Wẽnnaam Rĩungã yaa bũmb sẽn be ned fãa sũurẽ bɩ?
Biiblã sẽn yete
Ayo. Wẽnnaam Rĩungã pa bũmb sẽn be kiris-nebã sũyã pʋsẽ ye.a Biiblã wilgda Wẽnnaam Rĩungã sẽn sɩd beẽ, n boond-a tɩ “saasẽ Rĩungã.” (Matiye 4:17, La Bible du roi Jacques) D ges Biiblã sẽn wilgd to-to tɩ Rĩungã yaa goosneema sɩd-sɩd sẽn be saasẽ.
Wẽnnaam Rĩungã tara nanambse, poorẽ dãmb la noya. Rĩun-kãng segd n gesame tɩ Wẽnnaam raabã maan tẽngã zugu, wa sẽn maand saasẽ wã.—Matiye 6:10; Vẽnegre 5:10.
Wẽnnaam goosneema wã bɩ a Rĩungã rĩmã na n dɩɩ naam “buud toɛy-toɛyã sẽn be tẽns toɛy-toɛyã, la sẽn gomd buud-goam toɛy-toɛyã” zugu. (Dãniyɛll 7:13, 14) Pa Rĩun-kãng rĩmã poorẽ dãmbã n yãk-a t’a lebg rĩm ye. Yaa Wẽnnaam meng a toore.—Yɩɩn-sõamyã 2:4-6; Ezayi 9:7.
A Zeezi yeela a tẽn-tʋmdb nins sẽn kell n maan sɩd ne-a wã tɩ b na n wa naag-a-la saasẽ Rĩungã pʋgẽ n “zĩnd gɛy zutu.”—Luk 22:28, 30.
Rĩungã tara bɛɛba, t’a rĩmã na n wa sãam-ba.—Yɩɩn-sõamyã 2:1, 2, 8, 9; 110:1, 2; 1 Korẽnt rãmbã 15:25, 26.
Biiblã pa yet tɩ Wẽnnaam Rĩungã yaa bũmb sẽn be ned sũurẽ ye. La a wilgdame tɩ “Rĩungã koɛɛg” bɩ “Rĩungã koe-no-kãngã” tõe n kẽe tõnd sũyã, la t’a segdame meng n kẽ tõnd sũyã.—Matiye 13:19; 24:14.
B sẽn yeel tɩ “Wẽnnaam Rĩungã bee ne yãmbã” võor yaa bõe?
B sẽn lebg Luk 17:21 wã goamã to-to Biibl-dãmb kẽer pʋsẽ wã kɩtame tɩ neb kẽer pa mi Rĩungã sẽn sɩd beẽ wã vẽeneg ye. Wala makre, La Bible du roi Jacques pʋgẽ, b yetame tɩ “Wẽnnaam Rĩungã bee ne yãmba.” Sẽn na yɩl n wʋm vɛrse-kãngã võor sõma, d segd n lebg n gesa a Zeezi sẽn da gomd ne neb ninsã.
Wẽnnaam Rĩungã ra pa be neb nins sẽn da kis a Zeezi la sẽn da baood-a n na n kʋ wã sũy sẽn diglmã pʋsẽ ye
A Zeezi ra gomda ne Fariziyẽ-rãmbã sẽn yaa tũudum taoor dãmb sull sẽn da kis-a la b baood-a n na n kʋ wã. (Matiye 12:14; Luk 17:20) Rẽ yĩnga, zemsame tɩ d tags tɩ Rĩungã yaa bũmb sẽn da be b sũyã sẽn diglmã pʋsẽ sɩda? A Zeezi yeel-b lame yaa: “Yãmb pʋsã pida ne pʋ-lik la noyã kɩɩsgo.”—Matiye 23:27, 28.
Biibl-dãmb a taab pʋsẽ, b sẽn lebg a Zeezi goam nins sẽn be Luk 17:21 pʋgẽ to-to wã kɩtame tɩ võorã yaa vẽenega. B yetame yaa: ‘Wẽnnaam Rĩungã bee ka ne yamba.’ (Contemporary English Version) “Wẽnnaam Rĩungã bee yãmb sʋka.” (Dũni-paalgã lebgre) Saasẽ Rĩungã ra bee “ne” Fariziyẽ-rãmbã, pa rẽ bɩ a ra bee b “sʋka,” bala a Zeezi sẽn yaa soab ning Wẽnnaam sẽn yãk t’a yaa Rĩmã ra yasa b taoore.—Luk 1:32, 33.
a Kiris-neb tũudum wʋsg pʋsẽ, b zãmsda nebã tɩ Wẽnnaam Rĩungã yaa bũmb sẽn be ninsaal pʋgẽ, pa rẽ bɩ bũmb sẽn be a sũurẽ. Wala makre, Etazĩni tũudum a yembr b sẽn boond tɩ Convention baptiste du Sud nebã yetame tɩ Wẽnnaam Rĩungã yaa “naam Wẽnnaam sẽn dɩt ned sũurẽ la a vɩɩmã pʋgẽ.” Pap Benowa piig la yoob soabã me yeela a sebr a yembr (Jésus de Nazareth) pʋgẽ tɩ “Wẽnnaam Rĩungã bee sũur sẽn kelgd pʋgẽ.”