D moon tʋʋmã la koosmã zĩisẽ ne raoodo
1. Tʋʋmã la koosmã zĩisẽ mooneg sã n kõt yãmb rabeem, bõe yĩng tɩ y pa segd n sãam y sũuri?
1 B sã n gomd tʋʋmã la koosmã zĩisẽ mooneg yelle, kõta yãmb rabeem bɩ? Sã n yaa woto, bɩ y ra sãam y sũur ye. Bala baa tʋm-tʋmd a Poll sẽn yɩ koe-moond sẽn tall yẽesmã, wakat n zĩnd t’a kos ‘Wẽnnaam t’a kõ-a daood’ sẽn na yɩl n tõog n moon koɛɛgã. (1 Tes. 2:2) D na n wilga bũmb nins sẽn kɩt tɩ koe-mooneg a woto mi n yaa toogã, la ges sagls nins sẽn tõe n sõng-do.
2. Bõe yĩng tɩ y pa segd n tags tɩ y na n tiisa nebã?
2 Y sã n dat n moon zĩ-kãense, tiisda b rãmbã bɩ? Bãng-y tɩ nebã sẽn kẽed la b yitã pa tiisd-b ye. Naoor wʋsgo, b na n pʋʋsa yãmb noog-noogo, bala b tẽedame tɩ yaa bũmb la y rata. Modg-y n ning-y fut sẽn yaa sõma la y ra gãnem y mensã me ye. Woto na n kɩtame tɩ b reeg-y ne yamleoogo.
3. Bõe la y tõe n maane, tɩ b sũur da wa sãam ne-yã?
3 Nebã sã n yaa wʋsgo, yaa tɩlae tɩ m taas-b koɛɛgã bɩ? Ayo! Yãk-y wakat nebã bɩ tʋʋmã sẽn pa waooge. Bas-y tɩ tʋʋmdã taoor soabã bɩ koaasã wa yaa a yembre, tɩ y yaool n kolg n sõs ne-a. Y sõsgã tog n yɩɩ koɛɛg-koɛɛga.
4. Bõe la d tõe n yeele?
4 Bõe la y tõe n yeele? Taoor soab sã n beẽ, yaa sõma tɩ y reng n gom ne yẽ. Y tõe n yeela woto: “Y tʋʋmdã yĩnga, yaa toog tɩ d yã yãmb yiri. Yaa rẽ la d sẽn wa n na n sõs ne-y ka wã. D sẽn mi tɩ yaa tʋʋm zĩigẽ wã yĩnga, d pa na n dɩk y sẽk ye.” Sẽn na yɩl tɩ b ra rɩk yãmb wa ned sẽn wa n na n koos teedo, yɩta sõma tɩ y ra gom yamleoog kũunã yelle, sã n pa a soabã n gom n leb be. Y sã n gom ne taoor soabã n sa tɩ sã n tõe, bɩ y kos-a sor n na n sõs ne neb a taabã. Gom-y ne bãmb me koɛɛg-koɛɛga. B sã n tar tʋʋm wʋsgo, bɩ y kʋʋg y goamã, la y kõ-b seb-vãoogo. Sã n mik tɩ y pa tõe n sõs ne tʋm-tʋmdbã, y tõe n kosame n bas sɛb tɩ vʋʋsgã sasa bɩ b karme.
5. Bõe n kɩt tɩ y segd n modg n moond tʋʋmã la koosmã zĩisẽ ne raoodo?
5 A Zezi ne a Poll me ra moonda tʋʋmã la koosmã zĩisẽ ne raoodo. Yãmb me tõe n maana woto. (Mat. 4:18-21; 9:9; Tʋʋ. 17:17) Kos-y-yã a Zeova t’a sõng-y tɩ y maan dẽ ne raoodo. (Tʋʋ. 4:29) D pa tõe n kẽng tʋʋmã la koosmã zĩisẽ n pa yã ned ye. Bɩ y modg n moond beene me tɩ womda biisi.