A Zeova Kaset rãmbã wãada zags bɩ, bɩ b sõngdame tɩ zagsã rãmb zĩnd-n-taarã noomẽ?

Tõnd sẽn yaa a Zeova Kaset rãmbã, d modgdame sẽn na yɩl tɩ d zagsã rãmb la d taabã zagsã rãmb zĩnd-n-taarã maneg n yɩ noogo. Tõnd waoogda d Wẽnnaamã, bala yaa yẽ la zakã lugunda. (Sɩngre 2:21-24; Efɛɛz rãmbã 3:14, 15) Biiblã pʋgẽ, a kõo noy la sagls sẽn sõng neb sẽn be dũniyã gill zugu, tɩ b kãadmã noomẽ.

Wãn to la a Zeova Kaset rãmbã sõngd zagsã rãmb tɩ b zĩnd-n-taarã noomẽ?

D modgda ne d sũur fãa n tũud Biiblã saglsã, bala rẽ sõngdame tɩ d yaa sɩd-sõma, pʋg-sõma la roagdb sẽn get b kambã yell neere. (Yel-bũnã 31:10-31; Efɛɛz rãmbã 5:22–6:4; 1 Tɩmote 5:8) Yam ning sẽn yit Biiblã pʋgẽ wã sõngda baa zags nins neb sẽn yaa tũudum toor-toorã, tɩ b tõog tɩ b zĩnd-n-taarã maneg n yɩ noogo. (1 Pɩyɛɛr 3:1, 2) Ad neb sẽn pa a Zeova Kaset rãmb sɩdb wall b pagb sẽn lebg a Zeova Kaset rãmb sẽn yeele:

• “Tõnd kãadmã pipi yʋʋmdã n tãag yʋʋm a yoob-n-soabã, ra yaa zab la sũ-sãams wakat fãa. La a Ivɛt sẽn lebg a Zeova Kaset soabã tɛka, a maneg n bɩɩsa nonglem, la a tar sũ-mar n yɩɩd pĩndã. A sẽn toeem to-to wã sõngame tɩ tõnd kãadmã pa kao ye.”—A Clauir, Berzɩll.

• “Mam sɩd a Chansa sẽn wa n sɩng Biiblã zãmsg ne a Zeova Kaset rãmbã, mam da pa rat ye. Bala m da tagsdame tɩ b wãada zagse. La m wa bãngame tɩ yaa Biiblã n sõng tɩ sũ-noog be d zakã pʋgẽ.”—A Agness, Zãmbi.

Koɛɛgã mooneg sasa, d wilgda d taabã Biiblã saglsã sẽn kõt yamã tũub sẽn tõe n sõng-b to-to tɩ b

• bãng n bao pʋg-sõng wall sɩd-sõngo

• bãng b sẽn tõe n maan to-to n tõog n mao ne zu-loees nins b sẽn na n paam b kãadmã pipi yʋʋmdã pʋgẽ wã

• bãng b manesem sẽn segd n yɩ to-to ne b pagã wall b sɩdã ma bɩ a ba wã

• bãng n zã b ligdã

• bas zaba la no-koɛɛma

• bãng n kõt taab sugri

• bãng n wub b kambã

Ned sã n lebg a Zeova Kaset soaba, wata ne zab a kãadmã pʋgẽ bɩ?

Togs sɩdã, mii n wata ne zab kãadmã pʋgẽ. Wala makre, yʋʋmd 1998 wã, siglg a yembr (institut de sondage Sofres) neb maana vaeesgo, n mik tɩ kãadem 20 zugu, yaa kãadem a yembr bal pʋgẽ la zu-loe-kɛgems zĩnd-yã, pagã wall a sɩdã sẽn lebg a Zeova Kaset soabã poore.

A Zeezi ra pĩnd n togsame tɩ sasa ninga, neb nins sẽn tũud a zãmsgã zags rãmb na n nams-b lame. (Matiye 10:32-36) A Will Durant sẽn yaa kʋdemd yɛl-mitã yeelame tɩ Rom soolmẽ wã, “b ra rõta kiris-nebã tɩ yaa bãmb n wãad zagsã.”a Rũndã-rũndã, b rõta a Zeova Kaset rãmb kẽer me woto. La rat n yeelame tɩ yaa ned ning sẽn yaa a Zeova Kaset soabã n wat ne no-koɛɛmã zakã pʋgẽ bɩ?

B sẽn dõt a Zeova Kaset rãmbã tɩ b wãada zagsã yĩnga, Erop bʋ-kaoodbã sull ning sẽn get ninsaalbã dʋrwa-rãmb yellã kaoo bʋʋd n yeel tɩ naoor wʋsgo, yaa zakã neb nins sẽn pa a Zeova Kaset rãmbã n wat ne zabã, bala b “pa rat n sak n deeg tɩ b roagdã tara sor n tõe n lebg a Zeova Kaset soab ye.” Sullã paasame yaa: “Yel-kãng wae n bee zags nins fãa pʋsẽ pagã ne a sɩdã sẽn pa be tũudum a yembr pʋgẽ wã. Pa zags nins pʋsẽ pagã bɩ sɩdã sẽn lebg a Zeova Kaset soabã pʋsẽ bal ye.”b Baa nebã sã n wa namsd-b b tũudmã yĩnga, a Zeova Kaset rãmbã modgdame n tũud saglg sẽn be Biiblã pʋgẽ. Ad saglgã: “Ra maan-y ned baa a ye wẽng n lebs ye. . . . Sã n tõeyã, la sã n bee ne yãmb bɩ y kɩt tɩ laafɩ zĩnd yãmb ne nebã fãa sʋka.”—Rom dãmbã 12:17, 18.

Bõe yĩng t’a Zeova Kaset rãmbã tẽed tɩ b segd n kẽe kãadem bãmb ne taab sʋk bala?

A Zeova Kaset rãmbã tũuda Biiblã noor ning sẽn yet tɩ b segd n kẽe kãadem “Zu-soabã pʋgẽ bala,” rat n yeel tɩ b segd n kẽe kãadem ne neb sẽn be tũudum-yɛng ne bãmba. (1 Korẽnt rãmbã 7:39) Noorã yita Biiblã pʋgẽ, a tũub me tara yõod wʋsgo. Wala makre, yʋʋmd 2010, zʋrnall a ye (Journal of Marriage and Family) sõsg pʋgẽ, b yeelame tɩ naoor wʋsgo, “pag ne a sɩd sã n be tũudum a yembr pʋgẽ, tɩ b yel-maandɩ wã la b sẽn tẽed bũmb ninsã yaa a ye,” b zĩnd-n-taarã nooma wʋsgo.c

La a Zeova Kaset rãmbã pa sagend b tẽed-n-taasã tɩ b bas b sɩd wall b pag sẽn pa a Zeova Kaset soab ye. Biiblã yetame yaa: “Saam-biig sã n tar pag sẽn pa tẽeda, tɩ pagã sak n na n kell n zĩnd ne-a, bɩ saam-biigã ra bas-a ye. La pag sã n tar sɩd sẽn pa tẽeda, tɩ sɩdã sak n na n kell n zĩnd ne-a, bɩ pagã ra loog n bas a sɩdã ye.” (1 Korẽnt rãmbã 7:12, 13) A Zeova Kaset rãmbã tũuda no-kãnga.