Sõng-y y kambã tɩ b lebg koe-moondba
1. Yɩɩl Sõamyã 148:12, 13 sẽn yetã segd n kɩtame tɩ roagdbã maan bõe?
1 A Zeova ratame tɩ kambã pẽg yẽnda. (Yɩɩl 148:12, 13) Woto yĩnga, kiris-nebã pa zãmsd b kambã sɩd ning sẽn be Biiblã pʋgẽ wã, ne Wẽnnaam noyã bal ye. B sõngd-b lame me tɩ b lebg koe-moondba. Wãn to la b tõe n maan rẽ?
2. Wãn to la roagdbã mak-sõng tõe n naf b kambã?
2 Roagdbã mak-sõngã: Bʋ-kaood a Zedeõ yeela a sodaas 300 wã woto: “Bɩ y ges maam n maan wa mam sẽn na n maanã.” (Bʋk. 7:17) Kambã nong n geta b roagdbã sẽn maand bũmb ningã, n dɩkd b togs-n-taare. Rao a yembr tʋmda yʋngo, la a sã n sig tʋʋm sibrã yibeoogo, wall t’a gũsã, a peegda a kambã n yi koɛɛgã moonego, baa ne yaamsã. A sẽn maand woto wã a wilgda a kambã tɩ koɛɛgã mooneg tara yõod wʋsgo, tɩ pa tũ ne goam ye. (Mat. 6:33) Rẽ yĩnga yãmb kambã neeme tɩ y maanda tũudmã yɛl ne yamleoogo, wala pʋʋsgã, Biiblã karengo, koɛɛgã moonego, la b wʋmd y sẽn kõt leoor tigissã sasa bɩ? Yaa vẽeneg tɩ y pa tõe n maan bũmba fãa tɩ zems zãng ye. La y kambã sã n ne yãmb mak-sõngã, tõe n sõng-b lame tɩ b sak bũmb nins y sẽn wilgd-b sẽn na yɩl tɩ b tũ a Zeova wã.—Tõo. 6:6, 7; Rom 2:21, 22.
3. Wãn to la roagdbã tõe n sõng b kambã Wẽnnaam tʋʋmdã wɛɛngẽ?
3 Zãms-y-b bilf-bilfu: Roagdbã modgda wʋsg n zãmsd b kambã kẽna, goama, fut ningr la yɛl a taaba. Kambã sã n bɩtẽ, zĩis nins b sẽn dat wilgrã toeemdame. Roagdb sẽn yaa kiris-neb sõngda b kambã tɩ b yãk bũmb ning b sẽn na n wa maan Wẽnnaam tʋʋmdã pʋgẽ tɩ zems ne b yʋʋmã la b tõogã, la b sõng-b tɩ b wa tõog n maan rẽ. (1 Kor. 9:26) Rẽ yĩnga yãmb zãmsda y kambã sẽn na yɩl tɩ b tõog n kõt leoor ne b meng gom-biisi, la b sã n paam sõsg Wẽnnaam tʋʋmdã lekollẽ bɩ b tõe n segl b toor bɩ? (Yɩɩl 35:18) Yãmb zãms-b-la koɛɛgã mooneg zak-zakã, lebg-n-tɩ-ges rãmbã la Biibl zãmsg sẽn maand to-to bɩ? Y sõng-b lame tɩ b tagsd lisgã reegr la so-pakrã yell bɩ? Yãmb boonda koe-moondb sẽn tar yẽesem y zakẽ, sẽn na yɩl tɩ b keng y kambã raood Wẽnnaam tʋʋmdã wɛɛngẽ bɩ?—Yel. 13:20.
4. Kamb sã n tar roagdb sẽn zãmsd-b koɛɛgã mooneg hal b yãadem wakate, wãn to la na n naf-ba?
4 Yɩɩl gʋlsdã yeela woto: “Wẽnnaam, yãmb zãmsa maam hal m yãadem wakate; la hal tɩ ta masã mam wilgda yãmb tʋʋm-kãsemsã.” (Yɩɩl 71:17) Sɩng-y y kambã zãmsg hal b yãadem wakate, tɩ b wa lebg koe-moondba. Bũmb ning yãmb sẽn maand n sõngd y kambã Wẽnnaam tʋʋmdã wɛɛngẽ wã na n naf-b-la b kãseng zugẽ me!—Yel. 22:6.