Siglgã taoor lʋɩtb Sull lɛtre
Saam-biisi,
Yaa ne sũ-no-kãseng la d gʋlsd yãmba! Rũndã-rũndã tõnd me sã n tagsd y yelle, d sũy nooma wa tʋm-tʋmd a Zã sũur sẽn da noom to-to wã. A ra yeela a tẽed-n-taasã t’a nong-b-la wʋsgo, la t’a sũur nooma a sẽn wʋmd tɩ b ket n “kẽnda sɩdã pʋgẽ” wã. (2 Zã 1, 4) Vẽenega, d sẽn yaa kiris-neb hakɩkã nafd-d-la wʋsgo! D sẽn bãng sɩdã Wẽnnaam zugã kɩtame tɩ d paam d mens ne Babilon kãsengã la a yel-maandɩ wã ne a zãms-yoodã sẽn paoogd Wẽnnaamã. D sẽn tũud Biiblã sẽn yet bũmb ninsã kɩtame tɩ d lebg neb sẽn nong b taaba, nin-sõms la nimbãan-zoɛtba. Sẽn paase, d sẽn tũud Biiblã noyã yĩng kɩtame tɩ d tat Wẽnnaam yam, la d tõe n wa paam n vɩɩmd wakat sẽn kõn sa.
Ad d sũy nooma wʋsg me d sẽn paamd t’a Zeova vʋʋsem sõngã wilgd-d sore, la a kengd d raood daar fãa wã! D rasem a tãab tigis-kãseng ning sẽn nan loogã gom-zug yɩɩ “Wẽnnaam vʋʋsem sõngã wilgda tõnd sore.” D kɩsa sɩd tɩ tigis-kãseng kãng sasa y sũy yɩɩ noogo, y sẽn bãng Wẽnnaam vʋʋsem sõngã sẽn wilgd tõnd sor la a kengd d raood to-to wã. Dũniyã yɛl sẽn tar sãoong n debdã, d sɩd segd n teega a Zeova t’a wilg-d sor ne a vʋʋsem sõngã maasem tɩ d wa tõog n mao ne zu-loees nins fãa sẽn nan watã.
D kɩsa sɩd tɩ y sũy na n yɩɩ noogo, y sã n wa karemd kibay sẽn wilgd d saam-biis kẽer sẽn nams to-to b tẽebã yĩng hal tɩ kengd raoodo, yʋʋmd 2009 annuaire la d sɛb a taab pʋsẽ. Sẽn pʋd n kengd d raood n yɩɩd yaa tɩ sãnda sẽn deeg lisg pa yã n kaoos la b seg zu-loe-kãense, la b kẽer meng pʋd n nan pa reeg lisg ye. D sɩd nong-b-la wʋsgo, b wẽn-sakrã la b tɩrlmã yĩnga. Hakɩka, b mak-sõngã kɩtame tɩ d tʋll n kell n teel Rĩungã, baa zu-loeesã sẽn wa n yaa to-to.—1 Tes. 1:6-8.
D saam-biis la d saam-bi-pogse, d miime tɩ ligdã kaalem la yɛl a taab namsd-y lame, hal tɩ y segd n modg wʋsg n tõog tɩ nonglem kell n zĩnd y zagsã pʋsẽ. D leb n miime tɩ yaa toog ne yãmb kẽer meng tɩ y ket n moond Rĩungã koɛɛg ne y sũy fãa, la y kẽnd tigissã n pa vaandẽ ye. Yaa rẽ n so tɩ d sẽn zĩnd ne taab n yẽs la d pʋʋs naoor wʋsg poore, d rɩk sard n maan toeems d tigissã wɛɛngẽ, sẽn na n sɩng ne yʋʋmd 2009 yʋʋm-vẽkr kiuugã pipi daarã tɛka. D kɩsa sɩd tɩ toeem-kãensã na n kɩtame tɩ y paam sẽk n paas sẽn na yɩl n zãmsd Biiblã, la y zãmsd-a ne y zagsã rãmba.
Rõndã tigis-kãsemsã toor-toorã sasa, d sũy yɩɩ noog d sẽn yã neb wʋsg sẽn deeg lisgã. Kom-bɩɩs meng n zĩnd b sʋka. D pẽgda yãmb a roagdbã, y sẽn wub y kambã tɩ b nong sɩdã la y sõng-b tɩ b tõog n dɩk b mens n kõ a Zeova b bɩ-bɩɩlmã wakat n na n maan a raabã. Kom-bɩ-kãens sẽn tõog n deeg lisg baa ne b sẽn maood ne zu-loees wʋsg b lekoll dãmbẽ wã, wilgda vẽeneg tɩ b roagdbã sɩd wub-b-la sõma.—Yɩɩl 128:1-6.
D pa yĩmd tɩ neb nins sẽn sakd n zãmsd Biiblã sõor paasa wʋsg me ye. La sẽn yɩɩd fãa, yaa misioneer dãmbã la zall so-pakdbã n sõng wʋsg tʋʋm-kãngã pʋgẽ. Siglgã taoor-lʋɩtb Sull sũur nooma wʋsgo, dũniyã gill saam-biisã la saam-bi-pogsã sẽn modg n moon koɛɛgã n bool pʋ-peelem dãmbã la ko-yũud sẽn tar b rãmbã fãa tɩ b wa ‘reeg vɩɩm koomã zaalmã.’ (Wil. 22:17) Rɩẽ, yɩɩ neb 289 678 n dɩk b mens n kõ a Zeova n deeg lisgu. D pʋʋsd-b-la ne b waoong d saam-biisã sʋka!
D pa yĩmd tʋm-tʋmd a Zã sẽn da yeel bũmb ningã abada. A yeelame tɩ “dũniyã ne a ratem wẽngã me loogdame, la ned ninga sẽn maand Wẽnnaam daab paada wakat sẽn ka sɛta.” (1 Zã 2:17) Sɩd me, d miime tɩ dũniyã sãoong ta n saame! Yɩta sõma tɩ d ket n lʋɩɩsd Wẽnnaam daabã taoor la d kell n yɩ gũusdba. (Mat. 24:42) D sã n maand woto, d pa na n tol n wa maan d bãngẽ, la a Zeova na n wa ning-d-la bark wʋsgo, sẽn zems ne a nonglmã sẽn yaa kãsengã.—Ezai 63:7.
D saagdame tɩ kibay nins sẽn kengd raood n yit tẽns toɛy-toɛy n be yʋʋmd 2009 annuaire pʋgẽ wã na n sõnga y fãa tɩ y ket n lʋɩɩsd Rĩungã taoore. Bãng-y tɩ d tagsda y yell n pʋʋsd y yĩng wakat fãa, la tɩ d nong-y-la wʋsg me. D kota a Zeova t’a ning-y bark wʋsgo.
Y saam-biisã,
Siglgã taoor lʋɩtb Sulli