D tall “Y sẽn na n bãng bũmb ning Wẽnnaam Gomdã pʋgẽ” sebrã n sɩng sõsga
1. Bõe la d paam-yã, tɩ tõe n sõng-d koe-moonegã pʋgẽ?
1 B sẽn lebs n maneg ãngilindã Tra-duction du monde nouveau wã, sõss toor-toor n be a sɩngrẽ wã. B tika sõs-kãens n yiis sebr ne moor t’a gom-zugã yaa: “Y sẽn na n bãng bũmb ning Wẽnnaam Gomdã pʋgẽ.” Wãn to la d tõe n tũnug ne seb-kãng n segl d meng koɛɛgã mooneg yĩnga? Sebrã tara sogsg toor-toore, n paas vɛrse-rãmb sẽn leokd sokr fãa, tɩ yaa wa Comment raisonner sebrã. Woto tõe n sõng-d lame tɩ d bãng n sɩng sõsg ne neda.
2. Wãn to la y tõe n tall seb-paallã n moon koɛɛgã?
2 Y tõe n tika sokr a 8 soabã n yeel y kɛlgdã woto: “Tõnd sõsda ne nebã, bala, wʋsg sokda b mens ‘ãdem-biisã sẽn namsdã sã n yaa Wẽnnaam yelle.’ [Zĩis kẽere, y sã n wilg y kɛlgdã sokrã sẽn be sebrã pʋgẽ wã, womda biisi.] Yãmb leokda sok-kãngã wãn to? [Bas-y t’a leoke.] Biiblã leokda sokrã hal tɩ kengd raoodo.” Lak-y Biiblã n karem vɛrse nins b sẽn sõdg sebrã pʋgẽ wã baa yaa a ye, tɩ y sõse. Y kɛlgdã sã n dat n bãng n paas bɩ y wilg-a sogsg 20 wã sẽn be sebrã sɩngrẽ wã, t’a yãk a sẽn dat a soaba, tɩ y wa leok nindaare. Y leb n tõe n kõ-a-la sebr d sẽn tar n zãmsd nebã Biiblã, tɩ gomd bũmb ning y sẽn sõsã yelle.
3. Wãn to la y tõe n tall “Y sẽn na n bãng bũmb ning Wẽnnaam Gomdã pʋgẽ” sebrã n sɩng sõsg ne ned sẽn pa tẽed Kiristã?
3 Yãmb sẽn moond zĩig ningã neb sã n pa tẽed Kiristã, sokr a 4, la 13 n tãag 17 wã tõe n sõng-y-la wʋsgo. Wala makre, y tõe n tika sokr 17 wã n yeel woto: “Tõnd kaagda nebã n gomd zagsã pʋsẽ vɩɩmã yelle. Rẽ yĩnga, yãmb sak n deegame tɩ zagsã fãa tara zu-loees bɩ? [Bas-y t’a leoke.] Neb wʋsg sẽn kẽ kãadem tũu Biiblã sagl-kãngã tɩ naf-ba. Saglgã yetame tɩ “pag waoog a sɩda.” [Pa tɩlae tɩ y wilg-a tɩ yaa Efɛɛz rãmb 5:33 n yet woto ye. Y sã n sõsda ne paga, bɩ y kʋms Efɛɛz rãmb 5:28 goamã.] Yãmb tagsdame tɩ y sã n tũ sagl-kãngã, na n naf-y lame bɩ?”
4. Y sã n sõsd ne ned sẽn pa tẽed Kiristã, bõe la y tõe n maan y sõsgã baasgẽ?
4 Y sõsgã baasgẽ, bɩ y bao n lebg n wa nindaare. Wala makre, y tõe n yeel-a lame tɩ y na n lebg n waame tɩ y sõs Biiblã vɛrse a to sẽn be sebrã pʋgẽ, n leokd sokrã. Sã n tõe bɩ y wilg y kɛlgdã tɩ y sẽn yeel bũmb ningã fãa yita Biiblã pʋgẽ. Tik-y bũmb y sẽn da zoe n sõs ne taaba, wall nedã tagsg sẽn yaa to-to Biiblã zugu, n kõ-a sebr sẽn tõe n sõng-a.—Ges-y yʋʋmd 2013 yʋʋm-sar kiuug Rĩungã Tʋʋmd seb-paasdmã pʋgẽ.