Yãmb nanda a Zeova sũ-marã bɩ?
1 A Zeova sã n da ka tallẽ sũ-mar yʋʋm 10, 20, bɩ yʋʋm sẽn yɩɩd woto sẽn loogã n bas tɩ b kõ kasetã n paase, y ra na bãngẽ sɩdã? Ad d sɩd tar mi-beoog a sẽn bas tɩ neb wʋsg sẽn yɩɩd ‘yam tek tɩ b kos sugrã.’ Baasgo, a Zeova bʋ-kaoorã ra-kãseng “na n waa wa wagdre.” (2 Pɩɛ. 3:9, 10) Woto yĩnga, d ka segd n tudg n tags tɩ Wẽnnaam sẽn yaa sũ-mar soabã, a kaoosda yɛl siglg kãngã sãoong ye.—Hab. 2:3.
2 Zoe-y neba ninbãanega: A Zeova sũ-marã yɩɩda tõnd sẽn tõe n wʋm a võor zĩig sẽn zãre. D ka tog n yĩm a sũ-marã bõn-datl ye. (Zon. 4:1-4, 11) A Zeova nee ãdem-biisã naong n zoet b ninbãanega. Yaa woto me ne a Zezi. Kʋʋngã a sẽn moonã ninbãaneg yõk-a lame, t’a tʋlg tɩ koe-moonegã tʋʋmd paam pãng n paas sẽn na yɩl tɩ neb wʋsg sẽn yɩɩd tõog n paam vɩɩm sẽn ka sɛtã.—Mat. 9:35-38.
3 Yel-beed bɩ sabab wẽns sã n wa wa, rẽ yĩnga neb nins sẽn ka mi sɩdã ninbãaneg ka yõkd tõnd sɩda? Rũndã-rũndã, neba yaa wa “piis sẽn ka tar pe-kɩɩm” wakat ning b sẽn maood ne dũniyã zũnd-zãnd la b rat n wʋm-b võorã. (Mark 6:34) Tõnd sã n moond koe-noogã ne yẽesem, d belsda b rãmb nins sẽn tar sũ-sõngã, la d wilgd d naneb ne a Zeova sũ-marã.—Tʋʋ. 13:48, NW.
4 Tõnd tara tʋʋm-yãgdem: Rɩẽ neb 323 439 n deeg lisg tɩ neb sẽn yɩɩd 14 000 000 wa Tẽegrã. Ad rẽ sɩd wilgdame tɩ neb wʋsg sẽn yɩɩd ket n tõe n põsa yɛl siglg wẽng kãngã sãoongo! Tõnd ka mi ‘kʋʋng kãsengã’ waooglem sẽn na n ta to-to ye. (Wil. 7:9) D leb n ka mi tʋʋmdã b sẽn bobl-d tɩ d moonã sẽn na n kaoos to-to ye. La a Zeova miimi. Koe-noogã na n mooname hal tɩ wa ta a sẽn datã, “dẽ, dũniyã sɛɛb na yaool n ta.”—Mat. 24:14.
5 Wakatã sẽn ketã lebga bilfu, tɩ Wẽnnaam daarã pẽneg wʋsgo. (1 Kor. 7:29a; Heb. 10:37) Sãmbg sẽn ka be, “tõnd fãagr kolgame n yɩɩd tõnd sẽn da tẽ wakate.” (Rom 13:11) Bɩ d ra kong Wẽnnaam sũ-marã bõn-datl võor wʋmb ye. Sẽn yaa lebende, ne yãgbo, bɩ d moon sẽn na yɩl tɩ neb wʋsg sẽn yɩɩd sẽn baood tɩrlem bãng a Zeova ninbãan-zoeer sẽn yaa kãsengã.