M sã n bẽed bãag sẽn tõt saabo, Biiblã tõe n sõng-m lame bɩ?

Biiblã sẽn yete

N-ye. Wẽnnaam geta a neb nins sẽn bẽedã yelle. Biiblã goma wẽn-sakd yell n yeele: “Yẽnda sã n wa gãe ne toogo, Sẽn-Ka-Saab tebended-a lame.” (Yɩɩn-sõamyã 41:4) Yãmb sã n bẽed bãag sẽn tõt saabo, ad bũmb a tãab y sẽn tõe n maan tɩ sõng-yã:

1. Pʋʋs-y n kos-y pãng sẽn na yɩl n tõog toogo. Y na n paama “Wẽnnaam laafɩ wã sẽn yɩɩd ninsaalbã bãngr fãa wã” sẽn tõe n boog y yɩɩrã la keng y pɛlgã.—Filip-rãmbã 4:6, 7.

2. Ra tags-y tɩ tɩɩm kae ye. Biiblã yetame: “Sũ-noog wata ne yĩns laafɩ, la sũ-sãang kʋɩɩsda kõaba.” (Yel-bũnã 17:22) Mi n maand-y laado, bala rẽ tõe n booga y sũ-sãangã, la paas y laafɩ wã me.

3. Kɩs-y sɩd tɩ manegr n wate. Y sã n saagdẽ tɩ manegr n wate, tõe n sõng-y lame tɩ y paam sũ-noog baa y sẽn bẽed bãag sẽn tõt saabã. (Rom dãmbã 12:12) Biiblã yeelame tɩ wakat n wat tɩ “tẽngã ned kõn yeel t’a ka keem ye!” (Ezayi 33:24) Wakat kãnga, Wẽnnaam na n maaga bãas nins sẽn yɩɩd logtoɛɛmbã pãng rũndã-rũndã wã. Wala makre, Biiblã wilgdame tɩ nin-kẽem na n le lebga polle. A yeelame: “A yĩngã na n leb n yɩɩ sõamã wa yẽnda bi-bɩɩlmẽ wã. Yẽnda na n leb n lebga wa a sẽn dag n yaa to-to a bi-bɩɩlem wakatã.”—Zoob 33:25.

Vẽnegre: Baa a Zeova Kaset rãmbã sẽn mi tɩ Wẽnnaam sõngda sẽn dat-b sõngrã, b sã n wa bẽed bãag sẽn tõt saabo, b baooda logtor sõngr me. (Mark 2:17) La a Zeova Kaset rãmbã pa sagend ned t’a sak tɩɩm takɩ ye. D miime tɩ yaa ned kam fãa n segd n yãk yam yel-kãensã wɛɛngẽ.