Bõe la Wẽnnaam Rĩungã na n maane?

Biiblã sẽn yete

Wẽnnaam Rĩungã na n ledga ninsaalbã goosneema-rãmbã fãa, n dɩ naam dũniyã gill zugu. (Dãniyɛll 2:44; Vẽnegr 16:14) Rẽ poore, Wẽnnaam Rĩungã na n . . .

• Sãama nin-wẽnsã sẽn namsd tõnd fãa wã. “B na n menesa nin-​wẽnsã tẽngã pʋga.”—Yel-bũnã 2:22.

• Kɩtame tɩ zab sa. “[Wẽnnaam] n kɩtd tɩ zabã sẽn be dũniyã tɛk fãa wã sɛ.”—Yɩɩn-sõamyã 46:9.

• Kɩtame tɩ laafɩ la bãan zĩnd tẽngã zugu. “Ned kam fãa na n zĩnda a reezẽ tɩɩg ne a kankang tẽngre, tɩ ned ka be n tõe n kẽes-b rabeem ye.”​—Miise 4:4.

• Kɩtame tɩ tẽngã lebg arzãna. “We-raoogã ne tẽng ning sẽn kʋɩ wã na n maana sũ-noogo. Zĩ-koɛɛngã na n kɩdma ne sũ-noog n ning puud wa sõse.”​—Ezayi 35:1.

• Kɩtame tɩ ned fãa paam tʋʋmd sẽn kõt-a sũ-noog la sẽn tar barka. “La neb nins [Wẽnnaam] sẽn yãkã na n dɩɩ b nus tʋʋmã yõodo. Bãmb kõn tʋm n nams zaalem ye.”​—Ezayi 65:21-23.

• Kɩtame tɩ bãasã sa. “Tẽngã ned kõn yeel t’a ka keem ye!”​—Ezayi 33:24.

• Kɩtame tɩ d paam d mens ne kʋʋlmã. “Dẽ, a yĩngã na n leb n yɩɩ sõma wa yẽnda bi-bɩɩlmẽ wã. Yẽnda na n leb n lebga wa a sẽn dag n yaa to-​to a bi-bɩɩlem wakatã.”​—Zoob 33:25.

• Vʋʋga sẽn ki-bã. ‘Neb nins fãa sẽn be yaadẽ na n wʋm [a Zeezi] koɛɛga, n yi.’​—Zã 5:28, 29.