D “togsd Wẽnnaam koɛɛgã ne raoodo”
1 Y sã n mi n paam weer n na n moon koɛɛgã y lekollẽ wall y tʋʋmã zĩigẽ, y mi n yɛɛsdame bɩ? Rẽ yĩnga yaa toog tɩ y moon y roagdba, y yags bɩ neb a taab y sẽn mi, wakat y sẽn pa yãk sasa bɩ? Bõe n na n sõng d fãa tɩ d tõog n “togsd Wẽnnaam koɛɛgã ne raood” sẽn yaa sasa ning fãa?—Fil. 1:14.
2 Da yɛɛs-y ye: Rẽ yĩnga y na n yɛɛsame n pa sõng y zo-nongr bɩ y roagd b sẽn dõd zaalem bɩ? Hal pĩnd wẽndẽ n tãag masã, b rõda a Zeova sẽn yaa tõnd zo-nongr n yɩɩdã. Yaa zu-no-kãseng la tõnd tara, d sẽn tõe n kõ kaset Wẽnnaam yʋʋrã yĩnga! (Ezai 43:10-12) D sã n nong Wẽnnaam wʋsgo, tõe n sõnga tõnd tɩ d ra zoe yãnd bɩ rabeem, la kɩt tɩ d moon koɛɛgã ne raoodo.—Tʋʋ. 4:26, 29, 31.
3 D tẽeg tɩ koɛɛg ning d sẽn moondã yaa koe-noogo. Nebã sã n tũud-a, b na n paamã nafa sẽn ka sate. D sã n tagsd koe-noogã yõod n pa tags d meng yell bɩ neb nins sẽn kɩɩsd koɛɛgã yelle, na n sõng-d lame tɩ d moon ne raoodo.
4 Neb a taabã mak-sõngo: Neb nins sẽn sak n moon Wẽnnaam Gomdã ne yẽesmã mak-sõng tõe n kenga d raoodo. Wala makre, ne raoodo, a Enok moona wẽn-kɩɩsdbã t’a Zeova na n kaoa b bʋʋdo. (Ziid 14, 15) A Nowe sak n moona neb sẽn da pa rat n kelg a koɛɛgã sõma. (Mat. 24:37-39) Baa ne kɩɩsgã, pipi kiris-nebã sẽn da yaa “nin-tals sẽn ka paam zãmsgã” kell n moona koɛɛgã. (Tʋʋ. 4:13, 18-20) Naoor wʋsgo, Gũusg Gasgã la Réveillez-vous ! wã pʋgẽ b wilgda kibay sẽn wilgd neb sẽn tẽ a Zeova tɩ sõng-b tɩ b pa zoe neb rabeem, la kɩt tɩ b lebg koe-moondb sẽn tar yẽesem.
5 D sã n tagsd pĩnd wẽndẽ wẽn-sakdb nins sẽn paam zu-loeesã vɩɩm zugu, na n sõng-d lame tɩ d tall raoodo. (1 Rĩm 19:2, 3; Mark 14:66-71) ‘Wẽnnaam kõ-b-la raoodo,’ tɩ b tõog n togs koe-noogã n pa yɛɛs ye. Tõnd me tõe n maana woto!—1 Tes. 2:2.