Yãmb sogsgã leoore

◼ Rẽ yĩnga segdame t’a Zeova Kaset soab rɩk ned sõsg ne kasɛt bɩ n gʋls-a sebr zug n pʋɩ nebã bɩ?

D sẽn kelgd sõssã sẽn tik Biiblã zugã kengda d raoodo. (Tʋʋ. 15:32) Woto yĩnga, d mi n dat n dɩkame n pʋɩ ne neb nins sẽn pa tõog n wa tigisgã. Rũndã-rũndã, sẽn mik tɩ bũmb wʋsg d sẽn tõe n tall n dɩk ned sõsg beeme wã yĩnga, yaa nana tɩ d rɩk ned sõsg n pʋɩ neb a taabã zĩig pʋgẽ. Neb kẽer bĩnga sõss b sẽn dɩk tigiss sasa, tɩ sõs-kãens sʋka, kẽer yaa sõss b sẽn dɩk hal sẽn kaoose. B zo-rãmb sã n wa rat sõs-kãensã n kelge, b kõt-b lame tɩ b tɩ kelge, bɩ n maan kopi rãmb n yãk n kõ-ba. A Zeova Kaset rãmb kẽer maana sit-wɛɛb ẽntɛrnetã pʋgẽ n bĩng sõss beene tɩ sẽn dat-a fãa tõe n tɩ yãke.

D sã n dɩk sõss ne kasɛt bɩ ne bũmb a taab tõnd meng bɩ d zak rãmb yĩnga, pa wẽng ye. Sẽn paase, kãsem dãmbã tõe n dɩka segls tɩ b rɩkd sõssã kasɛt zug n kõt koms rãmb nins sẽn pa tõe n wa tigissã. La bʋʋm a taab n kɩt tɩ d pa segd n dɩk ned sõsg ne kasɛt bɩ n gʋls-a sebr zug n pʋɩ nebã.

D sã n kelgd ned sõsg b sẽn dɩke, d tõeeme n pa wʋm yɛl nins fãa b sẽn gom sõsgã pʋgẽ wã võor ye. Bala b nong n wɛgsda sõssã tɩ zemsd ne tigingã yɛl sẽn yaa to-to, tɩ d pa miẽ ye. Sẽn paase, d pa na n bãng yɛl nins b sẽn togs sõsgã pʋgẽ võor sã n toeema bilfu, la sã n zemsa kɛpɩ ye. Bala yaa toog tɩ d bãng sẽn yaa ned ning n wɛgs sõsgã, la sẽn yɩ wakat ninga. (Luk 1:1-4) Sẽn paase, d sã n pʋɩ sõss a woto, tõe n kɩtame tɩ nebã wa rat n pẽg ned ning sẽn wɛgs-a sõsgã tɩ loog noore, bɩ kɩt tɩ sõsdã wa tagsd t’a segda ne waoogr n yɩɩd neb a taabã.—1 Kor. 3:5-7.

Tʋm-tʋmd sẽn tũud sɩd la sẽn tar yamã modgda wʋsg tɩ d paamd zãmsg wakat sẽn zems pʋgẽ. (Luk 12:42) Wala makre, b rɩkda segls tɩ d paamd n kelgd sõss tigissã sasa. Sẽn paase, b maana sit-wɛɛb (jw.org Web site.) ẽntɛrnetã pʋgẽ n bĩng sõss la yɛl a taab beene tɩ sẽn dat-a fãa tõe n tɩ yãke. D tõe n kɩsa sɩd tɩ tʋm-tʋmd sẽn tũud sɩd la sẽn tar yamã ne Siglgã taoor lʋɩtb Sull na n sõng-d-la ne bũmb nins sẽn yaa tɩlae tɩ d paam pãng tẽebã wɛɛngẽ wã.—Tʋʋ. 16:4, 5.