Paam-y yam sõma saabã sẽn kolgdã yĩnga
1 Naoor wʋsgo Wẽnnaam Gomdã wilgame t’a Zeova daarã na n ‘waa wa wagdre,’ sẽn dat n yeel t’a na n waa zĩig pʋgẽ ne lingri. (1 Tes. 5:2; Mat. 24:43; 2 Pɩɛ. 3:10; Wil. 3:3; 16:15) ‘Yaa woto yĩng’ la a Zezi sẽn yeel tɩ ‘d segl tɩ Ninsaal Biiga wata wakat ning tõnd sẽn ka tẽedã.’ (Mat. 24:44) Saabã sẽn kolgdã yĩngã, wãn to la d tõe n ket n yaa neb sẽn yaa gũusdb tẽebã wɛɛngẽ? Bũmb sẽn tõe n sõng tõnd tɩ d maan dẽ yaa sagl-kãngã vʋʋsem sõng sẽn vẽnegã: “Bɩ yãmb paam yam sõama.”—1 Pɩɛ. 4:7.
2 D sã n dat n paam yam sõma, rɩlla d ges yɛlã wala a Zeova sẽn get-b to-to wã. (Ef. 5:17) Yam sõama wã sõngda tõnd tɩ d ges tõnd mensã wa ‘sãamb la kaoos-wet’ masã zãmaanã neb sʋka. (1 Pɩɛ. 2:11, Kãab-paalgã Koe-noogo) Rẽ na n kɩtame tɩ d bãng bũmb nins sẽn sɩd tar yõodã n welge, tɩ d yãk bõn-datɩ, la d rɩk sard sẽn yaa sõma.—Fil. 1:10.
3 Yãk-y tẽeb bõn-datɩ: Tẽeb bõn-datɩ yãkr la b pidsg sõngda tõnd tɩ d yɩ neb sẽn tar yam sõma. Yãmb tara tẽeb bõn-datɩ n baood n na n pids-b bɩ? Yãmb modgdame n karemd Biiblã daar fãa, n dabd kiris-neb tigissã fãa, n karemd Gũusg Gasgã la Réveillez-vous ! wã zʋrno rãmb fãa, bɩ n wɩngd ne moonegã tʋʋmd n paasdẽ bɩ? Yãmb sã n yãk tẽeb bõn-datɩ sẽn zems y sẽn tõe n pidsi, n modg n wa tõog n pids-ba, la y kos a Zeova t’a bark y modgrã, biis nins y sẽn na n paama tõe n ling-y lame.
4 Kãsem soab n sok ned ne a pag b tẽeb bõn-datɩ sẽn da yaa b rãmba. Rẽ kɩtame tɩ b mik tɩ b sã n gĩdg b vɩɩmã ne yɛl wʋsg la b yao sam wʋsgã sẽn da kõt-b yɩɩrã, b tõogdẽ lame n yɩ so-pakdba. B yãka yam tɩ rẽ n na n yɩɩ b bõn-datla. B modgame n yao b sama, la b bas yɛl nins sẽn ka tɩlae wã sẽn da sãamd b sẽkã la b pãngã tɩ lʋɩ. Yʋʋmd a ye loogr poor bala, b pidsa bõn-datlã. Rẽ biis yɩɩ bõe? Sɩdã yeelame: “D sã n da ka tarẽ bõn-datɩ, d kõn tõog n maanẽ bũmb nins d sẽn maanã ye. D tara sũ-noog n yɩɩda. Tõnd vɩɩmã bee bãan n yɩɩd la a yaa sõma n yɩɩda. Tõnd vɩɩmã sɩd tara võor masã.”
5 D sẽn gũud a Zeova daarã, bɩ d tall yam sõma n ket n yaa neb sẽn yaa gũusdb tẽebã wɛɛngẽ, n tik d yamã a Zeova raabã maaneg zugu.—Tɩt 2:11-13.