D maan neere, la d sõng neb a taabã
1 A Dorkas ra “maana tʋʋm-sõama wʋsg n sõng naong rãmba.” (Tʋʋ. 9:36, 39) A sẽn da yaa kõtã yĩng kɩtame t’a mitbã, la Wẽnnaam a Zeova ra nong-a. Hebre dãmba 13:16 yeta woto: “Bɩ y ra yĩm tɩ maan neere la sõng neba ye, tɩ bõe, maand kãens nooma Wẽnnaam sũuri.” Rũndã-rũndã, wãn to la d tõe n maan neer la d sõng neb a taabã?
2 Bũmb a ye d sẽn tõe n maan n sõng nebã, yaa d sẽn na n yãk d ‘paoongã’ bɩ bõn-sõma nins tõnd sẽn tarã n kõ-ba. (Yel. 3:9) Ligdã d sẽn kõt n teend dũni gill koe-moonegã sõngdame tɩ b met Rĩungã Roto, Tigis-kãsems rot la tʋʋmdã wil rot dũniyã gill zugu. D sẽn yaa kõtbã yĩng kɩtame tɩ neb milyõ rãmb paamd zãmsg sẽn yit Wẽnnaam nengẽ la lagem-n-taar sẽn kengd tẽebo.
3 D kõta d sõngr la belsgo: Yel-beed sã n wa maan tẽngẽ, a Zeova nin-buiidã maanda b saam-biisã la neb a taabã sẽn be beenẽ wã “yel-sõmde.” (Gal. 6:10) Luzin sẽn da pusg Fãrens tẽngẽ wã poore, pag a ye ne a sɩd sẽn da vɩ yambẽ be yeelame: “Tõnd kiris-nin-taasã wa n sõng-d-la zĩig pʋgẽ. B pɩɩsa tõnd roogã la neb a taab me roto. Tõnd yagsã sẽn yã neb wʋsg woto sẽn wa n na n sõng tõnd ne tʋʋmã, ling-b lame.” Saam-bi-poak a yembr me yeelame: “Kãsem dãmbã wa n sõnga tõndo. B wa n kenga d raoodo. Sɩd me, tõnd da rata raood kengr n yɩɩd sẽn ketã fãa.”
4 Baa ne d sẽn tõe n maan d taabã neer ne manesem toɛy-toɛyã, bũmb ning sẽn yaa sõma n yɩɩda, yaa d sẽn na n sõng-b tɩ b bãng sɩd ning sẽn tõe n kɩt tɩ b tall “tẽeb ne vɩɩm sẽn ka sɛtã” a Zeova meng sẽn kãabã. (Tɩt 1:1, 2) Biiblã sẽn tar koɛɛg ningã kõta neb nins sũy sẽn sãam ne dũniyã yɛl la b mens pãn-komsmã belsg hakɩka. (Mat. 5:4) Bɩ d ket n maand neere, la d sõngd neb a taabã, tɩ sã n tõeyã.—Yel. 3:27.