Y ket n tõe n dɩka yam Biiblã zãms-nana wã pʋsẽ bɩ?

1. Wãn to la Biiblã zãms-nana wã toeem y vɩɩmã?

D SẼN bãng Biiblã zãms-nana wã toeema d vɩɩmã. Wala makre, d sẽn bãng tɩ Wẽnnaam yʋʋr la a Zeova wã kɩtame tɩ d bao n lebg a zoa. (Eza. 42:8) D sẽn bãng sɩdã sẽn ki-bã wɛɛngẽ wã kɩtame tɩ d pa le sokd d mens d neb nins sẽn ki wã sã n namsdame ye. (Koɛ. 9:10) Sẽn paase, d sẽn bãng tɩ Wẽnnaam pʋlmame tɩ tẽngã na n wa lebga arzãnã kɩtame tɩ d pa le maand yɩɩr beoog-daarã wɛɛngẽ ye. D kɩsa sɩd tɩ d na n vɩɩmda wakat sẽn kõn sa, pa yʋʋm pis-yopoe bɩ pis-nii bal ye.—Yɩɩn. 37:29; 90:10.

2. Wãn to la 2 Pɩyɛɛr 1:12, 13 wilgd tɩ baa kiris-neb nins tẽeb sẽn bɩ wã tõe n dɩɩ Biiblã zãms-nana wã yõodo?

² D pa segd n yĩm tɩ Biiblã zãms-nana wã tara yõod wʋsg ye. Tẽn-tʋmd a Pɩyɛɛr gʋlsa a lɛtr a yiib-n-soabã n tool kiris-neb sẽn “kɩ yẽg sõma sɩdã pʋgẽ.” (Karm-y 2 Pɩyɛɛr 1:12, 13.) La yɛl kẽer n da be tigingã pʋgẽ n tõe n sãam b tẽebã. Wala makre, zirẽ-be-karen-saam-dãmb la wẽn-kɩɩsdba. (2 Pɩy. 2:1-3) A Pɩyɛɛr ra rat n kenga a tẽed-n-taasã raood sẽn na yɩl tɩ nin-kãens ra tõog n belg-b ye. Rẽ n so t’a tẽeg-b bũmb kẽer b sẽn da zoe n miẽ. Bõn-kãens ra tõe n sõng-b lame tɩ b kell n maan sɩd ne a Zeova n tãag saabã.

3. Bõe yĩng tɩ kiris-nebã fãa segd n bʋgsd Biiblã zãms-nana wã zugu? Rɩk-y makre.

³ Baa d sã n lebga kiris-ned tẽeb sẽn bɩ, d ket n tõe n dɩka yam Biiblã zãms-nana wã pʋgẽ. Wala makre, pag sẽn mi rɩɩb segl sõma tõe n talla zẽ-biis n dʋg rɩɩbo, t’a bi-pugl me tall zẽ-bi-kãens n dʋg rɩɩbo. La pagã sẽn sɩng n segend rɩɩbã kɩtame t’a mi a sẽn tõe n tall zẽ-biisã n segl rɩɩb to-to tɩ yɩ noog n yɩɩda. Woto me, neb nins sẽn sɩng n tũud a Zeova hal daar zãrã sẽn wʋmd Biiblã zãms-nana wã võor to-to wã tõe n yɩɩ toor ne sẽn nan sɩng-b Biiblã zãmsg paalmã. Bõe yĩnga? Yaa vẽeneg tɩ d yɛlã sẽn yaa to-to wã, la bũmb nins d sẽn maand a Zeova tʋʋmdã pʋgẽ wã toeema d lisgã tɛka. D sã n bʋgs bũmb nins d sẽn bãng Biiblã pʋgẽ hal daar zãrã zugu, d yãta b sẽn tõe n sõng-d to-to rũndã-rũndã, tɩ yaa toor ne pĩndã. D na n goma Biiblã zãms-nana a tãab yell n bao n bãng d sẽn tõe n dɩk yam b pʋsẽ to-to.

A ZEOVA N NAAN BŨMB FÃA

4. Wãn to la d sẽn bãng t’a Zeova n yaa d Naandã naf tõndo?

⁴ “Sẽn naan-a bũmb fãa wã yaa Wẽnnaam.” (Ebre. 3:4) D miime tɩ yaa Naand sẽn yaa yam-kãseng soab la pãng sẽn ka to soab n naan tẽngã la bõn-vɩɩsã sẽn bee a pʋgẽ wã. Yaa yẽ n naan tõndo. Rẽnd a mii tõnd sõma. Sẽn paase a geta d yelle. A mii sẽn yaa sõma ne tõnd n yɩɩda. D sẽn bãng t’a Zeova n yaa d Naandã naf-d-la wʋsgo, n kɩt tɩ d vɩɩmã tar barka.

5. Bõe la d bãng Naandã zug tɩ sõng-d tɩ d bɩɩs sik-m-menga? (Ezayi 45:9-12)

⁵ D sẽn mi t’a Zeova yaa d Naandã tõe n sõng-d lame tɩ d bɩɩs sik-m-menga. Wakat n zĩnd t’a Zoob ra tagsd a meng yell la neb a taabã yell wʋsgo, hal n yĩm bũmb ning sẽn tar yõod n yɩɩdã. Rẽ n so t’a Zeova tẽeg-a tɩ yẽ n yaa Naand sẽn ka to wã. (Zoob 38:1-4) Rẽ sõnga a Zoob t’a bãng tɩ Wẽnnaam tagsa wã sõmblem yɩɩda ninsaalbã tagsa wã hal zĩig sẽn zãre. Kaoosg zugẽ, no-rɛɛs a Ezayi yeelame tɩ ninsaalbã pa segd n tags tɩ b tara yam n yɩɩd b Naandã a bada.—Karm-y Ezayi 45:9-12.

6. Kiris-ned minim sã n paasdẽ, bõe yĩng t’a segd n bʋgsd a Zeova sẽn yaa kãseng to-to wã zugu? (Ges-y fot-rãmbã me.)

⁶ Kiris-ned minim sã n paasdẽ, a tõe n wa teega a meng tagsg n pa le baood sagls a Zeova nengẽ la a Gomdã pʋgẽ ye. (Zoob 37:23, 24) La ned sã n bʋgs a Naandã sẽn yaa kãseng to-to wã la a yamã sẽn ka to wã zugu, wãn to la na n sõng-a ? (Eza. 40:22; 55:8, 9) Rẽ na n sõng-a lame t’a tẽeg t’a Zeova tagsa wã yaa sõma n yɩɩd yẽ rẽndã, tɩ kɩt t’a sik a menga.

7. Bõe la a Rahela maan tɩ sõng-a t’a sak noor siglgã sẽn yiisi?

⁷ A Rahela sẽn be Sloveni wã yãame t’a sẽn bʋgsd Naandã sẽn yaa kãseng to-to wã zugã sõng-a lame t’a sak bũmb siglgã sẽn toeeme. A yeelame yaa: “Wakat ninga yaa toog tɩ m sak sard sẽn lʋɩt-b taoorã sẽn dɩke. Wala makre, baa mam sẽn ges koees nins sẽn gomd toeemsã basg yellãa poore, mam sẽn yã saam-biig ne toɛɛng sẽn wɛgsd sõsg pipi, m sũur sãamame. Rẽ n so tɩ m pʋʋs a Zeova n kos t’a sõng-m tɩ m sak toeen-kãnga.” A Rahela bãngame t’a Zeova sẽn yaa yĩngr la tẽng Naandã yĩnga, a tõe n wilga a siglgã sor tɩ zemse. Y sã n wa getẽ tɩ yaa toog tɩ y wʋm bũmb võor b sẽn maneg n bilgi, pa rẽ bɩ noor siglgã sẽn kõ, y tõe n sika y meng n bʋgs Naandã yamã la a pãngã sẽn yaa kãseng to-to wã zugu.—Rom. 11:33-36.

BÕE YĨNG TƖ WẼNNAAM BAS TƖ NAMSGÃ BEẼ

8. D sẽn bãng bũmb ning sẽn kɩt tɩ Wẽnnaam bas tɩ namsgã beẽ wã naf-d-la wãn to?

⁸ Bõe yĩng tɩ Wẽnnaam bas tɩ namsgã beẽ? Kẽer sẽn pa mi sok-kãngã leoorã kɩtame tɩ b sũur yik ne Wẽnnaam, wall kɩt tɩ b tagsdẽ tɩ Wẽnnaam kae ye. (Yel. 19:3) La yãmb miime tɩ yaa yel-wẽndã d sẽn dogd ne wã, la d sẽn pa zems zãngã n kɩt tɩ d namsdẽ. Pa a Zeova ye. Y bãngame me t’a Zeova sũ-marã paka sor tɩ neb milyõ-rãmb bãng-a, la b bãng a sẽn na n maan to-to n kɩt tɩ namsgã sa wakat fãa yĩngã. (2 Pɩy. 3:9, 15) Y sẽn bãng rẽ wã kɩtame tɩ y yam gãand bãane, la kɩt tɩ y maneg n nong-a.

9. Yel-bʋs n mi n kɩt tɩ yaa tɩlɛ tɩ d tẽeg bũmb ning sẽn kɩt t’a Zeova bas tɩ namsgã beẽ wã?

⁹ D miime tɩ sẽn na yɩl n gũ t’a Zeova wa kɩt tɩ namsgã sa baooda sũ-mare. La ned d sẽn nong sã n wa maan kaalem, pa rẽ bɩ yaa tõnd mengã wall d zakã ned n tar zu-loeese, bɩ b maan-d-la kɛgre, d tõe n sokda d meng bõe yĩng tɩ Wẽnnaam pa kɩtd tɩ namsgã sa tao-tao. (Hab. 1:2, 3) Sã n wa yaa woto, yɩta sõma tɩ d bʋgs bũmb ning sẽn kɩt t’a Zeova mi n bas tɩ nin-tɩrsã namsdẽ wã zugu.b (Yɩɩn. 34:19) D leb n tõe n bʋgsa a raabã sẽn yaa kɩt tɩ namsgã sa wakat fãa yĩngã zugu.

10. Bõe n sõng a Ann t’a tõog toog a ma wã kũum poore?

¹⁰ D sẽn mi bũmb ning sẽn kɩt tɩ Wẽnnaam bas tɩ namsgã beẽ wã tõe n sõng-d lame tɩ d tõog toogo. A Ann yaa saam-bi-poak sẽn be Mayot sẽn yaa ko-sʋk-tẽng sẽn be Oseyã ẽndiyẽ wã pʋgẽ. A yeelame: “M ma wã sẽn maan kaalmã sãama m sũur wʋsgo. La m wae n tẽegdame tɩ pa a Zeova n yaa sabab tɩ d namsdẽ ye. A yãgdame n na n kɩt tɩ namsg buud fãa sa, la a vʋʋg d neb nins sẽn maan kaalmã. M sẽn bʋgsd rẽ zugã mii n kɩtame tɩ m yam gãand bãan hal tɩ ling-ma.”

11. Wãn to la d sẽn mi bũmb ning sẽn kɩt tɩ namsgã beẽ wã tõe n sõng-d tɩ d ket n moond koɛɛgã?

¹¹ D sẽn mi bũmb ning sẽn kɩt tɩ namsgã beẽ wã tõe n kõ-d-la raood tɩ d ket n moond koɛɛgã. A Pɩyɛɛr sẽn wilg t’a Zeova sẽn maand sũ-marã yaa a sẽn dat tɩ nebã tek yam n kos sugr n paam fãagrã poore. A yeelame yaa: “Bɩ y tagsd y sẽn segd n yɩ neb nins buudã yelle. Yãmb segd n yɩɩ neb sẽn tar yel-manesem sẽn yaa sõngo, la y tʋmd wẽn-sakr tʋʋma.” (2 Pɩy. 3:11) Koe-moonegã naaga “wẽn-sakr tʋʋma.” D nonga nebã wa d ba wã. D ratame tɩ b wa paam n vɩɩmd Wẽnnaam dũni-paalgã pʋgẽ. A Zeova maanda sũ-mar ne y koe-moonegã zĩigẽ nebã n bas weer tɩ b tõe n wa tũ-a. Y sẽn paam n yaa Wẽnnaam tʋmd-n-taag n tõe n sõng neb wʋsg wa y sẽn tõe tɛk nand tɩ saabã ta wã pa zu-zẽkr sɩda?—1 Kor. 3:9.

D BEE “YAOOLEM WAKATÔ

12. D sẽn mi tɩ d bee “yaoolem wakatã,” wãn to la nafd tõndo?

¹² Biiblã wilga nebã manesmã sẽn na n yɩ to-to “yaoolem wakatã” tɩ zems kɛpɩ. (2 Tɩm. 3:1-5) D sã n ges nebã manesmã sẽn yaa to-to wã, d nee vẽeneg tɩ Biiblã sẽn yeelã pidsdame. D sẽn ne nebã sẽn maneg n lebgd wẽns n paasdẽ wã kɩtame tɩ d maneg n kɩs sɩd ne Wẽnnaam Gomdã.—2 Tɩm. 3:13-15.

13. Wãn to la a Zeezi yel-bũnd ning sẽn be Luk 12:15-21 sõngd tõndo?

¹³ D sẽn mi tɩ d bee “yaoolem wakatã” kɩtame tɩ d pa sãamd d sẽkã ye. D sã n karem a Zeezi yel-bũnd ning sẽn be Luk 12:15-21, d bãngda d sẽn pa segd n sãam d sẽkã võore. (Karm-y-yã.) Bõe yĩng tɩ b yeel tɩ arzɛk soabã yaa “yam-koɛɛg soaba”? Pa a sẽn da yaa rakãagrã yĩng ye. Yaa a sẽn da pa lʋɩɩsd bũmb nins sẽn tar yõod n yɩɩdã taoorã yĩnga. A “bĩnga paoong a meng yĩnga, n yaool n pa arzɛk soab Wẽnnaam nifẽ ye.” Bõe yĩng tɩ ra pa reem yelle? Bala Wẽnnaam yeel-a lame yaa: “Yʋn-kãngã, b na n deega fo vɩɩmã.” Dũni-kãngã saabã sẽn kolgdã, d segd n soka d meng yaa: ‘Mam sẽn yãkd yam n maand bũmb ninsã wilgdame tɩ m pa sãamd m sẽkã bɩ? Bõe la m sagend m kambã tɩ b yãk yam n wa maane? M kẽesda m paoongã, m pãngã la m sẽkã bũmb nins sẽn tõe n kɩt tɩ m lebg arzɛk soab pʋsẽ bɩ, bɩ m bĩngda m paoongã saasẽ?’

14. Bõe yĩng tɩ d tõe n yeel t’a Miki kibarã wilgdame tɩ tara yõod tɩ d tẽeg tɩ d bee yaoolem wakatã?

¹⁴ D sã n bʋgsd kaset nins sẽn wilgd tɩ d bee yaoolem wakatã zugu, tõe n kɩtame tɩ d toeem d sẽn get yɛlã to-to wã fasɩ. Yaa woto la saam-bi-poak a Miki maan-yã. A yeelame: “Mam sẽn wa n paam bakã, m yamã ra bee kẽng inivɛrsite n tɩ karem bũmb wʋsg rũmsã wɛɛngẽ. M da ratame me n lebg wakat fãa so-pakd n tɩ sõng zĩig koe-moondbã sẽn pa waooge. M zo-rãmb tẽeb sẽn bɩ n sagl-m tɩ m tags n ges m sã n na n tõog n karma kareng ning m sẽn datã, la m yɩ so-pakd me. B tẽega maam tɩ dũni-kãngã na n saa ka la bilfu, la tɩ dũni-paalgã pʋgẽ m sã n wa vɩ wakat sẽn kõn sa, m na n tõog n bao n bãnga rũms wʋsg wa m sẽn date. Rẽ n so tɩ m yãk yam n zãms bũmb sẽn pa na n kaoos la sẽn na n kɩt tɩ m paam minim. Sõnga maam tɩ m paam tʋʋmd n tõe n ges m mengã yell la m yɩ wakat fãa so-pakda. M wa n tõog n yik n kẽnga Ekoatɛɛr sẽn yaa zĩig b sẽn dat koe-moondb n paasã.” Rũndã-rũndã, a Miki sɩdã yaa tigims sull yɛl-get tɩ b gilgd n kaagd tigimsã Ekoatɛɛre.

15. Wãn to la a Zak kibarã tõe n sõng tõnd tɩ d ket n moond koe-noogã? (Ges-y fot-rãmbã me.)

¹⁵ Nebã sã n pa rat n kelg koe-noogã, d pa segd n sãam d sũur ye. B tõe n wa toeemame. D gom a Zeezi ma-biig a Zak yelle. A Zeezi bɩɩ a nifẽ, n pids bãngr-goam nins b sẽn da togs Mesi wã zugã, la a ra zãmsd nebã hal t’a zãmsgã sõmblem ka to ye. La yʋʋm wʋsg pʋgẽ, a Zak ra pa a Zeezi karen-biig ye. Yaa a Zeezi vʋʋgrã poor bal la a lebg a karen-biiga, hal n da tar yẽesem wʋsgo.c (Zã 7:5; Gal. 2:9) Baa y roagdbã sã n pa rat n kelg koɛɛgã, bɩ y ra koms raood ye. Ket-y n moond-y neb nins sẽn pa rat n sak Rĩungã koɛɛgã me. Ra yĩm-y tɩ d bee yaoolem wakatã tɩ koɛɛgã mooneg lebg tʋʋm-yãgdem ye. D sẽn yet-b bũmb nins rũndã-rũndã wã tõe n wa sõng-b-la kaoosg zugẽ, baa to-kãsengã sɩngr poore.d

KELL-Y N WILG-Y TƖ Y SŨUR NOOMA NE BŨMB NINS A ZEOVA SẼN TẼEGD TÕNDÃ

16. Wãn to la bũmb nins a Zeova sẽn tẽegd tõndã nafd tõndo? (Ges-y zĩ-gũbrã me: “Tall-y-b n sõng neb a taabã.”)

¹⁶ Bũmb kẽer siglgã sẽn yiisdã yaa neb nins sẽn pa mi bũmb wʋsg Biiblã zugã yĩnga. Wala makre, zãma taoor sõssã b sẽn wɛgsd semen fãa wã, sõss la video kẽer sẽn be jw.org pʋgẽ n paas periodik kẽer yaa neb nins sẽn pa a Zeova Kaset rãmbã yĩnga. Baa ne rẽ, bõn-kãens nafda tõndo. B kɩtdame tɩ d maneg n nonga a Zeova, tɩ d maneg n tẽed a Gomdã la b sõngd tõnd tɩ d paasd d minimã nebã zãmsg wɛɛngẽ.—Yɩɩn. 19:7.

17. Bõe n kɩt tɩ mi n yaa sõma tɩ d tags Biiblã zãms-nana wã yelle?

¹⁷ Tõnd a Zeova Kaset rãmbã sã n wa paam tɩ b maneg n bilgd Biiblã gomd ning võore, noom-d-la wʋsgo. Baa ne rẽ d sũur ket n nooma ne Biiblã zãms-nana wã d sẽn bãng sɩngrẽ wã tɩ kɩt tɩ d yam kẽ sɩda. A Zeova siglgã sã n wa yiis noor tɩ d getẽ tɩ tõnd mengã tagsgã yaa sõma n yɩɩda, d tõe n sika d meng n sak n deeg tɩ yaa Naandã sẽn yaa pãng sẽn ka to soab la yam-kãseng soabã n wilgd a siglgã sore. Tõnd mengã wall d ned sã n wa maood ne zu-loeese, d segd n talla sũ-mar n bʋgs bũmb ning sẽn kɩt t’a Zeova bas tɩ namsgã beẽ wã zugu. Sẽn paase, d sã n wa segd n yãk yam d sẽn na n kẽes d sẽkã la d paoongã bũmb nins pʋsẽ wã wɛɛngẽ, d segd n tẽegame tɩ d bee yaoolem wakatã, la tɩ pa na n kaoos la dũniyã sa ye. Bɩ bũmb nins a Zeova sẽn tẽegd tõndã ket n kengd d raoodo, n kɩt tɩ d lebg yam dãmb n kell n tũ-a ne d sũur fãa.