Wãn to la y mak-sõngã tõe n sõng neb a taabã?
1. Mak-sõng bʋg la a Zezi kõ a karen-biisã?
1 A Zezi yeela woto: “Bɩ y rɩk mam nao wã n zãms bũmb nins mam sẽn na n wilg yãmbã.” (Mat. 11:29) Vẽenega, a Zezi pa kõ mak-sõng ne a no-goamã bal ye. Tags-y n ges-y mak-sõng ning a Zezi sẽn kõ a karen-biisã. A ra yaa sũ-bʋgsem soaba, n nong nebã la a sõngd-ba. (Mat. 8:1-3; Mark 6:30-34) A yɩɩ sik-m-meng soab me. (Zã 13:2-5) Karen-biisã sẽn tũ a Zezi n moon koɛɛgã, b yãame tɩ wakat fãa a ra modgdame n zãmsd nebã Wẽnnaam Gomdã sõma. (Luk 8:1; 21:37, 38) Mak-sõngã d sẽn kõt koɛɛgã mooneg pʋgẽ wã tõe n kɩtame tɩ nebã manesem yɩ wãna?
2. Wãn to la d fu-yerdi wã ne d manesem sõngã tõe n sõng kɛlgdbã?
2 D kɛlgdbã: D fu-yerdi wã sã n yaa sõma, tɩ d tar manesem sõng la d wilgd nebã tɩ b yell pak-d lame, tõe n kɩtame tɩ b sak n kelg-do. (2 Kor. 6:3; Fil. 1:27) B yãtame tɩ d nong n karemda Biiblã. Neb kẽer sũur yaa noogo, d sã n kelgd bãmb ne waoogre. Da tags-y tɩ y mak-sõng rẽ wɛɛngẽ wã pa tõe n sõng nebã tɩ b sak n kelg Rĩungã koɛɛg ye.
3. Wãn to la d tõe n yɩ mak-sõng n kõ d tẽed-n-taasã?
3 D tẽed-n-taasã: Tags-y n ges d mak-sõngã sẽn tõe n sõng d tẽed-n-taasã to-to. D sã n tara yẽesem koɛɛgã mooneg pʋgẽ, tõe n kɩtame tɩ neb a taabã me tall yẽesem. Wala b sẽn dɩkd kut n saas kutã, d sã n segend d mens sõma koe-moonegã yĩnga, tõe n kɩtame tɩ neb a taabã maneg b sẽn moond nebã to-to wã. (Yel. 27:17) D sã n modgd n gʋlsd neb nins sẽn sak n kelg-dã yʋy la b yɛl a taaba, la d lebg n tɩ kaag-b tao-tao, na n sõnga koe-moondb a taabã tɩ bãmb me maan woto. D sã n modgd n moond koe-noogã neere, na n sɩd yɩɩ mak-sõng n kõ d koe-moon-taasã.—2 Tɩm. 4:5.
4. Bõe yĩng tɩ wakat ninga, d segd n bao n bãng d sã n sɩd kõta neb a taabã mak-sõngo?
4 Wakat ninga d segd n bao n bãnga d no-goamã la d manesmã sẽn yaa to-to, la d ges rẽ sã n sõngda d taabã bɩ pa sõngd-ba. Tõnd mak-sõngã na n nooga a Zeova sũuri, la kɩt tɩ d yeel wa tʋm-tʋmd a Polle. A yeela woto: “Bɩ yãmb yɩ mam togs-n-taas wa mam me sẽn yaa Kirist togs-n-taagã.”—1 Kor. 11:1.