A Zeova yʋʋrã sẽn da tar yõod wʋsg ne a Zeezi wã võore

1-2. a) Bõe la a Zeezi maan a yõkrã yʋngo? b) Sogs-bʋs la d na n leok sõs-kãngã pʋgẽ?

MAMS-Y bũmb ning sẽn maan yʋʋmd 33 Nizã kiuug rasem 14 daarã sẽn yɩ lamusã yʋngã. Ra pa na n kaoos la b zãmb a Zeezi, n bʋ-a n ning-a taale, n nams-a la b kʋ-a ye. Rẽ t’a bee yĩngr doog a ye pʋgẽ ne a tẽn-tʋmdb nins sẽn kell n maan sɩd ne-a wã. B sẽn dɩ rɩɩb sẽn yaa zall poore, a Zeezi taasa a tẽn-tʋmdbã a yaoolem goam n keng b raoodo. Bilf nand tɩ b yi roogẽ wã, a Zeezi pʋʋsa a Ba wã n togs gom sẽn tar pãnga. Tẽn-tʋmd a Zã gʋlsa pʋʋs-kãng goamã tɩ be Zã sak 17 wã pʋgẽ.

² A Zeezi sẽn pʋʋs to-to wã wilgdame tɩ bõe n da pak-a wakat kãng n yɩɩda? A pʋʋsgã wilgdame t’a sẽn wa n be tẽngã zug n moond koɛɛgã, bõe n da tar yõod ne-a n yɩɩda? D na n baoo sogs-kãens leoore.

“MAM KƖTAME TƖ B BÃNG FO YƲƲRÔ

3. Bõe la a Zeezi yeel a Zeova yʋʋrã wɛɛngẽ, la a gomdã võor yaa bõe? (Zã 17:6, 26)

³ A Zeezi sẽn wa n pʋʋsdẽ wã a yeelame yaa: “Mam kɩtame tɩ b bãng fo yʋʋrã.” Sɩd-sɩda, yaa naoor a yiib la a yeel t’a kɩtame t’a karen-biisã bãng a Zeova yʋʋrã. (Karm-y Zã 17:6, 26.) Woto rat n yeelame tɩ bõe? Rat n yeelame t’a wilg-b-la yʋʋr b sẽn da pa mi bɩ? A Zeezi karen-biisã ra yaa Zʋɩf-rãmba. Yaa vẽeneg tɩ b ra zoe n miime tɩ Wẽnnaam yʋʋr la a Zeova. Yʋ-kãng bee Biiblã babg ning b sẽn da gʋls ne Ebre wã pʋgẽ naoor tusa. Rẽnd pa Wẽnnaam yʋ-peellã yell la a Zeezi ra gomd ye. Yaa a Zeova sẽn yaa Wẽnnaam ning buudã la a Zeezi kɩt tɩ b bãnge. A sõng-b lame tɩ b bãng a Zeova sõma n paase. Wala makre, a raabã sẽn yaa a soab ne ninsaalbã la tẽngã, a sẽn maan la a sẽn nan na n maane, la a zʋg-sõma wã. Yaa a Zeezi bal n mi a Zeova sõma woto.

4-5. a) Rɩk-y makr n wilg d sẽn tõe n bãng ned n paas to-to. b) Bõe n sõng a Zeezi karen-biisã tɩ b bãng a Zeova n paase?

⁴ Mams-y wa yãmb tigingã kãsem-soab a ye sẽn na n yaa logtore, t’a yʋʋr boondẽ t’a Davɩɩde. Yãmb sɩng n mi-a-la hal sẽn kaoose. La daar a ye, bãag n tiig n yõk-y hal tɩ pa nana ye. B tall-y-la tao-tao n kẽng logtor yir ning pʋgẽ kãsem-soabã sẽn tʋmdã, t’a tõog n fãag y yõorã. Y na n maneg n nong-a lame n yɩɩd pĩndã, tɩ y sã n wʋm a yʋʋrã bɩ y tagsd a sẽn maan bũmb ning n sõng-yã yelle. Y pa le get a Davɩɩd wa kãsem-soab bal ye. Y getame t’a yaa logtor sẽn fãag y yõor me.

⁵ Woto me, a Zeezi karen-biisã ra zoe n mii a Zeova yʋʋrã. La a Zeezi koe-moonegã kɩtame tɩ b maneg n bãng a Zeova n paase. Bõe n kɩt tɩ d tõe n yeel woto? Bala a Zeezi rɩka a Ba wã togs-n-taar bũmb nins fãa a sẽn yeel la a maanã pʋgẽ. Rẽnd a Zeezi tẽn-tʋmdbã sẽn da kelgd a sẽn zãmsd nebã la b get a manesem sẽn yaa to-to ne nebã kɩtame tɩ b “bãng” a Zeova n paase.—Zã 14:9; 17:3.

“FO MENG YƲƲRà F SẼN KÕ MAAMÔ

6. A Zeezi sẽn yeel t’a Zeova kõo yẽ a yʋʋrã rat n yeelame tɩ bõe? (Zã 17:11, 12)

⁶ A Zeezi sẽn wa n pʋʋsd a karen-biisã yĩngã a yeelame yaa: “Gũ bãmb fo meng yʋʋrã f sẽn kõ maamã yĩnga.” (Karm-y Zã 17:11, 12.) Woto rat n yeelame tɩ b na n boonda a Zeezi masã t’a Zeova bɩ? Ayo. Tẽeg-y t’a Zeezi sẽn wa n pʋʋsdẽ wã a goma a Zeova yʋʋrã yell n yeel tɩ “fo meng yʋʋrã.” Rẽnd a Zeova yʋʋrã pa lebg a Zeezi yʋ-peell ye. Woto wã, a Zeezi sẽn yeel tɩ Wẽnnaam kõo yẽ a yʋʋrã rat n yeelame tɩ bõe? Pipi, a Zeezi ra gomda a Zeova yʋʋr yĩnga, n yaa a koe-taasd me. A waa a Ba wã yʋʋr yĩnga, n maan yel-soalem ne a Ba wã yʋʋre. (Zã 5:43; 10:25) Sẽn paase a Zeezi yʋʋrã võor yaa: “A Zeova yaa Fãagre.” Rẽnd Wẽnnaam yʋʋrã naaga a Zeezi yʋʋrã pʋgẽ.

7. Rɩk-y makr n wilg d sẽn tõe n yeel t’a Zeezi ra gomda a Zeova yʋʋr yĩngã võore.

⁷ Sẽn na yɩl n sõng-d tɩ d wʋm d sẽn tõe n yeel t’a Zeezi ra gomda a Zeova yʋʋr yĩngã võore, d rɩk makre. Rĩm tõe n tʋma ned t’a tɩ gom ne neb a taabã yẽ yʋʋr yĩnga. A soabã sã n wa gomda, yaa wa rĩmã meng n gomd a toore. Woto me a Zeezi ra gomda a Zeova yʋʋr yĩnga, bala yaa a Zeova n tʋm-a.—Mat. 21:9; Luk 13:35.

8. Nand t’a Zeezi wa tẽngã zugu, wãn to la a ra zãad a Zeova yʋʋrã? (Yikri 23:20, 21)

⁸ A Zeezi sẽn yaa Gomdã yĩnga, a ra yaa a Zeova koe-taasda, n da taasd malɛgsã la ninsaalbã koees la noya. (Zã 1:1-3) Tõe tɩ yaa a Zeezi la malɛk ning a Zeova sẽn tʋm t’a ges Israyɛll nebã yell b sẽn wa n yi Ezɩpt n dabd kãabg tẽngẽ wã. A Zeova wilga Israyɛll nebã b sẽn segd n kelg malɛg-kãngã võore, n yeel yaa: “[Yaa] a sẽn zãad mam yʋʋrã yĩnga.”a (Karm-y Yikr 23:20, 21.) A Zeova yeela woto bala a Zeezi gomda a yʋʋr yĩnga, n leb n yaa soab ning sẽn waoogd a yʋʋrã n yɩɩd ned buud fãa wã.

“M BA, WAOOG-Y Y YƲƲRÔ

9. Bõe n wilgd t’a Zeova yʋʋrã ra tara yõod wʋsg ne a Zeezi?

⁹ Nand meng t’a Zeezi wa tẽngã zugu, a Zeova yʋʋrã ra tara yõod wʋsg a nifẽ wa d sẽn yã tɩ loogã. A sẽn wa n be tẽngã zugã me, a wilga bũmb nins fãa a sẽn maanã pʋgẽ t’a Zeova yʋʋrã tara yõod wʋsg a nifẽ. A Zeezi koe-moonegã sẽn wa n kolgd saabã, daar a ye a zẽka a koɛɛg n yeel yaa: “M Ba, waoog-y y yʋʋrã.” Zĩig pʋgẽ a Zeova koɛɛgã yii saasẽ n yeele: “Mam waoog-a lame, la m na n le waoog-a lame yɛsa.”—Zã 12:28.

10-11. a) Bõe la a Zeezi maan n waoog a Zeova yʋʋrã? (Ges-y fotã me.) b) Bõe yĩng tɩ d segd n kɩt t’a Zeova yʋʋrã paam waoogre, la d wilg t’a sẽn maand fãa yaa tɩrga?

¹⁰ A Zeezi me waooga a Ba wã yʋʋre. Wãn to la a maan dẽ? Bũmb a ye yaa t’a sõnga neb a taabã tɩ b bãng a Ba wã zʋg-sõma wã la bũmb nins a sẽn maanã. La a maana bũmb a to me. A Zeezi ra segd n wilgame t’a Zeova sẽn maand fãa yaa tɩrga, la t’a yʋʋrã yaa sõngo. A sẽn wa n na n zãms a karen-biisã pʋʋsgã, a wilgame tɩ rẽ tara yõod wʋsgo. A yeelame: “Tõnd Ba sẽn be saasẽ, bɩ yãmb yʋʋr paam waoogre.”—Mat. 6:9.

¹¹ Bõe yĩng tɩ d segd n kɩt t’a Zeova yʋʋrã paam waoogre, la d wilg t’a sẽn maand fãa yaa tɩrga? Yaa tɩ Edɛn zẽeda zĩigẽ, a Sʋɩtãan yaga ziri n sãam Wẽnnaam a Zeova yʋʋrã. A Sʋɩtãan yeelame t’a Zeova yaa pʋ-yagda, la t’a mongda a Ãdem ne a Awa bõn-sõma. (Sɩng. 3:1-5) A sẽn yeel woto wã, yaa wa a sẽn yeel t’a Zeova pa maand sẽn yaa tɩrg ye. A Sʋɩtãan sẽn yag ziri woto wã, a sãama a Zeova yʋʋrã. A Zoob wakatẽ wã me, a yeelame tɩ neb nins sẽn tũud a Zeova wã maanda woto, rẽ sẽn nafd-bã yĩng bala. A Sʋɩtãan sẽn yaa pʋ-yagdã yeelame me tɩ ned kae n nong a Zeova tɩ sek a na n kell n sak-a a sã n wa tar zu-loees ye. (Zoob 1:9-11; 2:4) Ra segd n kaoosame tɩ b yaool n tõog n wilg sã n yaa a Zeova bɩ a Sʋɩtãan la pʋ-yagdã.

“MAM KÕTA M VƖƖMÔ

12. Bõe la a Zeezi sak n maane, a sẽn nong a Zeova yʋʋrã yĩnga?

¹² A Zeezi sẽn nong a Zeova wã yĩnga, a ra rat n maana a sẽn tõe fãa n waoog a yʋʋrã la a wilg t’a sẽn maand fãa yaa tɩrga. A Zeezi yeelame: “Mam kõta m vɩɩmã.” (Zã 10:17, 18) N-ye. A sakame meng n ki a Zeova yʋʋrã yĩnga.b D yaab a Ãdem ne a Awa sẽn da zems zãngã yãka yam n bas a Zeova n pʋg a Sʋɩtãana. La a Zeezi sakame n wa tẽngã zugu, n na n wilg t’a nonga a Zeova. A maana sɩd ne a Zeova bũmb fãa pʋgẽ, n wilg t’a sɩd nong-a lame. (Ebre. 4:15; 5:7-10) A kell n saka a Zeova hal n tãag a sẽn na n ki kũ-toaag namsg ra-luk zugã. (Ebre. 12:2) Woto, a wilgame t’a nonga a Zeova la a yʋʋrã.

13. Bõe yĩng tɩ yaa a Zeezi n da tõe n wilg t’a Sʋɩtãan yaa pʋ-yagd n yɩɩda? (Ges-y fotã me.)

¹³ A Zeezi vɩɩmã tõre, a wilga vẽeneg tɩ yaa a Sʋɩtãan la pʋ-yagdã, pa a Zeova ye. (Zã 8:44) Ned kae n mi a Zeova n ta a Zeezi ye. Sɩd sã n da be a Sʋɩtãan sẽn dõd a Zeova bũmb ninsã sʋka, a Zeezi ra na n bãnga rẽ. La a Zeezi kell n wilgame t’a Zeova sẽn maand fãa yaa tɩrga. Baa sẽn wa n wõnd a Zeova raag-a lame n basã, a zãgsame t’a kõn kɩɩs a saasẽ Ba wã, hal n sak n ki.—Mat. 27:46.c

“MAM TƲMA TƲƲMD NING FO SẼN KÕ MAAMÃ N BAASE”

14. Wãn to la a Zeova keo a Zeezi a sẽn kell n maan sɩdã yĩnga?

¹⁴ A Zeezi sẽn wa n pʋʋsd a karen-biisã yĩng a yõkrã yʋngã, a yeelame yaa: “Mam tʋma tʋʋmd ning fo sẽn kõ maamã n baase.” A ra kɩsa sɩd t’a Zeova na n keo-a-la a sẽn kell n maan sɩdã yĩnga. (Zã 17:4, 5) A Zeezi sẽn kɩs a Ba wã sɩdã pa yɩ zaalem ye. A Zeova pa bas-a t’a kell n pa yaoogẽ wã ye. (Tʋʋ. 2:23, 24) A vʋʋga a Zeezi, n kõ-a naam sẽn yaa kãseng saasẽ. (Fili. 2:8, 9) A Zeezi wa n lebga Wẽnnaam Rĩungã Rĩma, n sɩng naam dɩɩbo. Bõe la Wẽnnaam Rĩungã na n maane? A Zeezi leoka sok-kãngã a sẽn wa n zãmsd a karen-biisã pʋʋsgã, n yeel a Zeova yaa: “Bɩ yãmb Rĩungã wa. Bɩ y raabã maan tẽngã zugu, wa sẽn maand saasẽ wã.”—Mat. 6:10.

15. Bõe me la a Zeezi na n maane?

¹⁵ Ka la bilfu, a Zeezi na n yika zabr ne Wẽnnaam bɛɛbã, n sãam nin-wẽnsã Armagedõ. (Vẽn. 16:14, 16; 19:11-16) Rẽ poor bilfu, a na n loba a Sʋɩtãan “bog-zulungã” pʋgẽ, n pag-a t’a pa le tõe n maan baa fʋɩ ye. (Vẽn. 20:1-3) Rẽ poore a Zeezi na n dɩɩ naam yʋʋm tusri, n kɩt tɩ laafɩ zĩnd tẽngã zugu, la a sõng ninsaalbã tɩ b zems zãnga. A na n vʋʋga sẽn ki-bã. A na n kɩtame tɩ tẽngã tõr lebg arzãna. Rẽ la a Zeova raabã na n pidsi.—Vẽn. 21:1-4.

16. A Zeezi naamã sẽn na n kaoos yʋʋm tusrã poore, vɩɩmã na n yɩɩ wãna?

¹⁶ A Zeezi naamã sẽn na n kaoos yʋʋm tusrã baasgẽ, vɩɩmã na n yɩɩ wãna? Yel-wẽndã na n menemame, tɩ ninsaalbã zems zãnga. Pa na n le yɩ tɩlɛ tɩ ninsaalbã tik a Zeezi maoongã n kos sugr b yel-wẽn yĩng ye. B pa na n le rat se-yõkd wall maan-kʋʋdb me ye. Sẽn paase, kũumã sẽn yaa “yaoolem bɛ” wã pa na n le zĩnd ye. Yaadã na n lebga vɩɩdo. Rẽ tɩ b vʋʋga kũ-rãmbã. Sẽn be-b tẽngã zugã fãa na n yɩɩ neb sẽn zems zãnga.—1 Kor. 15:25, 26.

17-18. a) Bõe n na n maan yʋʋm tusrã baasgẽ? b) Yʋʋm tusrã baasgẽ, bõe la a Zeezi na n maane? (1 Korẽnt rãmbã 15:24, 28) (Ges-y fotã me.)

¹⁷ Bõe me n na n maan a Zeezi naamã sẽn na n kaoos yʋʋm tusrã poore? Wakat kãnga, bũmb sẽn yaa toor zall n na n maane. Ned baa a ye pa na n le sãmbd a Zeova sã n yaa sõngo, la t’a yaa Wẽnnaam sẽn yaa tɩrg ye. Bõe yĩnga? Edɛn zẽedã zĩigẽ, a Sʋɩtãan yeelame t’a Zeova yaa pʋ-yagda, la t’a pa rɩt a naamã ne nonglem ye. Rẽ tɛka, neb nins sẽn tũ a Zeova wã wilga naoor wʋsg t’a sẽn maand yɛlã to-to wã la sõma n yɩɩda. Rẽnd a Zeezi naamã sẽn na n kaoos yʋʋm tusrã poore, b na n wilgame t’a Zeova sẽn maand fãa yaa tɩrga. Wakat kãnga t’a Zeova wilgame t’a yaa Ba sẽn tar nonglem, tɩ sãmbg kae ye.

¹⁸ A Zeezi naamã sẽn na n kaoos yʋʋm tusrã poore, nebã fãa na n bãngame t’a Sʋɩtãan sẽn yet bũmb nins a Zeova zugã fãa yaa ziri. Yʋʋm tusrã baasgẽ, bõe la a Zeezi na n maane? A na n dɩka a Sʋɩtãan togs-n-taar n tõdg a Zeova bɩ? Ayo! (Karm-y 1 Korẽnt rãmb 15:24, 28.) A Zeezi na n lebsa Rĩungã a Ba wã. A na n sulga a meng n sak a Zeova naamã. N-ye. A Zeezi pa wa a Sʋɩtãan ye. A sak n na n basa bũmb fãa a sẽn nong a Zeova wã yĩnga.

19. A Zeova yʋʋrã yõod taa zĩ-bʋg ne a Zeezi?

¹⁹ Pa lingr la a Zeova sẽn sak n kõ a Zeezi a yʋʋrã ye. A Zeezi wilga a Ba wã sẽn yaa a soabã tɩ zems kɛpɩ. La a Zeova yʋʋrã yõod taa zĩ-bʋg ne a Zeezi? Ne a Zeezi, Wẽnnaam yʋʋrã yõod yɩɩda bũmb fãa. A sak n kii yʋ-kãng yĩnga. A naamã sẽn na n kaoos yʋʋm tusrã poor me, a na n sak n lebsa a Zeova bũmb fãa. Wãn to la d tõe n dɩk a Zeezi togs-n-taare? Sõsg ning sẽn pʋgdã pʋgẽ d na n leoka sok-kãngã.