Wãn to la d tõe n sõng sẽn wa-b Tẽegrã?
1. Koe-bʋg sẽn tar yõod wʋsg la d na n kelg yʋʋmd 2008 tʋʋlg kiuugã rasem 22 raarã?
1 Yʋʋmd 2008 tʋʋlg kiuugã rasem 22 raare, neb milyõ rãmb dũniyã gill zug n na n kelg koɛɛg sẽn tar yõod wʋsgo. Sẽn na n wa-b Tẽegrã na n bãngame t’a Zeova nonglmã ka to ye. Bala a kõo rondã n na n fãag ãdem-biisã. (Zã 3:16) B na n bãnga yɛl wʋsg Rĩungã zugu, la b bãng a Zeova sẽn na n tũnug ne-a to-to n kɩt tɩ tẽngã lebg wa a sẽn da ratã. (Matɩe 6:9, 10) B na n yãa nonglem la zems-n-taar ning sẽn be Wẽnnaam nin-buiidã sʋkã, la b bãng tɩ d reegda neb sãand sõma.—Yɩɩl 133:1.
2. Wãn to la d tõe n sõng neb nins sẽn zãmsd Biiblã sẽn wa-b Tẽegrã?
2 Neb nins sẽn zãmsd Biiblã: Neb kẽer sẽn nan sɩngd Biiblã zãmsg ne tõndã na n waa Tẽegrã. D segd n talla nin-kãens n tɩ wilg saam-biisã, n tall-b n gilg tɩ b ges Rĩungã roogo, la d wilg-b tigissã sẽn maand semen fãa wã. Tẽegrã sõsg sasa, sõsdã na n sagla nin-kãensã tɩ b kell n modg n yɩ a Zeova zo-rãmbã. Yãmb me tõe n tika sõsdã sẽn na n yeelã zug n keng neb nins y sẽn zãmsd Biiblã raoodo.
3. Bõe la d tõe n maan n keng neb nins tẽeb sẽn maagã sẽn wa Tẽegrã raoodo?
3 Koe-moondb nins tẽeb sẽn maagã: Koe-moondb kẽer tẽeb sẽn maag na n waa Tẽegrã. D modg n deeg-b sõma. D pa segd n sokd-b sogsg n dat n vaees n bãng yɛl bãmb mengã zugu, wall d gom goam sẽn tõe n ning-b yãnd ye. Tẽegrã poor rasem a wãn bala, kãsem dãmbã segd n tɩ kaaga neb nins tẽeb sẽn maagã sẽn wa Tẽegrã, n pẽg-b b sẽn modg n wa wã yĩnga, la b bool-b tɩ b wa tigisg ning sẽn na n pʋglã.
4. Bõe la tõnd ned kam fãa tõe n maan n sõng sãambã?
4 Sãambã: Tõeeme tɩ d mitins wall d buudã neb kẽer tõnd meng sẽn bool wa Tẽegrã. Tõe tɩ kẽer me paama boolã sebre, d sẽn wa n pʋɩt-b nebã sasa. D sã n yã ned d sẽn pa mi, d segd n yɩɩ pipi n pʋʋs a soabã la d togs d yʋʋre. Tõeeme t’a soabã zɩ n kẽng a Zeova Kaset rãmb tigisg ye. Yãmb sã n wa sõsd ne a soabã, tõe t’a wa togs-y a zakã zĩiga, a tʋʋm zĩig wall a telefõn nimero. Tẽegrã poor rasem a wãn bala, y tõe n kẽnga a zakẽ wã wall y telefõn-a n keng a raood t’a bao n bãng n paase, la y kãab-a Biiblã zãmsgo.
5. Bõe la d tõe n yeel n sɩng Biiblã zãmsg ne neda?
5 D sã n wa lebg n na n tɩ kaag neda, d tõe n tika Tẽegrã sõsgã zug n wilg ned Biiblã yetame sebrã. Wala makre, Tẽegrã daare, ned ning sẽn na n wɛgs sõsgã na n karma Ezai 65:21-23. D sã n lebg n na n tɩ kaag neda, d tõe n goma sõsdã sẽn togs bũmb ningã yelle, la d yeel woto: “Ges-y bark a taab rondã sẽn na n kɩt tɩ d paame.” Rẽ poor bɩ y sõs ne-a Biiblã yetame sebrã neng a 4-5 wã zugu. D tõe n yeela woto me: “Neb wʋsg sokda b mens n dat n bãng sasa ning a Ezai bãngr gomdã sẽn na n pidsi.” Rẽ poor bɩ y sõs Biiblã yetame sebrã sak a 9 sull a 1-3 zugu. D sã n dat me, d tõe n sõssa ne a soabã sõsdã sẽn gom bũmb ning yellã zugu, n kõ-a Biiblã yetame sebrã, la d wilg-a d sẽn zãmsd nebã Biiblã to-to.
6. Tẽegrã sasa, bõe la tõnd tõe n maane?
6 Bɩ tõnd ned kam fãa ges a sẽn tõe n maan to-to n sõng neb nins sẽn zãmsd Biiblã, koe-moondb nins tẽeb sẽn maagã la sãambã sẽn na n wa Tẽegrã. (Luk 22:19) A Zeova na n ninga modgr ning fãa d sẽn maand n na n moon koɛɛgã n paasã barka.