Bõe n na n kɩt tɩ zabã sa?

WẼNNAAM NA N SÃAMA NINSAALBÃ GOOSNEEMA-RÃMBÃ

Wẽnnaam na n sãama ninsaalbã goosneema-rãmbã zabr ning Biiblã sẽn boond tɩ Armagedõ wã sasa.a (Vẽnegre 16:16) Wakat kãnga, b na n tigma “dũniyã gill rĩm-dãmbã . . . Wẽnnaam Sẽn-tõe-a-fãa wã ra-kãsengã zabrã yĩnga.” (Vẽnegre 16:14) Armagedõ n yaa Wẽnnaam zabr ning sẽn na n kɩt tɩ zabã fãa sa wã.

Wẽnnaam na n ledga ninsaalbã goosneema-rãmbã ne a Rĩungã bɩ a goosneema wã sẽn na n pa saasẽ n dɩ naam la sẽn pa n na tol n sãamã. (Dãniyɛll 2:44) Wẽnnaam yãka a Zeezi Kirist sẽn yaa a Bi-riblã t’a na n yɩ a Rĩungã Rĩma. (Ezayi 9:6, 7; Matiye 28:18) Goosneema-kãng n yaa Rĩungb ning a Zeezi sẽn yeel a karen-biisã tɩ b pʋʋs n kos tɩ wa wã. (Matiye 6:9, 10) Goosneema-yɛng n na n dɩ naam ninsaalbã fãa zugu, tɩ b taoor soabã yaa a Zeezi.

A Zeezi yaa toor ne ninsaalbã nanambsã sẽn mi n dɩt b naamã b mens nafr yĩng balã. A Zeezi sẽn na n dɩt a naamã ne tɩrlem la a pa bakd ned n sõngdẽ wã, na n kɩtame tɩ ned baa a ye ra yɛɛs tɩ b na wa n tik a yĩngã kõbgo, a sẽn yit tẽng ning wall a buudu, n wẽg-a ye. (Ezayi 11:3, 4) Pa na n yɩ tɩlɛ tɩ neb yik n zab sẽn na yɩl tɩ b ges b yell ne tɩrlem ye. Bõe yĩnga? Bala a Zeezi na n wilgdame tɩ ned kam fãa yell pak-a lame. Biiblã yeelame: “A na n fãaga naong soab sẽn kelemd n kot sõngre, n paas nimbãan-ned la ned ning fãa sẽn pa tar sõangda. . . . A na n fãag-b-la neb nins sẽn weoogd-bã, la nen-kɛglem dãmbã nusẽ.”—Yɩɩn-sõamyã 72:12-14.

Wẽnnaam Rĩungã na n menesa zab-teedã dũniyã zugu. (Mise 4:3) Sẽn paase a na n sãama nin-wẽnsã sẽn pa rat n bas zabã, la sẽn kɩt tɩ neb a taabã pa tõe n zĩnd bãanã. (Yɩɩn-sõamyã 37:9, 10) Nebã fãa, rapa, pagb la kamb na n zĩi bãan tẽngã zugu, b sẽn beẽ fãa.—Ezekɩyɛll 34:28.

Wẽnnaam Rĩungã sã n wa so dũniyã, nebã vɩɩm na n talla yamleoogo. A na n kɩtame tɩ bũmb nins sẽn wat ne zabã sa. Wala makre, naongã, komã, la yɩl n paam f toorẽ zak sẽn yaa toogã. Nebã fãa na n paamda rɩɩb tɩ sekdẽ la b tar zag-neeba.—Yɩɩn-sõamyã 72:16; Ezayi 65:21-23.

Wẽnnaam Rĩungã naam sasa, zabã sẽn wa ne zu-loees ninsã fãa na n saame. Wala makre, a na n kɩtame tɩ neb nins sẽn pogl zab sasa wã paam laafɩ, la a sõng neb nins sẽn namsde, b sẽn yã yel-beed toor-toor zab sasa tɩ be b yamẽ yĩnga. Baa neb nins sẽn ki wã na n vʋʋgame. (Ezayi 25:8; 26:19; 35:5, 6) Zags toɛy-toɛy neb na n le paama taaba. Sẽn paase nebã pa na n le tẽeg yel-beed nins zabã sẽn wa ne wã yelle, bala “bũmb nins sẽn da be pĩndã [na n] loogame.”—Vẽnegre 21:4.

WẼNNAAM NA N KƖTAME TƖ D PAAM D MENS NE YEL-WẼNDÃ

Wẽnnaam Rĩungã na n kɩtame tɩ nebã naag taab n tũ a Zeovac sẽn yaa Wẽnnaam sɩd-sɩdã, “nonglem la laafɩ Wẽnnaamã.” (2 Korẽnt rãmbã 13:11) Nebã na n zãms n bãnga b sẽn tõe n zĩnd ne taab ne laafɩ to-to. (Ezayi 2:3, 4; 11:9) Neb nins fãa sẽn na n tũ Wẽnnaam sẽn na n zãms-b bũmb ninsã na n paama b mens ne yel-wẽndã, n lebg neb sẽn zems zãnga.—Rom dãmbã 8:20, 21.

WẼNNAAM NA N SÃAMA A SƲƖTÃAN NE A ZĨN-DÃMBÃ

Wẽnnaam Rĩungã na n sãama sẽn pirsd-b nebã tɩ b zabd taabã, rat n yeel t’a Sʋɩtãan ne a zĩn-dãmbã. (Vẽnegre 20:1-3, 10) B sã n wa pa le beẽ, ‘laafɩ wã na n yɩɩ wʋsgo.’—Yɩɩn-sõamyã 72:7.

Y tõe n kɩsa sɩd tɩ Wẽnnaam sẽn pʋlem tɩ zabã na n saame wã na n pidsame. A tara tõog n na n kɩt tɩ zabã sa, la a rat n maan dẽ me.

• Wẽnnaam tara tõog la yam tɩ sek a na kɩt tɩ zabã sa. (Zoob 9:4) Bũmb kae a sẽn pa tõe n maan ye.—Zoob 42:2.

• Wẽnnaam sã n get nebã sẽn namsdã, pa noom-a ye. (Ezayi 63:9) A leb n “kisa ned sẽn nong nen-kɛglem tʋʋma.”—Yɩɩn-sõamyã 11:5.

• Wẽnnaam pidsda a pʋlemsã fãa. A pa tõe n yag ziri ye.—Ezayi 55:10, 11; Tɩte 1:2.