D sõngda neb nins sabab-wẽns sẽn paamã

Yʋʋmd 2020 wã pʋgẽ, sabab-wẽns buud toor-toor n zĩndi, tɩ koronavirisã bã-longdgã me sɩng dũniyã gill zugu. Wãn to la a Zeova Kaset rãmbã sõng neb nins sabab-wẽnsã la bã-longdgã sẽn namsã?

Yʋʋmd 2020 wã pʋgẽa, siglgã taoor lʋɩtb sulã taoor lʋɩtbã sull kõo sor tɩ b yiis sẽn yɩɩd milyaar 14 n na n sõng neb nins sabab-wẽns sẽn paamã. Rẽ sõngame tɩ b tõog n sõng neb sẽn be sõngr daab pʋgẽ sabab-wẽns sẽn yɩɩd bãmb 200 yĩnga, wala neb sẽn dat sõngr koronavirisã sẽn wa ne zu-loees ninsã yĩnga, seb-kãsemse, sa-bɛd sẽn ni Afiriki, kom sẽn kẽ Venezuela soolmẽ wã, la war sẽn zĩnd Zimbabuwe soolmẽ wã yĩnga. Ligdã y sẽn kõtã sõngame tɩ b tõog n da rɩɩbo, koom, gãag teedo, fu-yerdɩ, tɩto, safãnde, la teed n na n manes rotã. D gom bũmb a wãn b sẽn maan yelle, n sõng nebã.

KORONAVIRISÃ. Dũniyã gill zugu, bã-longdgã namsa d tẽed-n-taasã wʋsg bũmb toor-toor wɛɛngẽ. Sẽn na yɩl n sõng d tẽed-n-taasã, b lugla sẽn yɩɩd sulã 800 nebã sõngr yĩng dũniyã gill zugu. Sul-kãensã saam-biisã baoodame n bãng bũmb nins sẽn yaa tɩlɛ ne d tẽed-n-taasã, la b gʋls rẽ n togs vẽenega. Woto sõngda sulã taoor lʋɩtbã sull tɩ b bãng b sẽn na n wilg-b sor to-to, tɩ sõngrã tʋʋmdã zems sõma.

Yʋʋmdã pʋgẽ, sull nins sẽn get nebã sõngrã yell sabab-wẽns sasa wã sõnga neb wʋsg tɩ b paam rɩɩbo, koom, tʋʋm-teed yɩlgrã yĩnga, la tɩt nins sẽn yaa tɩlɛ wã. Sẽn paase, bãmb ne kãsem-dãmb kẽer naaga taab n tʋm sẽn na yɩl n tõog n sõng b tẽed-n-taasã tɩ b paam b tẽngã goosneemã sõngre.

Neb nins sẽn pa a Zeova Kaset rãmbã yãa tʋʋmd ning d sẽn tʋm nebã sõngrã wɛɛngẽ wã. Wala makre, a Field Simwinga sẽn yaa Nakonde tẽngã sẽn Zãmbi soolmẽ wã taoor soab a ye wã yeelame yaa: “Tõnd pʋʋsda yãmb bark wʋsg yãmb sẽn tall bũmb nins fãa sẽn yaa tɩlɛ ne nebã n wa sõng zags rãmb nins sabab-wẽngã sẽn paamã. Sõngrã zemsa a wakate.”

Komã sẽn zĩnd Ãngola soolmẽ wã. Koronavirisã yĩngã, rɩɩb ra pa le wae Ãngola soolmẽ wã ye. Sẽn paase, ligdã ra paasa wʋsgo. Ra maneg n lebgda toog ne d tẽed-n-taas wʋsg tɩ b tõog n da rɩɩbã.

B kosa Berzɩll filiyallã tɩ b sõng d tẽed-n-taasã sẽn be Ãngola wã, n bao rɩbd toor-toor n ning kord pʋsẽ n tool-ba. Sẽn na yɩl n tall ligdã d sẽn kõt sabab-wẽns yĩngã n tʋm tɩ zemse, saam-biisã maaga b yĩng n maan vaeesg rɩbd nins b sẽn na n da wã wɛɛngẽ, b sẽn na n maan to-to n da rɩɩbã, la b sẽn na n maan to-to n tool rɩɩbã. B raa rɩɩbã zembala. Rẽ wɛɛngẽ, d sã n pʋɩ tɩ zemse, korg fãa pʋgẽ, rɩbd nins b sẽn da n ning be wã la b toolgã ligdã zemsa tus a yi la zaka. Korg fãa ra kolga kilo 20 tɩ bũmb toor-toor be a pʋgẽ. Wala makre, b ninga mui, bɛnga, la kaam. Hal n tãag masã, yaa kord bãmb 33 544 la b tool-yã. Taa ton 654. Bõn-kãensã n paas rɩbd a taab b sẽn da n paas sõnga sẽn yɩɩd neb tus 50 tɩ b paam rɩɩbo.

Tõnd tẽed-n-taasã tagsg yaa wãn ne sõngrã b sẽn paamã? A Alɛgsãndr bee Ãngola tẽng a ye sẽn zãre. Ad a sẽn yeele: “Mam geta sõngrã m sẽn paamã wa kaset sẽn wilgd t’a Zeova nonga maam, la tɩ m pa m yembr ye. M tara yõod a Zeova siglgã pʋgẽ!” A Mariza sẽn yaa pag sẽn wubd a biig a yembrã yeelame yaa: “A Zeova kelga mam pʋʋsgã. M pʋʋsd-a-la barka, la m pʋʋsda a siglgã me barka.”

Warã sẽn zĩnd Zimbabuwe soolmẽ wã. Yʋʋmd 2020 wã pʋgẽ, war meng-meng n zĩnd Zimbabuwe soolmẽ wã, tɩ kɩt tɩ kom nams neb milyõ-rãmba. Zimbabuwe soolmẽ wã, a Zeova Kaset rãmb tus ka tɛk n da pa le tõe n paam dɩɩbo.

B lugla sula a nu nebã sõngr yĩnga, tɩ b na n sõng d tẽed-n-taasã tɩ b paam rɩɩbo. Koe-moondb bãmb kobs n sõng n sui rɩbdã kord pʋsẽ, la b wʋk n sag kamyõ-rãmbã pʋsẽ, tɩ kẽer kõ b mobila n na n sõng ne wʋkrã.b Yʋʋmd 2020 wã pʋgẽ, b yiisa sẽn yɩɩd milyõ 345 n na n sõng sẽn yɩɩd neb 22 700 tɩ b paam rɩɩbo.

Zĩis wʋsgo, sõngrã sẽn ta wã, kell n mikame tɩ yaa d tẽed-n-taasã rɩɩb sẽn nan sate. Rɩɩbã sẽn ta wã, d tẽed-n-taasã pẽga a Zeova. Kẽer meng sɩngame n yɩɩnd Rĩungã yɩɩla.

Tẽng a yembr pʋgẽ, a Zeova Kaset rãmb a yiib sẽn yaa pʋg-kõap n kẽng tigsg b sakã neb sẽn maane, sẽn na yɩl n gom rɩɩb Owɛnze (ONG) a ye sẽn tool yelle. La tigsgã sasa, sõsgã wa n teesa politikã yell goam n tɩ yɩɩda, tɩ kɩt tɩ saam-bi-pogsã wilg tɩ b pa na n sak n maan bũmb nins b sẽn yeel tɩ b maanã, sẽn na yɩl n paam sõngrã ye. B sẽn yik n loogdẽ wã, b ra yaand-b lame la b yet-b yaa: “ Ra n wa-y tõnd nengẽ n wa kos rɩɩb koe!” La semen a yiib poor bala, tõnd saam-biisã tõog n taa tẽn-kãng pʋgẽ, n kõ d saam-bi-pogsã rɩɩbo, tɩ Owɛnze sõngrã meng nan pa ta ye.

Sẽn paase, d tẽed-n-taasã sẽn paam sõngrã Zimbabuwe soolmẽ wã kɩtame t’a Zeova yʋʋrã paam pẽgre. Wala makre, d gom a Priska yelle. A bee Zimbabuwe tẽn-bil a ye. Baa ne warã sẽn wa ne zu-loees ninsã, arb la arzũm fãa, a Priska ra yita koɛɛgã moonego, baa sẽoogã wakate. Nebã ra yaand-a lame, n yet-a yaa: “Fo na n kɩtame tɩ f zakã rãmb ki kom, f koɛɛgã mooneg yĩnga.” A Priska ra leokdame yaa: “A Zeova zɩ n bas neb nins sẽn tũud-a wã ye.” Pa yã n kaoos la a paam sõngr ne tõnd siglgã maasem ye. Rẽ linga a tẽngã neb kẽere, tɩ b yeel a Priska yaa: “Wẽnnaam zɩ n bas foom ye. Rẽ n so tɩ tõnd dat n bao bãng-a n paase.” Masã, yaa neb a yopoe la sẽn kelgd tigissã b sẽn ẽnrezɩstre tɩ b yiisd radio wã pʋgẽ.

Dũni-kãngã saabã sẽn kolgdã yĩnga, d na n ket n paamda sabab-wẽnse. (Matiye 24:3, 7) D pʋʋsda yãmb bark wʋsgo, yãmb sẽn kẽed donate.jw.org pʋgẽ wã n kõt kũunã. Sõngdame tɩ d tõe n ges tɩ neb nins sabab-wẽnsã sẽn paamdã paam bũmb nins sẽn yaa tɩlɛ wã, la sẽn zems a wakate.