Zabã sẽn namsd d fãa to-to
“Dũni gill zabr a yiib-n-soabã tɛka, zabã sõor zɩ n ta b sẽn yaa a soab rũndã-rũndã wã ye. Neb milyaar a yiib n vɩ tẽns zab sẽn be pʋsẽ, rat n yeel tɩ nin-yɛng neb a naas fãa sʋka.”
A Amina Mohammed sẽn yaa Nasiõzĩni wã sekertɛɛr zenerallã pʋgdgã n yeel woto yʋʋmd 2023 yʋʋm-vẽkr kiuug rasem 26.
Tẽng neb tõe n zĩi bãane, tɩ zabr wa tiig n yiki. Baa neb nins sẽn zãr ne zabrã sẽn beẽ wã tõe n namsame. Sẽn paase, zabrã saab poore, a sẽn wa ne zu-loees ninsã tõe n kaoosame. Ad zu-loees kẽer zabã sẽn wat ne:
Kom. Nasiõzĩni wã tʋʋmd noor ning sẽn get naong rãmbã rɩlgr yellã yeelame “tɩ sẽn yɩɩd fãa, ket n yaa zabã n wat ne komã, la tɩ dũniyã gill zugu, komã sẽn namsd b rãmbã neb koabg zugu, pis-yopoe wã vɩɩ tẽns zab sẽn be pʋsẽ.”
Bãas la yɩɩre. Tẽng neb sã n wa getẽ tɩ zabr n tõe n yik b tẽngẽ wã, kɩtdame tɩ b maand yɩɩr wʋsgo. Pa sãmpoag bal la neb nins sẽn vɩ zab sẽn beẽ wã tõe n paam ye. Bãas sẽn kɩtd tɩ ned sũur pa noom ne a menga, wall zu-lɛbg tõe n yõk-b lame me. Baa ne rẽ, yɩl n paam logtor sõngr wae n yaa toog ne-ba.
Neb sẽn zoet n basd b zagse. Nasiõzĩni wã tʋʋmd noor ning sẽn get neb nins sẽn zoe n yi b tẽns yellã wilgame tɩ yʋʋmd 2023 bõn-bɩʋʋng kiuugã tɩ dũniyã gill zugu, yaa neb milyõ koabg la piig la a naas la zak n zoe n yi b tẽnse. Sẽn yɩɩd fãa, yaa zabã n kɩt tɩ yaa woto.
Naongo. Zabã wae n kɩtdame tɩ ligdã yell yaa toogo. Wala makre, tõe n kɩtame tɩ teedã ligd paase. Nin-buiidã tõe n namsdame, bala goosneema wã yãkda ligd ning b sẽn da segd n kẽes laafɩ wã yell gesg la karengã pʋgẽ wã n teend zabrã. Sẽn paase, zabrã poore yɩl n lebs n maneg tẽngã baooda ligd wʋsgo.
Tẽn-gãongã la pemsmã rẽgengo. B sã n dẽgem tẽng tẽn-gãongo, a nebã namsdame. Koomã, pemsmã la tẽn-gãongã sã n dẽgmẽ, tõe n waa ne bãas wʋsgo. Baa yʋʋm wʋsg zabrã poore, bõn-pusdi sẽn solg tõe n ket n pogenda neb wall kʋʋd-ba.
Vẽenega, zabã wata ne sãoong la zu-loees wʋsgo.