Eżodu

35 Iktar tard Mosè sejjaħ lill-​ġemgħa kollha taʼ wlied Israel flimkien u qalilhom: “Dan hu l-​kliem li kkmanda Ġeħova, biex nagħmluh:+ 2 F’sitt ijiem jistaʼ jsir ix-​xogħol,+ imma s-​sebaʼ jum isir għalikom xi ħaġa qaddisa, Sabat taʼ mistrieħ komplet lil Ġeħova. Kulmin jagħmel xi xogħol fih jingħata l-​mewt.+ 3 Tkebbsux nar fi kwalunkwe post fejn tgħammru f’jum is-​Sabat.”

4 U Mosè ssokta jgħid lill-​ġemgħa kollha taʼ wlied Israel: “Din hi l-​kelma li kkmanda Ġeħova, meta qal, 5 ‘Minn fostkom iġbru kontribuzzjoni għal Ġeħova.+ Ħalli kulmin lest li jagħti minn qalbu+ jġibha bħala l-​kontribuzzjoni taʼ Ġeħova, jiġifieri, deheb, fidda, ram aħmar,+ 6 ħajt blu, suf miżbugħ vjola ħamrani, materjal lewn l-​iskarlat,* għażel fin, xagħar tal-​mogħoż,+ 7 ġlud tal-​muntun miżbugħin ħomor, ġlud tal-​bumerin, injam taʼ l-​akaċja, 8 żejt għad-​dawwala, żejt tal-​balzmu għaż-​żejt tad-​dlik u għall-​inċens ifuħ,+ 9 u ħaġar taʼ l-​oniċi u ħaġar ingastat għall-​efod+ u għall-​pettoral.+

10 “‘U ħalli kulmin hu tas-​sengħa+ fostkom jiġi u jagħmel kulma kkmanda Ġeħova, 11 jiġifieri, it-​tabernaklu bit-​tinda tiegħu u bl-​għata tiegħu, il-​ganċijiet, it-​twavel* tal-​qafas, it-​traversi, il-​kolonni, u l-​pedestalli bl-​ingast tiegħu; 12 l-Arka+ u l-​lasti tagħha,+ l-​għatu+ u l-​purtiera+ li tifred; 13 il-mejda+ u l-​lasti tagħha u l-​għodod kollha tagħha u l-​ħobż tal-​preżenza;+ 14 il-gandlier+ li jdawwal u l-​għodod tiegħu u l-​imsiebaħ tiegħu u ż-​żejt+ għad-​dawl; 15 l-artal taʼ l-​inċens+ u l-​lasti tiegħu; u ż-​żejt tad-​dlik u l-​inċens ifuħ;+ il-​purtiera għad-​daħla tat-​tabernaklu; 16 l-artal+ taʼ l-​offerta tal-​ħruq u l-​gradilja tar-​ram aħmar għalih, il-​lasti tiegħu u l-​għodod kollha tiegħu; il-​vaska+ u l-​bażi tagħha; 17 il-purtieri tal-​bitħa,+ il-​pilastri tagħha u l-​pedestalli bl-​ingast tagħha; u l-​purtiera tad-​daħla tal-​bieb tal-​bitħa; 18 l-imsiemer tat-​tined tat-​tabernaklu u l-​imsiemer tat-​tined tal-​bitħa u l-​ħbula tagħhom;+ 19 u l-​ilbies+ minsuġ fin biex jaqdu bih fis-​santwarju, l-​ilbies qaddis+ għal Aron, il-​qassis, u l-​ilbies taʼ wliedu biex jaqdu bħala qassisin.’”

20 U l-​ġemgħa kollha taʼ wlied Israel ħarġet minn quddiem Mosè. 21 Imbagħad ġew dawk kollha li qalbhom ġegħlithom+ u dawk kollha li l-​ispirtu tagħhom qanqalhom u ġabu l-​kontribuzzjoni taʼ Ġeħova għax-​xogħol tat-​tinda tal-​laqgħa u għas-​servizz kollu tagħha u għall-​ilbies qaddis. 22 U baqgħu ġejjin, l-​irġiel flimkien man-​nisa, kulmin kien lest li jagħti minn qalbu. Ġabu labar, imsielet, ċrieket, u tiżjin tan-​nisa, kull xorta t’oġġetti tad-​deheb, jiġifieri, kulmin ippreżenta l-​offerta tat-​tixjir tad-​deheb lil Ġeħova.+ 23 U kulmin instab li għandu ħajt blu, suf miżbugħ vjola ħamrani, materjal lewn l-​iskarlat, għażel fin, xagħar tal-​mogħoż, ġlud tal-​muntun miżbugħin ħomor, u ġlud tal-​bumerin, ġabhom.+ 24 Kulmin ta l-​kontribuzzjoni taʼ fidda u ram aħmar ġab il-​kontribuzzjoni taʼ Ġeħova, u kulmin instab li għandu l-​injam taʼ l-​akaċja għax-​xogħol kollu tas-​servizz, ġabu.

25 U n-​nisa kollha li kienu tas-​sengħa+ nisġu b’idejhom, u bħala ħajt għall-​insiġ baqgħu jġibu l-​ħajt blu, is-​suf miżbugħ vjola ħamrani, il-​materjal lewn l-​iskarlat, u l-​għażel fin. 26 U n-​nisa kollha tas-​sengħa li qlubhom qanqluhom nisġu x-​xagħar tal-​mogħoż.

27 U l-​kapijiet ewlenin ġabu l-​ħaġar taʼ l-​oniċi u l-​ħaġar ingastat għall-​efod u għall-​pettoral,+ 28 u ż-​żejt tal-​balzmu u ż-​żejt għad-​dawl u għaż-​żejt tad-​dlik u għall-​inċens ifuħ.+ 29 Kull raġel u mara li qlubhom qanqluhom biex iġibu xi ħaġa għax-​xogħol kollu li Ġeħova kien ikkmandahom jagħmlu, permezz taʼ Mosè, ġabuha; ulied Israel ġabu offerta volontarja lil Ġeħova.+

30 Imbagħad Mosè qal lil ulied Israel: “Ara, Ġeħova sejjaħ b’ismu lil Besalel,+ bin Uri, bin Ħur, mit-​tribù taʼ Ġuda. 31 U mlieh bl-​ispirtu t’Alla fl-​għerf, fl-​abbiltà li jifhem, fl-​għarfien, u f’kull xorta taʼ ħila fis-​sengħa 32 u biex ifassal proġetti, biex jaħdem fid-​deheb u l-​fidda u r-​ram aħmar,+ 33 u biex jaħdem il-​ħaġar biex jingastah u jaħdem l-​injam ħalli jagħmel oġġetti taʼ kull tip magħmulin b’sengħa kbira.+ 34 U daħħalhielu f’qalbu li għandu jgħallem, hu u Oħolijab,+ bin Aħisamak mit-​tribù taʼ Dan. 35 Imlielhom qalbhom bl-​għerf+ biex jagħmlu x-​xogħol kollu taʼ bniedem tas-​sengħa u taʼ min jirrakkma+ u taʼ min jinseġ bil-​ħajt blu, bis-​suf miżbugħ vjola ħamrani, bil-​materjal lewn l-​iskarlat, u bl-​għażel fin, u taʼ min jinseġ bin-​newl, irġiel li jagħmlu kull tip taʼ xogħol u tfassil taʼ proġetti.