D kõ a Zeova d sẽn tar tɩ yaa sõma n yɩɩdã
1 Tõogã a Zeova sẽn kõ Israɛllã wilgdame tɩ b sẽn talld rũms nins n maand maoong n kõt yẽ wã segd n yɩɩ ‘sõama zãnga.’ A Zeova ka sakd rũng sẽn ka sõama zãng ye. (Maan. 22:18-20; Mal. 1:6-9) Sẽn paase, b sã n da maan maoongo, a Zeova n so kaamã fãa, sẽn dat n yeel tɩ rũngã babs nins sẽn yaa sõma n tɩ yɩɩdã. (Maan. 3:14-16) A Zeova sẽn da yaa Israɛll nebã Ba la b Zusoab sẽn yaa kãsengã yĩngã, a ra segda ne b sẽn tar tɩ yaa sõma n tɩ yɩɩdã.
2 Wa sẽn da yaa to-to pĩndã, rũndã-rũndã me Wẽnnaam datame tɩ d sẽn kõt-a bũmb ningã yɩ sõma. Tõnd segd n balma a Zeova ne waoogr ning a sẽn segd ne wã. Yaa sɩd tɩ neba fãa yɛl ka taab ye. La d bee bʋʋm n na n fees d meng n bãng d sã n kõta a Zeova d sẽn tar tɩ yaa sõma n tɩ yɩɩdã.—Ef. 5:10.
3 D balem a Zeova ne d sũur fãa: D sã n dat tɩ koɛɛgã d sẽn moondã waoog a Zeova la kẽ d kɛlgdbã sũyã, d ka segd n maand-a bal d wee n maan-a ye. Tõnd sũurã sẽn pid ne mi-beoogã, segd n kɩtame tɩ d gomd tõnd Wẽnnaamã la a raabã yelle. (Yɩɩl 145:7) Rẽ wilgda vẽeneg tɩ tara yõod tɩ d tall Biibl kareng la a zãmsg na-kẽndre.—Yel. 15:28.
4 Sẽn na yɩl n kõ a Zeova d sẽn tar tɩ yaa sõma n tɩ yɩɩdã, d segdame me n dɩk a togs-n-taar n nong nebã. (Ef. 5:1, 2) D sã n nong nebã, rẽ na n kɩtame tɩ d bao n taas sɩdã koɛɛg neb wʋsg wa d sẽn tõe tɛka. (Mark 6:34) Rẽ kɩtdame tɩ d wilg tɩ neb nins d sẽn gomd ne wã yell pak-d lame. Rẽ na n kɩtame tɩ d ket n tagsd b yell d sẽn kẽng b nengẽ pipi wã poore, la d lebg n tɩ ges-ba. Rẽ kɩtdame tɩ d maan d sẽn tõe fãa n sõng-b tɩ b bɩ tẽebã wɛɛngẽ.—Tʋʋ. 20:24; 26:28, 29.
5 ‘Maand sẽn yaa pẽgre’: Bũmb a to d sẽn tõe n maan n kõ a Zeova d sẽn tar tɩ yaa sõma n yɩɩdã yaa d sẽn na n modg sõma ne koe-noogã moonego. D sã n sigl d yɛlã sõma la d tik d yamã moonegã tʋʋmd zugu, d na n tõog n maana tʋʋm wʋsg sẽk ning d sẽn tarã pʋgẽ. (1 Tɩm. 4:10) D sã n segl sõma, sõngdame tɩ d goamã yɩ vẽenese, la yɩ ne bas-yardo, tɩ rẽ na n sõng tɩ nebã kelg tõnd n yɩɩda. (Yel. 16:21) D sã n taas neb a taabã koe-noogã, b tõe n sɩd yeelame tɩ goam nins sẽn yit tõnd sũurẽ wã yaa ‘maand sẽn yaa pẽgre.’—Heb. 13:15.