Zabã namsda nebã wʋsgo
Bũmb paood sẽn namsd nebã n ta zabã. Dũniyã gill zugu, sodaas la nin-zaals yãa zabã sẽn wat ne yel-beed ninsã vẽenega.
SODAASÃ
“F nee neb sẽn kiid wall sẽn pogend wʋsg goabg la rɩtgo. Wakat fãa f tagsdame tɩ yel-beed n na n paam-fo.”—A Gaari sẽn be Gãrãnd Bertayn wã.
“B tãoo bug-ra-vẽen tɩ yõg mam poorã la m nengã. M yãa neb wʋsg b sẽn kʋ, baa kamb la neb yʋʋm sẽn vẽsge. Zabã kɩtdame tɩ f sũurã riglmi.”—A Wilmaar sẽn be Kolõmbi wã.
“B sã n tão ned n lub f sɛɛgẽ, f pa tõe n bas rẽ yell tagsg ye. A yãbrã la a wõosgã paada f yamẽ. Fo pa yĩmd nin-kãng yell a bada.”—A Safira sẽn be Etazĩni wã.
NIN-ZAALSÃ
“M da tagsdame tɩ m pa tol n tõe n le paam sũ-noog ye. F yɛɛsdame tɩ b na n kʋ-f lame. La sẽn yaa wẽng n yɩɩda, f yɛɛsdame tɩ b na n kʋʋ f zakã rãmb la f zo-rãmbã.”—A Alɛgsãndra sẽn be Ikrɛnnã.
“D ra yɛɛsda wʋsgo, bala d ra segd n tonga yibeoog wakat a yiib n tãag yʋng wakat piig la ye sẽn na yɩl n paam dɩɩbo, n miẽ me tɩ bug-rag-vẽend tõe n sãag n ta-d lame.”—A Dãniyɛll sẽn be Tazikɩstã wã.
“Mam doagdbã fãa kii zabrã sasa. Zabrã kɩtame tɩ m lebg kɩɩba, n pa le tar ned sẽn na n bels-m wall n ges m yell ye.”—A Maari sẽn be Ruwãnda wã.
Baa zabã sẽn nams neb nins yell d sẽn gomã wʋsgã, b wa n paamame tɩ b yam gãand bãane. La sẽn yɩɩd fãa, b kɩsa sɩd tɩ ka la bilfu zabã fãa na n saame. Gũusg Gas-kãngã pʋgẽ d na n tika Biiblã n wilg sẽn na n yɩ to-to tɩ zabã sa.