Yãmb kaoosda y kart DPA wã pidsg bɩ?
B yiisa kart DPA wã neb nins sẽn deeg lisg n lebg a Zeova Kaset rãmbã yĩnga. Sẽn mik tɩ tõnd ned baa a ye pa mi a vɩɩmã sẽn na n yɩ a soab beoogã, yaa masã la d segd n deng n gʋls n wilg tõnd sẽn dat tɩbsg ning buudu, sãmpogr bɩ bãag sasa. (Zak 4:14; Tʋʋ. 15:28, 29) Sẽn na yɩl n sõng tõnd rẽ wɛɛngẽ, b yiisa video t’a gom-zugã yaa Soigner sans transfuser — Besoins et droits du patient. Ges-y video kãngã, tɩ rẽ poor bɩ y pʋʋs la y leok sogsg nins sẽn be tẽngrã n ges y sẽn tõog n zãms bũmb ninga. Vẽnegre: Sẽn mik tɩ video wã zĩis kẽere b wilgda b sẽn wopeerd nebã, kom-bõoneg sã n na n naag n ges video wã, bɩ roagdbã maan gũusgu.
1) Bõe yĩng tɩ logtoɛɛmb kẽer toeemd b sẽn da tagsd to-to zɩɩmã ningr wɛɛngẽ wã? 2) Wilg-y wopeerg buud a tãab sẽn yaa toog b sẽn maan neb n pa ning-b zɩɩm. 3) Dũniyã gill zugu, logtoɛɛmb a wãn n wilg tɩ b sakame n na n wopeer bɩ n tɩp nebã n pa ning-b zɩɩm? Bõe yĩng tɩ b sak n na n maan woto? 4) Vaeesg logtoɛɛmbã sẽn maan tɩ nan pa kaoos wilga bõe zɩɩmã tall n tɩpã wɛɛngẽ? 5) Bõe n tõe n paam neda, a sã n sak tɩ b ning-a zɩɩm? 6) Bãngdb wʋsg sak n deegame tɩ tɩbsg nins sẽn ledgd zɩɩmã ningrã tara nafa bʋse? 7) Bõe n tõe n kɩt tɩ ned zɩɩm boog wʋsgo? Ned zɩɩm tõe n boog n taa zĩ-bʋg t’a ket n vɩya? Bõe la b tõe n maan n kɩt tɩ ned zɩɩm paase? 8) Bõe la b tõe n maan n sõng yĩngã t’a maan zɩɩmã (bɩ globules rouges rãmbã) n paase? 9) Rũndã-rũndã, bõe la logtoɛɛmbã maand sẽn na yɩl tɩ zɩɩmã da raag wʋsg wopeerg sasa? 10) Sã n wa yaa biig n bẽede, bɩ sã n wa yaa ned n bẽed n dat n ki, tɩbsg nins sẽn tõe n ledg zɩɩmã ningrã tara yõod bɩ? 11) Bõe la d tõe n tik n bãng tɩbsg sẽn yaa sõma? 12) Bõe yĩng tɩ tar yõod ne kiris-ned t’a reng n yãk tɩbsg nins sẽn pa tũud ne zɩɩmã t’a ket n tar laafɩ? Wãn to la d tõe n maan dẽ?
Tɩbsg nins b sẽn wilg video kãngã pʋgẽ wã kẽer sakr bee ne ned kam fãa yam yãkr la a sũur kaseto. Yãmb zoe n yãka tɩbsg ning y mensã la y kambã sẽn na n sakã, la y gʋls-b kart DPA wã zug bɩ? Sẽn na yɩl n paam kibay a taab tɩbsgã wɛɛngẽ n paase, bɩ y ges “ Amour de Dieu ” sebrã sak a 7 wã pʋgẽ. Y leb n tõe n gesa yʋʋmd 2006, sɩpaolg kiuugã Rĩungã Tʋʋmd seb-paasdmã pʋgẽ, gom-zug ning sẽn yaa: “Wãn to la mam tagsd ne tɩbsg buud toɛy-toɛy nins sẽn tũud ne m zɩɩmã, bɩ ne bõn-kɩds nins b sẽn yãkd zɩɩmã pʋgẽ wã.” Y segd n gʋlsa tɩbsg nins buud yãmb sẽn datã y kart DPA wã zugu. Kɩt-y tɩ y zakã neb nins sẽn pa a Zeova Kaset rãmbã, la neb nins yʋy sẽn be yãmb kartã zugã bãng yãmb sẽn dat tɩbsg ning buudã.
[Zĩ-gũbri, seb-neng a 3]
• Yãmb zoe n yãka tɩbsg ning y mensã la y kambã sẽn na n sakã bɩ?
• Yãmb pidsa y kart DPA wã n sui n kẽnd y sẽn tõe n wa rat tɩbsg tao-tao yĩng bɩ?