y fotã me.)

¹⁴ Baa sẽn tõe n maneg n yɩ toog tɩ d kell n moon koɛɛgã ne yẽesem saabã sẽn kolgdã yĩnga, a Zeezi pʋlma tõnd tɩ d na n paama sõngre. (Luk 21:12-15) D maanda wa a Zeezi ne a karen-biisã. D taasda nebã koɛɛgã, n kõt ned kam fãa weer t’a yãk a sã n na n kelgame bɩ a pa na n kelge. D maanda d sẽn tõe fãa n gind no-koɛɛm me. Baa b sã n wa gɩdg d tũudmã tʋʋm kẽer tẽns sãnda pʋsẽ, d tẽed-n-taasã sẽn be be wã kelld n wɩngda ne koɛɛgã moonego, bala yaa a Zeova la b teeg-yã. Pa b mens ye. A Zeova kõta a nin-buiidã raood rũndã-rũndã wa a sẽn maan to-to pipi kiris-nebã wakatẽ wã, sẽn na yɩl tɩ b tõog n moon ‘koɛɛgã sõma’ wa a sẽn datã. (2 Tɩm. 4:17) Y tõe n basa y yam tɩ y sã n kell n teeg a Zeova y na n tõog n kell n moona koɛɛgã ne yẽesem.

A RA KƖSA SƖD TƖ NEB N NA N KELG-A

15. Bõe n wilgd t’a Zeezi ra kɩsa sɩd tɩ neb n na n kelg koe-noogã?

¹⁵ A Zeezi ra kɩsa sɩd tɩ neb kẽer n na n kelg a koe-noogã. Rẽ sõng-a lame t’a kell n moon koɛɛgã ne yẽesem. Wala makre yʋʋmd 30 soabã baasgẽ, a Zeezi yãame tɩ neb wʋsg rat n kelga koɛɛgã. A mak-b-la ne pʋʋg sẽn pelg n ta tigsgu. (Zã 4:35) Na maan yʋʋmd poore, a yeela a karen-biisã yaa: “Tigsgã yaa wʋsgo.” (Mat. 9:37, 38) A le wa n yeelame yaa: “Tigsgã yaa wʋsgo . . . Bɩ y bõos tigsgã Soab t’a tʋm tʋm-tʋmdb tɩ b kẽng a tigsgẽ wã.” (Luk 10:2) A Zeezi kell n kɩsa sɩd tɩ neb n na n kelg koe-noogã. B sẽn wa n kelgã me, a sũur yɩɩ noogo.—Luk 10:21.

16. Wãn to la a Zeezi yel-bũn a yiibã sõng a karen-biisã tɩ b bãng tɩ koe-moonegã womda biisi? (Luk 13:18-21) (Ges-y fotã me.)

¹⁶ A Zeezi wilga a karen-biisã tɩ b segd n ninga b yamẽ tɩ koɛɛgã mooneg womda biisi, tɩ rẽ sõng-b tɩ b kell n moon ne yẽesem. D gom yel-bũn a yiib a Zeezi sẽn wẽ yelle. (Karm-y Luk 13:18-21.) A Zeezi tũnuga ne mutard bil yel-bũndã n na n wilg tɩ Rĩungã koɛɛgã na n piuuga wʋsgo, la tɩ ned pa tõe n gɩdg-a ye. A leb n maka Rĩungã koɛɛgã ne rabɩlle, n na n wilg t’a na n piuuga zĩig zãnga, la t’a na n kɩtame tɩ neb wʋsg toeeme, tɩ kẽer nengẽ nebã pa na n yã toeengã zĩig pʋgẽ ye. Woto, a Zeezi sõnga a karen-biisã tɩ b bãng tɩ koɛɛg ning b sẽn moondã na n woma biisi.

17. Bõe n kɩt tɩ d segd n kell n moond koɛɛgã ne yẽesem?

¹⁷ D sã n tagsd koe-noogã sẽn womd biis nins dũniyã gill zugã yelle, kɩtdame tɩ d kell n moond ne yẽesem. Yʋʋmd fãa, neb milyõ-rãmb n wat n naagd tõnd n maand a Zeezi kũumã tẽegre, la b sakd n zãmsd Biiblã. Neb tusa n deegd lisgu, n naagd tõnd n moond koɛɛgã. D pa mi neb nins sẽn na n sak sɩdã sõor ye. La d miime t’a Zeova tigsda kʋʋn-kãseng sẽn na n põs to-kãsengã sasa. (Vẽn. 7:9, 14) Tigsgã soab ket n neeme tɩ neb wʋsg tõe n sak n toeemame. Rẽnd bʋʋm bee sẽn sek d na ket n moond koɛɛgã.

18. Bõe la d rat tɩ nebã yã tõnd wɛɛngẽ?

¹⁸ Hal pĩnd n tãag masa, nebã miime t’a Zeezi karen-biis hakɩɩkã moonda koɛɛgã ne yẽesem. Nebã sẽn yã tẽn-tʋmdbã sẽn gomd ne raoodã, ‘b bãngame tɩ b ra bee ne a Zeezi.’ (Tʋʋ. 4:13) Tõnd me ratame tɩ nebã sã n get d sẽn moond koɛɛgã ne yẽesmã bɩ b bãng tɩ d rɩkda a Zeezi togs-n-taare.