Bõe yĩng tɩ politikã welgd nebã ne taaba? Bõe la Biiblã yet rẽ wɛɛngẽ?

Dũniyã gill zugu, tẽns wʋsg welga taab politikã wɛɛngẽ. Yʋʋmd 2022 wã, bãngdbã (Pew Research Center) maana vaeesg tẽns 19 pʋsẽ, n mik tɩ kom-kãsems bãmb koabg zugu, 65 wã yeelame tɩ b tẽnsẽ wã, nebã sẽn be politik sull toor-toor pʋsẽ wã pa wʋmd taab baa bilf ye.

Yãmb sẽn beẽ wã, y neeme tɩ politikã kɩtame tɩ nebã welg taab bɩ? Bõe yĩng tɩ yaa woto? Yel-kãng tara tɩɩm bɩ? D ges Biiblã sẽn yet rẽ wɛɛngẽ.

Yel-manesem sẽn wat ne welsgo

Biiblã ra pĩnd n togsame tɩ tõnd wakatã, b sẽn boond tɩ “yaoolem wakatã,” neb wʋsg yel-manesem na n kɩtame tɩ yɩ toog ne nebã tɩ b zemsd taaba.

• “Yaoolem wakatã, yɛlã na n yɩɩ kãn-kãe hal tɩ vɩɩmã lebg toogo. Bala nebã na n yɩɩ beed dãmba, . . . neb sẽn pa baood laafɩ.”—2 Tɩmote 3:1-3.

Baa ne goosneema-rãmb wʋsg sẽn maand b sẽn tõe fãa sẽn na yɩl tɩ zems-n-taar zĩnd nebã ne taab sʋkã, b pa tõogd ye. Nebã tagsg sẽn yaa toor-toor politikã wɛɛngẽ wã, kɩtame tɩ yaa toog tɩ b naag taab n tʋm n welg zu-loeesã, pa rẽ bɩ yaa bũmb sẽn pʋd n pa tõe menga. Yɛlã sẽn yaa woto wã wilgdame tɩ Biiblã sẽn da pĩnd n togs hal daar zãrã yaa sɩda.

• ‘Ninsaal sooga a to tɩ wa ne a toogo.’—Koɛɛg soaba 8:9.

La Biiblã wilgda bũmb ning sẽn tõe n wa ne yellã tɩɩm. Yaa goosneema bɩ Rĩungu, t’a rĩmã tõe n menes zu-loees nins fãa sẽn be rũndã-rũndã wã.

Rĩm-sõng sẽn get a nin-buiidã yell neere

Biiblã wilgdame tɩ yaa a Zeezi Kirist a ye bal n tõe n welg ãdem-biisã zu-loeesã. Sɩd me, a Zeezi tara pãng la tõogo, la a rat ne a sũur fãa tɩ zems-n-taar la laafɩ zĩnd ãdem-biisã fãa sʋka.

• “A naamã rɩɩb wakate, nin-tɩrsã na n ninga puudu, tɩ laafɩ yɩ wʋsgo.”—Yɩɩn-sõamyã 72:7.

• “Buud toɛy-toɛyã fãa neb na n waoog-a lame.”—Yɩɩn-sõamyã 72:11.

A Zeezi n yaa naab sẽn ka to. Bala a nin-biuudã yell pak-a lame t’a rat n sõng-ba, sẽn yɩɩd fãa neb nins b sẽn maand kɛgrã.

• “A na n fãaga naong soab sẽn kelemd n kot sõngre, n paas nimbãan-ned la ned ning fãa sẽn pa tar sõangda. A na n zoee nimbãan-ned la naong soab nimbãanega. A na n fãaga naong rãmbã vɩɩm. A na n fãag-b-la neb nins sẽn weoogd-bã, la nen-kɛglem dãmbã nusẽ.”—Yɩɩn-sõamyã 72:12-14.

Bao-y n bãng-y bũmb a taab n paas Wẽnnaam Rĩungã wɛɛngẽ, sẽn yaa goosneema sẽn be saasẽ tɩ yaa a Zeezi la rĩmã. Bao-y n bãng-y a Zeezi naamã sẽn tõe n naf-y to-to, la y sẽn tõe n maan n teel a naamã.

• Ges-y video ning gom-zug sẽn yaa: Wẽnnaam Rĩungã yaa bõe?

• Karm-y sõsg ning gom-zug sẽn yaa: “Wẽnnaam Rĩungã na n kɩtame tɩ pʋ-lik buud fãa sa.”