ZÃMSGÃ YĨNGA 23
YƖƖLL A 2 Tõnd Wẽnnaam, fo yʋʋrã la a Zeova
A Zeova yʋʋrã sẽn segd n tall yõod wʋsg ne tõndã võore
“A Zeova yetame yaa: ‘Yãmb yaa mam kaset rãmba.’”—EZA. 43:10.
D SẼN NA N BÃNGE
D na n yãa d sẽn tõe n maan to-to n wilg t’a Zeova yʋʋrã yaa sõngo, la t’a sẽn maand fãa yaa tɩrga.
1-2. Bõe n wilgd t’a Zeova yʋʋrã tara yõod wʋsg a Zeezi nifẽ?
NE A ZEEZI, a Zeova yʋʋrã n yaa bũmb ning sẽn tar yõod n yɩɩdã. Ned kae sẽn kɩt t’a Zeova yʋʋrã paam pẽgr n ta a Zeezi ye. D yãa sõsg ning sẽn loogã pʋgẽ t’a Zeezi sakame n ki sẽn na yɩl n wilg t’a Zeova yʋʋrã yaa sõngo, la t’a sẽn maand fãa yaa tɩrga. (Mark 14:36; Ebre. 10:7-9) A naamã sẽn na n kaoos yʋʋm tusrã poor me, a na n lebsa a Zeova Rĩungã a yʋʋrã waoogr yĩnga. (1 Kor. 15:26-28) A sẽn nong Wẽnnaam yʋʋrã to-to wã me wilgda tõnd bũmb wʋsg yẽ ne a Ba wã zoodã zugu. Wilgda vẽeneg t’a nonga a Zeova ne a sũur fãa.
2 A Zeezi waa tẽngã zug a Ba wã yʋʋr yĩnga. (Zã 5:43; 12:13) A kɩtame t’a karen-biisã bãng a Ba wã yʋʋrã. (Zã 17:6, 26) A zãmsa nebã bũmb wʋsg la a maan yel-soalem ne a Zeova yʋʋre. (Zã 10:25) Sẽn paase, a pʋʋsa a Zeova a karen-biisã yĩng n yeel yaa: “Gũ bãmb fo meng yʋʋrã . . . yĩnga.” (Zã 17:11) Woto wã, sẽn mik t’a Zeezi nonga a Zeova yʋʋrã wʋsgã, ned tõe n yeelame t’a yaa Kirist karen-biig hakɩɩk n yaool n pa mi a Ba wã yʋʋr wall a pʋt-a sɩda?
3. Bõe yell la d na n gom sõs-kãngã pʋgẽ?
3 D sẽn yaa kiris-neb n modgd n dɩkd a Zeezi naoorã yĩnga, d nonga a Ba wã yʋʋrã. (1 Pɩy. 2:21) Sõs-kãngã pʋgẽ d na n yãa a Zeova sẽn boond sẽn moond-b ‘Rĩungã koe-noogã’ t’a Kaset rãmbã võore. (Mat. 24:14) D leb n na n yãa a Zeova yʋʋrã sẽn segd n tall yõod wʋsg ne tõndã võore.
“NIN-BUIID A YƲƲRÃ YĨNGA”
4. a) Nand t’a Zeezi leb saasẽ, tʋʋm-bʋg la a kõo a karen-biisã? b) A sẽn kõ-b tʋʋmd ningã kɩtame tɩ d sokd d meng sok-bʋgo?
4 Nand t’a Zeezi leb saasẽ, a yeela a karen-biisã yaa: “Vʋʋsem sõngã sã n wa sig yãmb zutu, yãmb na n paama pãnga. Yãmb na n yɩɩ mam kaset rãmb Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:8) Rẽnd pa Israyɛll soolmã pʋgẽ bal la b ra segd n moon koe-noogã ye. Bilf-bilfu, buud toɛy-toɛyã fãa neb na n paama segb n tõe n lebg a Zeezi karen-biisi. (Mat. 28:19, 20) La a Zeezi yeelame yaa: “Yãmb na n yɩɩ mam kaset rãmba.” Na n yɩɩ tɩlɛ tɩ karen-bi-paalã bãng a Zeova yʋʋrã bɩ, bɩ b na n yɩɩ a Zeezi kaset rãmb bala? Tʋʋm sak 15 wã sẽn gomd bũmb ning yellã tõe n sõng-d lame tɩ d paam sok-kãngã leoore.
5. Bõe la tẽn-tʋmdbã la kãsem-dãmbã sẽn be Zerizalɛmmã yeel tɩ wilgdẽ tɩ nebã fãa segd n bãnga a Zeova yʋʋrã? (Ges-y fotã me.)
5 Yʋʋmd 49 wã, tẽn-tʋmdbã ne kãsem-dãmbã sẽn be Zerizalɛmmã tigma taab n na n bao n bãng bu-zemsã neb nins sẽn pa kẽ bãongã sẽn segd n maan n tõog n lebg kiris-neba. Sõsgã sasa, a Zak sẽn yaa a Zeezi ma-biigã yeelame: “A [Pɩyɛɛr] maaga a yĩng n wilg Wẽnnaam sẽn sɩng bu-zẽmsã yell gesg to-to, sẽn na yɩl n yãk neb bãmb sʋk tɩ b yɩ nin-buiid a yʋʋrã yĩnga.” Yaa ãnda yʋʋr yell la a Zak sẽn da gomdã? A lebs n togsa no-rɛɛs a Amos goam n yeel yaa: “Sẽn na yɩl tɩ neb nins sẽn ketã ne buud toɛy-toɛyã fãa neb sẽn yaa nin-buiid b sẽn bool ne mam yʋʋrã bao maam a Zeova ne b sũur fãa. Woto yaa a Zeova . . . goama.” (Tʋʋ. 15:14-18) Karen-bi-paalã pa na n bao n bãng a Zeova bal ye. B na n ‘boond-b-la ne a yʋʋrã’ me. Woto rat n yeelame tɩ b na n zãada Wẽnnaam yʋʋrã, la tɩ nebã na n bãngame tɩ b gomda a yʋʋr yĩnga.
Pipi kiris-nebã taoor lʋɩtb sullã tigsg sasa, b bãngame tɩ kiris-nebã segd n yɩɩ nin-buiid Wẽnnaam yʋʋrã yĩnga (Ges-y sull a 5)
6-7. a) Bõe yĩng t’a Zeezi wa tẽngã zugu? b) Bõe me n kɩt t’a Zeezi wa tẽngã zugu, tɩ rẽ tar yõod n yɩɩda?
6 A Zeezi meng yʋʋrã võor yaa: “A Zeova yaa Fãagre.” Sɩd me, yaa yẽ maasem yĩng la a Zeova fãagd neb nins sẽn tar tẽebã. A Zeezi waa tẽngã zug n na n kõ a vɩɩmã ninsaalbã yĩnga. (Mat. 20:28) A sẽn ki tɩ yɩ maoongã kɩtame tɩ ninsaalbã tõe n paam fãagr n wa paam vɩɩm sẽn ka sɛtã.—Zã 3:16.
7 La bõe n kɩt tɩ ninsaalbã ra rat fãagre? Yaa bũmb ning sẽn maan Edɛn zẽedã zĩigẽ wã yĩnga. D yãa sõsg ning sẽn loogã pʋgẽ tɩ d yaab a Ãdem ne a Awa kɩɩsa a Zeova n bõn vɩɩm sẽn kõn sa wã. (Sɩng. 3:6, 24) La a Zeezi waa tẽngã zug bũmb yõod sẽn yɩɩd ninsaalbã fãagr yĩnga, bala b sãama a Zeova yʋʋrã. (Sɩng. 3:4, 5) Rẽ n so t’a Ãdem ne a Awa kambã la b yagensã fãagr tar loees ne bũmb yõod sẽn yɩɩd rẽ. Yaa a Zeova yʋʋrã na paam waoogrã. A Zeezi sẽn da gomd a Zeova yʋʋr yĩng la a zãad a yʋʋrã yĩnga, a kɩtame t’a yʋʋrã paam waoogr wʋsgo.
Ned tõe n yeelame t’a yaa Kirist karen-biig hakɩɩk n yaool n pa mi a Ba wã yʋʋr wall a pʋt-a sɩda?
8. Bõe la neb nins fãa sẽn tẽed a Zeezi wã segd n sak n deege?
8 Neb nins fãa sẽn na n tẽ a Zeezi wã segd n sak n deegame tɩ b fãagrã yita a Zeezi Ba a Zeova nengẽ, tɩ b yaa Zʋɩf-rãmb wall bu-zẽms neba. (Zã 17:3) Sẽn paase, na n yɩɩ vẽeneg tɩ b gomda a Zeova yʋʋr yĩng wa a Zeezi. B segd n bãngame me tɩ Wẽnnaam yʋʋrã waoogrã tara yõod wʋsgo. B fãagrã ne a Zeova yʋʋrã waoogrã tũuda taaba. (Tʋʋ. 2:21, 22) Dẽnd a Zeezi karen-biis hakɩɩkã fãa segd n bao n bãnga a Zeova la a Zeezi. Rẽ n so t’a Zeezi sẽn baas a pʋʋsg ning sẽn be Zã sak 17 pʋgẽ wã ne goam ninsã pa ling tõnd ye. A yeelame yaa: “Mam kɩtame tɩ b bãng fo yʋʋrã, la m na n le kɩtame tɩ b bãng-a, sẽn na yɩl tɩ fo sẽn nong maam ne nonglem ningã zĩnd bãmb pʋsẽ, tɩ ma-me zĩnd b pʋsẽ.”—Zã 17:26.
“YÃMB YAA MAM KASET RÃMBA”
9. Bõe la d tõe n maan n wilg t’a Zeova yʋʋrã tara yõod ne-do?
9 A Zeova yʋʋrã waoogrã segd n paka a Zeezi karen-biis hakɩɩkã fãa. (Mat. 6:9, 10) Bãmb nifẽ, a Zeova yʋʋrã n segd n tall yõod n yɩɩd yʋy a taabã. B segd n wilga rẽ ne b manesmã. La bõe la d tõe n maan n sõng t’a Zeova yʋʋrã paam waoogre, bɩ n wilg t’a Sʋɩtãan sẽn yet bũmb nins a zugã fãa yaa ziri?
10. Ezayi sak 42 n tãag 44 pʋgẽ, b gomda bõe yell tɩ yaa wa bʋ-kaoor zĩigẽ? (Ezayi 43:9; 44:7-9) (Ges-y fotã me.)
10 Ezayi sak 42 n tãag 44 pʋgẽ, b wilga bũmb ning d sẽn segd n maan n sõng t’a Zeova yʋʋrã paam waoogrã. Sag-kãens pʋsẽ b gomdame tɩ yaa wa bʋ-kaoor zĩigẽ, n dat n bãng sẽn sɩd yaa-a Wẽnnaamã n bake. A Zeova yeela wẽnnaam-dãmb a taabã fãa tɩ b wilg b sã n sɩd yaa wẽnnaam-dãmba. A yeelame me tɩ kaset rãmb sã n beẽ bɩ b kolg n gom n teel b wẽnnaam-dãmbã. La ned baa a ye pa kolg ye.—Karm-y Ezayi 43:9; 44:7-9.
Ne d no-goamã la d tʋʋm-tʋmdɩ wã, d wilgdame tɩ Wẽnnaam a to kae n zʋʋg a Zeova ye (Ges-y sull 10-11)
11. Bõe la a Zeova yeel a nin-buiidã tɩ be Ezayi 43:10-12?
11 Karm-y Ezayi 43:10-12. A Zeova goma a nin-buiidã yell n yeel yaa: “Yãmb yaa mam kaset rãmba, tɩ mam yaa Wẽnnaam.” Rẽ poore, a sok-b lame yaa: “Rẽ yĩnga, Wẽnnaam a to beeme tɩ sã n ka maam sɩda?” (Eza. 44:8) D paam n tõe n leoka sok-kãngã tɩ yaa zu-zẽkre. D wilgda ne d no-goamã la d tʋʋm-tʋmdɩ wã t’a Zeova bal la Wẽnnaam sɩd-sɩdã. A yʋʋrã yɩɩda yʋy a taabã. D wilgda bũmb fãa pʋgẽ tɩ d sɩd nong a Zeova, la tɩ d na n kell n maana sɩd ne-a, baa a Sʋɩtãan sẽn na n maan-d bũmb ning fãa. Woto, d sõngdame t’a Zeova yʋʋrã paamd waoogre.
12. Wãn to la bãngr-goam nins sẽn be Ezayi 40:3, 5 wã pids-yã?
12 D sã n kɩtdẽ t’a Zeova yʋʋrã paamd waoogre, d rɩkda a Zeezi Kirist togs-n-taare. A Ezayi leb n yeelame tɩ ned n na n lʋɩ taoor n “kõog [bɩ, n “maneg,” notã] a Zeova sorã.” (Eza. 40:3) Wãn to la rẽ pids-yã? A Zãmbatiis manega sorã a Zeezi sẽn wa a Zeova yʋʋr yĩng n da gomd a yʋʋr yĩngã yĩnga. (Mat. 3:3; Mark 1:2-4; Luk 3:3-6) A Ezayi yeelame me yaa: “A Zeova ziirã na n pukame.” (Eza. 40:5) Wãn to la gom-kãens pids-yã? A Zeezi sẽn wa tẽngã zugã, a rɩka a Zeova togs-n-taar kɛpɩ hal tɩ ra yaa wa a Zeova meng n wa tẽngã zugu.—Zã 12:45.
13. Wãn to la d tõe n dɩk a Zeezi togs-n-taare?
13 Tõnd me yaa a Zeova Kaset rãmb wa a Zeezi. D zãada a Zeova yʋʋrã, la d wilgd ned buud fãa bõn-sõma nins a sẽn maanã. La sẽn na yɩl n tõog n maan dẽ sõma, d segd n wilga nebã bũmb nins a Zeezi sẽn maan n kɩt t’a Zeova yʋʋrã paam waoogrã me. (Tʋʋ. 1:8) A Zeezi n yaa a Zeova Kaset soab ning sẽn yɩɩd a taabã, tɩ d rɩkd a togs-n-taare. (Vẽn. 1:5) La bõe yĩng t’a Zeova yʋʋrã segd n tall yõod wʋsg ne tõndo?
A ZEOVA YƲƲRÃ SẼN TAR YÕOD WƲSG NE TÕNDÃ VÕORE
14. D tagsg yaa wãn ne a Zeova yʋʋrã? (Yɩɩn-sõamyã 105:3)
14 D sũur yaa noog d sẽn mi a Zeova yʋʋrã. (Karm-y Yɩɩn-sõamyã 105:3.) D sã n pẽgd d mens d sẽn mi a Zeova yʋʋrã yĩngã, noom-a-la wʋsgo. (Zer. 9:23, 24; 1 Kor. 1:31; 2 Kor. 10:17) “Pẽg d meng a Zeova yĩng” rat n yeelame tɩ d sũur yaa noog d sẽn paam t’a Zeova yaa d Wẽnnaamã. D getame tɩ d sẽn paam n tõe n sõng t’a yʋʋrã paam waoogr la d wilg tɩ bũmb ning fãa a sẽn maan yaa tɩrgã yaa zu-zẽkre. D pa segd n zoet yãnd n pa rat tɩ d tʋmd-n-taase, d karen-bi-taase, d yags la neb a taab bãng tɩ d yaa a Zeova Kaset rãmb ye. A Sʋɩtãan ratame tɩ d ra le gom a Zeova yʋʋrã yell ne d taabã ye. (Zer. 11:21; Vẽn. 12:17) Sɩd me, a Sʋɩtãan ne a poorẽ dãmbã ratame tɩ nebã yĩm a Zeova yʋʋrã. (Zer. 23:26, 27) La d sẽn nong a Zeova yʋʋrã kɩtame tɩ d kɩdemd sũ-noog “daarã tõre.”—Yɩɩn. 5:11; 89:16.
15. Pʋʋs ne a Zeova yʋʋrã rat n yeelame tɩ bõe?
15 D pʋʋsda ne a Zeova yʋʋrã wakat fãa. (Zow. 2:32; Rom. 10:13, 14) Pʋʋs ne a Zeova yʋʋrã pa d sẽn na n mi Wẽnnaam yʋ-peellã la d pʋt-a bal ye. Rat n yeelame tɩ d bãnga a Zeova sẽn yaa Wẽnnaam ning buudã, tɩ d kɩs-a-la sɩda, tɩ d teeg-a lame t’a sõng-do, la tɩ d baooda sagls a nengẽ. (Yɩɩn. 20:7; 99:6; 116:4; 145:18) Sẽn paase, d wilgda neb a taabã a yʋʋrã la a zʋg-sõma wã, n sagend-b tɩ b tek yam n kos sugr la b tʋm tʋʋm sẽn na n kɩt tɩ b ta a yam.—Eza. 12:4; Tʋʋ. 2:21, 38.
16. Bõe la d tõe n maan n wilg t’a Sʋɩtãan yaa pʋ-yagda?
16 D sak n na n namsa a Zeova yʋʋrã yĩnga. (Zak 5:10, 11) D sã n kell n maan sɩd ne a Zeova baa b sã n wa namsd tõndo, d wilgdame t’a Sʋɩtãan yaa pʋ-yagda. A Zoob wakatẽ wã, a Sʋɩtãan rõda neb nins fãa sẽn tũud a Zeova wã n yeel yaa: “Ninsaal na n sak n kõo bũmb nins fãa a sẽn tarã a vɩɩmã yĩnga.” (Zoob 2:4) A Sʋɩtãan yeelame tɩ yaa noog wakat bal la nebã tũud a Zeova, la tɩ sã n wa pa nana b raagda a Zeova n base. A Zoob sẽn kell n maan sɩd ne a Zeova wã, a wilgame t’a sẽn yeelã yaa ziri. Tõnd me tõe n wilgame tɩ baa a Sʋɩtãan sẽn maan tõnd bũmb ning fãa, d pa na n tol n bas a Zeova ye. D tõe n basa d yam zãng-zãng t’a Zeova na n kell n kogl-d-la a yʋʋrã yĩnga.—Zã 17:11.
17. Sã n yaa ne 1 Pɩyɛɛr 2:12, bõe me la d tõe n maan n kɩt t’a Zeova yʋʋrã paam waoogre?
17 D waoogda a Zeova yʋʋrã. (Yel. 30:9; Zer. 7:8-11) Nebã sẽn mi tɩ d yaa a Zeova Kaset rãmbã yĩnga, d sẽn maand bũmb ninsã tõe n kɩtame tɩ b waoog a Zeova yʋʋrã wall b paoog-a. (Karm-y 1 Pɩyɛɛr 2:12.) Rẽ n so tɩ d maand d sẽn tõe fãa sẽn na yɩl tɩ d no-goamã d la d tʋʋm-tʋmdɩ wã kɩt t’a Zeova yʋʋrã paam waoogre. D sã n maand woto, baa d sẽn pa zems zãngã d tõogd n kɩtame t’a Zeova yʋʋrã paam waoogre.
18. Bõe me la d tõe n maan n wilg t’a Zeova yʋʋrã tara yõod wʋsg ne-do? (Ges-y tẽngr notã me.)
18 Ne tõndo, a Zeova yʋʋrã na paam waoogrã yõod yɩɩda tõnd mengã sẽn na n tar yʋ-noogo. (Yɩɩn. 138:2) Bõe yĩng tɩ rẽ tar yood woto? D sẽn wilgd tɩ d nonga a Zeova yʋʋrã tõe n kɩtame tɩ nebã wɩt tõndo.a B sẽn wa n na n kʋ a Zeezi wã, nebã ra get-a-la wa bi-bɛɛg n da yaand-a. La a Zeezi saka rẽ sẽn na yɩl t’a Zeova yʋʋrã paam waoogre. A ‘pa zoe yãnde,’ bala neb a taabã sẽn da get-a to-to wã ra pa pak-a wʋsg ye. (Ebre. 12:2-4) Sẽn da pak-a n yɩɩd yaa Wẽnnaam daabã maanego.—Mat. 26:39.
19. Y tagsg yaa wãn ne a Zeova yʋʋrã, la bõe yĩnga?
19 D sũur nooma d sẽn mi a Zeova yʋʋrã yĩnga, n getẽ tɩ d sẽn paam n yaa a Kaset rãmbã yaa zu-zẽkre. Rẽ n so tɩ d na n ket n pẽgd a Zeova yʋʋrã, baa neb a taabã sã n wa yaand tõndo. Ne tõndo, a Zeova yʋʋrã na paam waoogrã yood yɩɩda tõnd mengã sẽn na n tar yʋ-noogo. Bɩ d kell n maan d sẽn tõe fãa n pẽg a Zeova yʋʋrã, baa a Sʋɩtãan sẽn na n maan-d fãa. Woto la d wilgd t’a Zeova yʋʋrã tara yõod wʋsg ne tõnd wa sẽn da yaa to-to ne a Zeezi Kiristã.
YƖƖLL 10 D pẽg tõnd Wẽnnaam a Zeova
a A Zoob zo-rãmb a tãabã sẽn wa n gom n sãam a yʋʋrã, baa a sẽn da yaa ned sẽn maand sɩdã, nams-a-la wʋsgo. Sɩngrẽ wã, a Zoob kambã sẽn wa n ki t’a bõn a paoongã fãa me wã a “pa beege, la a pa yeel me tɩ Wẽnnaam maana sẽn pa zems ye.” (Zoob 1:22; 2:10) La b sẽn wa n dõd-a t’a tʋma tʋʋm-wẽnsã, a ‘gomame n pa tags ye.’ Lebga a meng yʋʋrã na paam waoogrã n tar yõod n yɩɩd a Zeova yʋʋrã.—Zoob 6:3; 13:4, 5; 32:2; 34:5.