KAREMDBÃ SOGSGO

A Davɩɩd sẽn yeel bũmb ning tɩ be Yɩɩl Sõamyã 37:25, ne a Zezi goam nins sẽn be Matɩe 6:33 wã rat n yeelame t’a Zeova pa na n tol n bas tɩ kom yõk kiris-ned bɩ?

A Davɩɩd yeela woto: ‘Mam nan ka yã tɩ Wẽnnaam bas nin-tɩrg ye, la mam nan ka yã t’a yagens bõosd rɩɩb me ye.’ A sẽn yeelã yaa a sẽn yã yẽ mengã vɩɩmã pʋgẽ. (Yɩɩl 37:25) La a ra pa rat n yeel tɩ wẽn-sakd zɩ n kong bũmb nins sẽn yaa tɩlae ne-a, bɩ t’a pa na n tol n kong bõn-kãens ye.

A Davɩɩd vɩɩmã pʋgẽ, a sega zu-loees wʋsgo. Vugr menga, yɩɩ tɩlae t’a zoe n fãag a yõore, bala a Sayull ra baood-a lame n na n kʋ. A Davɩɩd ne a nebã rɩɩb ra wa n kolga saabo, la a kẽngame n tɩ kos rao a ye buri. (1 Sãm. 21:2-7) Dẽnd so-kãngã, a Davɩɩd mengã ‘bõosa rɩɩbo.’ La baa ne sẽn da pa nana ne-a wã, a ra miime t’a Zeova pa bas-a ye. Sɩd me, Biiblã zĩig baa a ye pa wilg t’a Davɩɩd ra saad n bõosda rɩɩb sẽn na yɩl n paam n vɩɩmd ye.

Matɩe 6:33 pʋgẽ, a Zezi yeelame tɩ neb nins sẽn lʋɩɩsd Rĩungã yɛl taoorã tõe n basa b yam, bala Wẽnnaam na n gesame tɩ b paam bũmb nins sẽn yaa tɩlae ne-bã. A yeelame: “Bɩ y reng n bao Wẽnnaam soolem ne bãmb tɩrlem, la bõn-kãens fãa [rat n yeel tɩ rɩɩbo, koom la futu] na paas yãmba.” La a Zezi wilgame me tɩ namsgã yĩnga, kom na n yõka yẽ ‘ba-biisã.’ (Mat. 25:35, 37, 40) Sɩd yɩɩ woto ne tʋm-tʋmd a Polle. Naoor wʋsgo, kom la ko-yũud yõk-a lame.—2 Kor. 11:27.

A Zeova wilgame tɩ b na n namsa a nin-buiidã ne manesem buud toor-toore. Tõe t’a na n basame tɩ d kong bũmb kẽere, d sẽn dat n wilg tɩ Sʋɩtãanã sẽn yeelã yaa ziri wã yĩnga. (Zoob 2:3-5) Wala makre, Nazi-rãmbã yõka tõnd saam-biis kẽer n tɩ kẽes kã de kõnsãntrasiõ rãmb pʋsẽ, n nams-b hal tɩ b vɩɩmã ra be yell pʋgẽ. B monga a Zeova Kaset rãmbã rɩɩbo, n bas tɩ komã nams-ba. A Sʋɩtãan n maan woto n da rat tɩ b kɩɩs a Zeova. Ne rẽ fãa, Kaset rãmbã kell n saka a Zeova, la yẽ me pa tol n bas-b ye. Yaa sɩd t’a basame tɩ zu-loeesã paam-ba, wa a sẽn bas tɩ kiris-neb kẽer me segd zu-loees rũndã-rũndã wã. La yaa vẽeneg t’a Zeova sõngda neb nins fãa sẽn segd zu-loees a yʋʋrã yĩngã, tɩ b tõe n tõog toogo. (1 Kor. 10:13) D tẽeg goam nins sẽn be Filip rãmb 1:29 pʋgẽ wã. Be b yetame: “Pʋɩɩr Kirist yĩng ka tɩ yãmb tẽ bal ye, la a yaa tɩ yãmb na nams bãmb yĩng me.”

A Zeova pʋlmame t’a pa na n tol n bas a nin-buiidã ye. Wala makre, Ezai 54:17 yetame: “Zab-teed nins fãa neb sẽn maand n na n zab ne foomã ka na n tõog ye.” La pa rẽ bal ye. Bũmb a taab me la a pʋlem-yã, tɩ d tõe n bas d yam t’a na n kogla a nin-buiidã. La kiris-ned fãa tõe n wa sega zu-loeese, hal tɩ tõe n tũ ne a yõor menga.