SAK A 5

Karemd-y sõma

1 Tɩmote 4:13

Y SẼN NA N BÃNGE: Zẽk-y y koɛɛgã n karem bũmb ning sẽn gʋlsã kɛpɩ.

Segl-y y meng sõma. Bao-y n bãng-y bũmb ning sẽn kɩt tɩ b gʋls zĩig ning y sẽn dat n karmã. Ra karemd-y gom-biisã yembr-yembr ye. Modg-y n karemd-y goamã sull-sulli. Ra paas-y goama, ra yãk-y goama, da ledg-y gom-biisã ne gom-biis a taab me ye. Tũ-y gʋls-bãnã.

Kos-y y zoa t’a kelg yãmb karengã, la a wilg-y gom-biis nins y sẽn pa karem sõma wã.
Pʋt-y gom-bil fãa sõma. Y sã n pa mi gom-biis kẽer pʋdb sõma, karm-y gom-biisã n yɩlme, hal n wa tõog n bãng b karengã. Y tõeeme me n kos ned sẽn karemd sõma t’a sõng-yã.
Modg-y tɩ y goamã yɩɩ vẽenega. Maag-y y yĩng n karem goamã. Zẽk-y y nengã la y yaag y noorã sõma. Modg-y n karm-y gom-bil fãa sõma.

Pʋt-y gom-biisã sõma, la ra maan-y tɩ loog noor ye. Sã n pa rẽ, nebã na n yãa vẽeneg tɩ y pa gomd wa raasenkamã ye.