Kell-y n kẽn-y ne tẽebo

1. Tẽn-tʋmd a Poll sã n da tags a vɩɩmã sẽn yɩ to-to wã yelle, bõe yĩng t’a sũur da tõe n yɩ noog ne a menga?

TẼN-TƲMD A POLL wa n bãngame tɩ pa na n kaoos la b kʋ-a ye. La a sã n da lebg n tags a vɩɩmã sẽn yɩ to-to wã yelle, a sũur nooma ne a menga. A yeelame yaa: “Mam zoee zoeesã n tãag a tɛka, mam kell n talla tẽebo.” (2 Tɩm. 4:6-8) A Poll yãka yam n kẽes a meng zãng a Zeova tʋʋmdã pʋgẽ, n kɩs sɩd t’a sũur nooma ne-a. Tõnd me ratame tɩ d yam-yãkr toor-toorã yɩ sõma, tɩ d paam n ta Wẽnnaam yam. Wãn to la d tõe n maan dẽ?

2. Kẽnd ne tẽeb rat n yeelame tɩ bõe?

² A Poll goma yẽ mengã ne kiris-neb a taabã yell n yeel yaa: “Tõnd kẽnda ne tẽebo, la d pa get bũmb nins nin sẽn ne wã n kẽnd ye.” (2 Kor. 5:7) A Poll gomdã võor yaa bõe? Biiblã pʋgẽ, b sã n yeel tɩ ned “kẽndame,” wakat ninga yaa a sẽn vɩ to-to wã yell la b gomda. Ned sẽn get bũmb nins nin sẽn ne wã n kẽnd tikda a sẽn tõe n yã, n wʋm la a sɩɩsã bal n yãkd yam. La ned sã n kẽnd ne tẽebo, a wilgda a yam-yãkr toor-toorã pʋgẽ t’a teeg a Zeova. A tʋʋm-tʋmdɩ wã wilgdame t’a kɩsa sɩd tɩ Wẽnnaam na n keo-a lame, la t’a sã n tũ a Zeova saglsã sẽn be Biiblã pʋgẽ wã, na n naf-a lame.—Yɩɩn. 119:66; Ebre. 11:6.

3. D sã n kẽnd ne tẽebo, wãn to la nafd tõndo? (2 Korẽnt rãmbã 4:18)

³ Yaa sɩd tɩ d fãa mi n tika bũmb nins d sẽn tõe n yã, n wʋm la d sɩɩsã n yãk yam. La sã n yaa rẽ bal la d tikd n yãkd yam bũmb nins sẽn tar yõodã wɛɛngẽ, yaa vẽeneg tɩ d pa tõe n pa paam zu-loees ye. Bõe yĩnga? Yaa tɩ pa wakat fãa la d tõe n teeg bũmb nins d sẽn ne la d wʋmdẽ wã ye. D sã n tikd bũmb nins d sẽn tõe n yã, n wʋm la d sɩɩsã bal n yãkd yam, d tõe n wa maana bũmb sẽn pa zems ne Wẽnnaam daabã la a noyã. (Koɛ. 11:9; Mat. 24:37-39) La d sã n kẽnd ne tẽebo, na n sõng-d lame tɩ d yam-yãkr toor-toorã “tat Zu-soabã yam.” (Efɛɛ. 5:10) D sã n tũud Wẽnnaam saglsã, d na n paama sũur pʋgẽ bãan la sũ-noog hakɩɩka. (Yɩɩn. 16:8, 9; Eza. 48:17, 18) Sẽn paase, d sã n kell n kẽn ne tẽebo, d na n wa paama vɩɩm sẽn ka sɛtã.—Karm-y 2 Korẽnt rãmb 4:18.

4. Bõe n tõe n sõng ned t’a bãng a sã n kẽnda ne tẽeb bɩ a geta bũmb nins nin sẽn ne wã n kẽnda?

⁴ Bõe n tõe n sõng-d tɩ d bãng d sã n kẽnda ne tẽeb bɩ d geta bũmb nins nin sẽn ne wã n kẽnda? D tõe n soka d meng yaa: Bõe la m tikd n yãkd yam? Yaa bũmb nins m ninã sẽn tõe n yã wã bal bɩ, bɩ m yam-yãkr toor-toorã wilgdame tɩ m teega a Zeova, la tɩ m tũuda a noyã? D na n yãa d sẽn tõe n wilg to-to tɩ d kẽnda ne tẽeb bũmb a tãab sẽn tar yõod wɛɛngẽ: Yaa tʋʋmã baoobo, pag bɩ sɩd baoobo, la d manesem sẽn yaa to-to ne sagls nins a Zeova siglgã sẽn kõtã. D na n yãa bũmb nins sẽn tõe n sõngd-d tɩ d bãngd n yãkd yam bõn-kãens wɛɛngẽ.

TƲƲMÃ BAOOB WƐƐNGẼ

5. Nand tɩ d sak tʋʋmd b sẽn pʋlem-do, bõe yell la d segd n tagse?

⁵ D fãa raab yaa tõog n ges d meng la d zakã rãmb yelle. (Koɛ. 7:12; 1 Tɩm. 5:8) Tʋʋm kẽer kiuug yaood yaa wʋsgo. Seka f rɩ la f kell n bĩngi. La tʋʋm sãnda nengẽ yɩl n paam tɩ sek meng pa nana ye. B sã n pʋlem-d tʋʋmde, nand tɩ d sake d na n bao n bãnga ligd ning b sẽn na n yaood tõndã. La ned sẽn get bũmb nins nin sẽn ne wã bal n kẽnd na n tagsa ligdã yell bala.

6. Tʋʋmã baoob wɛɛngẽ, wãn to la d tõe n wilg tɩ d kẽnda ne tẽebo? (Ebre-rãmbã 13:5)

⁶ D sã n kẽnd ne tẽebo, d na n bao n bãnga tʋʋmdã sã n pa na n sãama tõnd ne a Zeova zoodã. D tõe n soka d meng yaa: ‘Tʋʋmdã na n kɩtame tɩ m maan bũmb a Zeova sẽn kis bɩ?’ (Yel. 6:16-19) ‘Na n kɩtame tɩ m pa le tõe n tʋm tũudmã tʋʋm sõma, pa rẽ bɩ kɩt tɩ m loog n bas m zakã rãmb n tɩ kaoos bɩ?’ (Fili. 1:10) Sã n mik tɩ yaa woto, yɩta sõma tɩ d zãgs tʋʋmdã, baa tʋʋm paoong sã n yaa toog tõnd sẽn beẽ wã. D sẽn kẽnd ne tẽebã yĩnga, d yam-yãkr toor-toorã wilgdame tɩ d kɩsa sɩd t’a Zeova na n gesa d yelle.—Mat. 6:33; karm-y Ebre-rãmb 13:5.

7-8. Bõe la Amerikdisiid saam-biig a ye maan n wilg t’a kẽnda ne tẽebo? (Ges-y fotã me.)

⁷ Amerikdisiid saam-biig yʋʋr sẽn boond t’a Zaviyea wilgame tɩ tara yõod tɩ d kẽnd ne tẽebo. A yeelame: “M da gʋlsa demand n na n bao tʋʋmd sẽn yaa sõma wʋsgo. Tʋʋm-kãng yaoodã ra taa tʋʋmd ning mam sẽn da tʋmdã yaood naoor a yi. Leb n da yaa tʋʋmd sẽn noom maam wʋsgo.” La a Zaviye ra rata ne a sũur fãa n lebg wakat fãa so-pakda. A paasame yaa: “B wa n bool-a maam tɩ m na n sõs ne tʋʋmdã taoor soaba. Nand tɩ m kẽnge, m pʋʋsa a Zeova n kos sõngre, n kɩs sɩd t’a mii sẽn yaa sõma ne maam n yɩɩdã. M sɩd ra rata tʋʋmdã, la m da pa rat t’a gɩdg-m tɩ m pa tõog n tʋm a Zeova tʋʋmdã n paas ye.”

⁸ A Zaviye yeelame: “M sẽn wa n sõsd ne tʋʋmdã taoor soabã, a yeelame tɩ na n yɩɩ tɩlɛ tɩ m mi n tʋmd n yõsgd sigbã wakate. M maaga m yĩng n wilg-a tɩ m tũudmã tʋʋm yĩnga, m pa na n tõog n maan woto ye.” Woto, a Zaviye zãgsa tʋʋmdã. Semen a yiib poore, a lebga so-pakda. Yʋʋm-kãng me a paama tʋʋmd sẽn pa rɩt a sẽkã wʋsg ye. A yeelame: “A Zeova leoka m pʋʋsgã n sõng-m tɩ m paam tʋʋmd sẽn zems ne so-pakda. M sũur yaa noog m sẽn paam tʋʋmd sẽn kõt-m weer tɩ m tõe n tʋm a Zeova ne m tẽed-n-taasã yĩng wʋsgã.”

9. Yam-bʋg la y tõe n dɩk a Terzoor kibarã pʋgẽ?

⁹ La sã n mik tɩ tʋʋmd ning d sẽn tʋmd rũndã-rũndã wã kɩtame tɩ yaa toog ne-d tɩ d kẽnd ne tẽebo, d maanda wãna? D gom saam-biig a Terzoor sẽn be Kõngo wã yelle. A yeelame: “Tʋʋmd ning m sẽn paamã yaa tʋʋmd m sẽn da sɩng n dat ne m sũur fãa. Yaoodã ra taa m pĩnd tʋʋmdã yaood naoor a tãabo, tɩ nebã ra waoogd-m wʋsg me.” La a Terzoor sẽn da tʋmd n yõsgd sigbã wakatã kɩtame t’a ra vaand tigissã. Sẽn paase, a tʋmd-n-taasã mi n pẽdgd-a lame n dat t’a sõng-b tɩ b tʋm pʋ-lik tʋʋma. A Terzoor da rat n basa tʋʋmdã, la a ra yɛɛsda a na wa n bas n pa paam tʋʋmd a to ye. Bõe n sõng-a? A yeelame: “Habakuk 3:17-19 goamã sõnga maam tɩ m bãng tɩ baa m sã n bas m tʋʋmdã n pa le tar ligdi, a Zeova na n gesa m yelle. Rẽ n so tɩ m bas tʋʋmdã.” A paasame: “Tʋʋm taoor dãmb wʋsg tagsdame tɩ tʋʋm-sõng yĩnga ned na n sak n basa bũmb fãa, baa sã n na n kɩtame t’a pa le tar sẽk n be ne a zakã rãmba, wall kɩt t’a bas tũudmã yɛla. M sũur yaa noog m sẽn tõog tɩ maam ne a Zeova zoodã ket n tar pãnga, tɩ maam ne m zakã rãmb me moor noomẽ wã. Yʋʋmd poore, a Zeova sõng-m lame tɩ m paam tʋʋmd t’a yaoodã sek m na ges m zakã yelle, la kõt-m weer tɩ m tõe n tʋm tũudmã tʋʋm n paase. D sã n lʋɩɩs a Zeova raabã taoore, ligd tõe n mi n paoog-d lame. La a Zeova na n gesa d yelle.” D sã n kɩs sɩd t’a Zeova saglsã yaa tõnd neer yĩnga, la t’a pʋlemsã na n pidsame, d na n kell n kẽna ne tẽebo, t’a ningd-d barka.

PAG BƖ SƖD BAOOBÃ WƐƐNGẼ

10. D sã n wa baood n na n bãng d sã n na n kẽe kãadem ne neda bõe la d tõe n gese, la d segd n gũusa ne bõe?

¹⁰ Kãadmã yaa a Zeova kũuni. Ned sã n dat n kẽ kãadem, pa wẽng ye. Saam-bi-poak sã n wa baood n na n bãng a sã n na n kẽe kãadem ne saam-biiga, a na n gesa a sã n yaa rasãnga, a sã n tara zʋg-sõma, a sã n tara yʋ-noogo, a sã n mii ligd zãabo, a sã n segd n gesa a zakã neb kẽer yelle, la a sã n kɩtdame tɩ yẽ sũur yaa noogo.b Bõn-kãens tara yõod wʋsgo. La sã n yaa bõn-kãens yell bal n pak-a, tõe t’a geta bũmb nins nin sẽn ne wã n kẽnda.

11. Pag bɩ sɩd baoobã wɛɛngẽ, wãn to la d tõe n wilg tɩ d kẽnda ne tẽebo? (1 Korẽnt rãmbã 7:39)

¹¹ A Zeova sã n get d saam-biis la d saam-bi-pogs sẽn tũud a noyã b sã n wa baood pag bɩ sɩdã, a sũur nooma wʋsgo. Wala makre, b tũuda saglg ning sẽn yet tɩ b gũ hal n wa “n pa le yaa yãag” n yaool n sɩng ned baoobã. (1 Kor. 7:36) Yaa zʋg-sõma nins a Zeova sẽn wilg tɩ pʋg-sõng wall sɩd-sõng segd n tallame wã bal la b tikd n sɩng ned baoobo. (Yel. 31:10-13, 26-28; Efɛɛ. 5:33; 1 Tɩm. 5:8) Ned sẽn pa a Zeova Kaset soab sã n wa rood-ba, b zãgsdame. B tũuda naoor ning sẽn be 1 Korẽnt rãmb 7:39 n yetẽ tɩ d segd n kẽe kãadem “Zu-soabã pʋgẽ balã.” (Karm-y-yã.) B ket n kẽnda ne tẽebo, n kɩs sɩd t’a Zeova n tõe n sõng-b tɩ b paam sũ-noog n yɩɩd ned buud fãa.—Yɩɩn. 55:22.

12. Yam-bʋg la d tõe n dɩk a Rooza kibarã pʋgẽ?

¹² A Rooza yaa so-pakd n be Kolõmbi. A tʋmd-n-taag a ye sẽn pa a Zeova Kaset soab n wa n sɩng a roobo. A Rooza yam ra kẽ-a lame. A yeelame: “M da getame t’a tara zʋg-sõma. A ra nong n sõngda a sakã neb la a zãad a meng sõma. M sũur da nooma ne a manesem sẽn yaa to-to ne-ma. A ra tara zʋg-sõma nins fãa m sẽn dat rao nengẽ wã, sã n zʋʋg a sẽn pa a Zeova Kaset soabã bala.” A paasame: “Ra yaa toog ne-m tɩ m togs-a tɩ m pa na n sake, bala m yamã ra kẽ-a lame. Rẽ tɩ m sẽn da yaa m ye wã ra namsd-m lame tɩ m dat n kẽ kãadem, la m da pa paamd ned sɩdã pʋgẽ ye.” La a Rooza pa ges nin sẽn ne wã bal ye. A bãngame t’a sã n sak a tʋmd-n-taagã, na n sãama yẽ ne a Zeova zoodã. Rẽ n so t’a lak a meng fasɩ ne raoã, la a wɩng ne tũudmã tʋʋmã. Rẽ poor bilfu, b bool-a-la Rĩungã Koe-moondb lekolle. Rũndã-rũndã a yaa zall so-pakda. A Rooza yeelame: “A Zeova kɩtame tɩ m sũur yaa noog wʋsgo.” Yaa sɩd tɩ bũmb nins d sẽn nongã wɛɛngẽ, yɩl n kẽn ne tẽeb tõe n yɩɩ toogo. La d sã n maan dẽ, nafda wakat fãa.

SAGLS NINS A ZEOVA SIGLGÃ SẼN KÕT-DÃ WƐƐNGẼ

13. B sã n wa tik Biiblã n kõ-d saglga, bõe n tõe n kɩt tɩ d get bũmb nins nin sẽn ne wã n kẽnda?

¹³ D wae n paamda sagls sẽn yit kãsem-dãmbã nengẽ, tigims sull yel-gɛtbã, filiyallã taoor lʋɩtbã wall siglgã taoor lʋɩtb Sull nengẽ. Sagl-kãens yaa sẽn na n sõng-d tɩ d tũ a Zeova sõma. La wakat ninga, d pa wʋmd bũmb ning sẽn kɩt tɩ b kõ saglgã võor ye. D tõe n geta saglgã tũub sẽn na n yɩ toog ne-dã bala. D tõeeme meng n get saam-biis nins sẽn kõ saglgã pãn-komsmã.

14. B sã n wa tik Biiblã n kõ-d saglga, bõe n na n sõng-d tɩ d sak n tũ? (Ebre-rãmbã 13:17)

¹⁴ D sã n kẽnd ne tẽebo, d kɩsa sɩd tɩ yaa a Zeova n wilgd a siglgã sore, la t’a mii d yɛlã sẽn yaa to-to. Rẽ kɩtame tɩ d yɩt tao-tao n tũud saglsã ne yam-sõngo. (Karm-y Ebre-rãmb 13:17.) D miime tɩ d sã n yaa sakdba, sõngdame tɩ zems-n-taar be tigingã pʋgẽ. (Efɛɛ. 4:2, 3) D kɩsa sɩd tɩ baa saam-biis nins sẽn lʋɩt taoorã sẽn pa zems zãngã, d sã n sakd-ba a Zeova ningd-d-la barka. (1 Sãm. 15:22) D kɩsa sɩd me tɩ bũmb sã n dat toeengo, a Zeova na n wa kɩtame tɩ b toeeme.—Mis. 7:7.

15-16. Bõe n sõng saam-biig a ye t’a kẽn ne tẽebo, baa ne a sẽn da maand sãmbs ne noy siglgã sẽn kõ wã? (Ges-y fotã me.)

¹⁵ Ad kibar sẽn wilgd tɩ d sã n kẽnd ne tẽebo, nafdame. Peru tẽngẽ wã, neb wʋsg gomda Ɛspayõlle. Baa ne rẽ buud-goam a taab n be. Wala makre, Kesuwa buud-gomdã. Yʋʋm wʋsg pʋgẽ, saam-biis la saam-bi-pogs nins sẽn gomd Kesuwa buud-gomdã ra gẽesda neb nins sẽn gomd buud-gom-kãng b moonegã zĩigẽ. La siglgã wa n yeelame tɩ b toeem b sẽn maand to-to wã tɩ zems ne noy nins goosneema wã sẽn gãnegã. (Rom. 13:1) Rẽ kɩtame tɩ kẽer da sãmbd b sã n na n tõogd n moonda koɛɛgã sõma. La saam-biisã sẽn sak n toeemã, a Zeova ningd-b-la bark n sõngd-b tɩ b paamd neb wʋsg sẽn gomd Kesuwa buud-gomdã.

¹⁶ A Kevin sẽn yaa kãsem-soab n be Kesuwa buud-gomdã tiging pʋgẽ wã me ra maanda sãmbse. A yeelame: “M da sokda m meng yaa: ‘Wãn to la d na n maan n paam neb sẽn gomd buud-gomdã masã?’” Bõe la a Kevin maan-yã? A yeelame: “M tẽega Yel-bũn 3:5 sẽn yet bũmb ningã yelle, la m tags a Moyiiz me yelle. A ra segd n talla Israyɛll nebã n yi Ezɩpti, tɩ sor ning b sẽn segd n tũ wã ra wõnd na n kɩtame tɩ Ezɩpt nebã paam-b nana-nana. Baa ne rẽ a Moyiiz tũ a Zeova noorã t’a ning-a barka. A maana yel-solemd n fãag-ba.” (Yik. 14:1, 2, 9-11, 21, 22) A Kevin sak n toeema a sẽn da moond to-to wã. Woma biis bɩ? A yeelame yaa: “A Zeova sẽn ning tõnd bark to-to wã ling-m lame. Pĩndã d ra segd n kẽname n kaoos n yaool n yã nin-yend bɩ neb a yiib sẽn gomd Kesuwa buud-gomdã. Masã yaa zĩis nins neb wʋsg sẽn gomd Kesuwa buud-gomdã la d nong n moondẽ. Rẽ kɩtame tɩ d paamd neb wʋsg n sõsd ne, n maand lebg-n-tɩ-ges rãmb la d zãmsd neb wʋsg Biiblã. Sẽn wat-b tigissã sõor me paasame.” Vẽenega, d sã n kẽnd ne tẽebo, a Zeova ningd-d-la bark wakat fãa.

17. Bõe la y bãng sõs-kãngã pʋgẽ?

¹⁷ D yãa d sẽn tõe n kell n kẽn ne tẽeb to-to bũmb a tãab wɛɛngẽ. La d segd n ket n kẽnda ne tẽeb d vɩɩmã nens fãa pʋsẽ. Wala makre, reemã la pemsmã kokr wɛɛngẽ, la d sã n wa rat n yãk yam karengã la kambã wubr wɛɛngẽ. Sẽn wa n yaa bũmb ning wɛɛngẽ la d rat n yãk yam, d pa segd n tik bũmb nins nin sẽn ne wã bal ye. D segd n tagsa tõnd ne a Zeova zoodã yelle, a saglsã la a sẽn pʋlem t’a na n gesa d yellã yelle. D sã n maan woto, d na n tõog n “kẽna ne d Wẽnnaam a Zeova yʋʋr wakat sẽn kõn sa yĩnga.”—Mis. 4:5.