Bõe yĩng tɩ zabã ket n beẽ?
Biiblã wilgda bũmb nins sẽn wat ne zabã, la bũmb ning sẽn kɩt tɩ b pa satẽ wã.
YEL-WẼNDÃ
Wẽnnaam naana d yaab a Ãdem ne a Awa n wõneg a menga. (Sɩngre 1:27) Woto rat n yeelame tɩ b ra tõe n dɩka Wẽnnaam togs-n-taare. Wala makre, n tall nonglem la b yɩ neb sẽn nong laafɩ. (1 Korẽnt rãmbã 14:33; 1 Zã 4:8) La a Ãdem ne a Awa kɩɩsa Wẽnnaam n maan yel-wẽnde. Rẽ kɩtame tɩ tõnd fãa rogd ne yel-wẽndã n yaa kiidba. (Rom dãmbã 5:12) D sẽn dogd ne yel-wẽndã mi n kɩtame tɩ d tar tags-yoodo, tɩ neb wʋsg tʋmd tʋʋm-wẽnse.—Sɩngre 6:5; Mark 7:21, 22.
NINSAALBÃ NAAMÃ
Wẽnnaam pa naan ninsaal t’a soog a meng ye. Biiblã yeelame: “Ninsaal sẽn kẽnd pa tõe n wilg a meng sor ye.” (Zeremi 10:23) Rẽ kɩtame tɩ ninsaalbã goosneema-rãmbã pa tõe tɩ zabã la nen-kɛglem tʋʋmã sa zãng ye.
A SƲƖTÃAN NE A ZĨN-DÃMBÃ
Biiblã wilgame tɩ “dũniyã tõr bee wẽng soabã nugẽ.” (1 Zã 5:19) “Wẽng soabã” yaa b sẽn boond a soab tɩ Sʋɩtãanã. A yaa nin-kʋʋda. (Zã 8:44) Yaa yẽ ne a zĩn-dãmbã n pirsd nebã tɩ b zabd taaba, la b tʋmd nen-kɛglem tʋʋma.—Vẽnegre 12:9, 12.
Ninsaalbã pa tõe tɩ bũmb nins sẽn wat ne zabã la nen-kɛglem tʋʋmã sa ye. La Wẽnnaam tõeeme.