Ġenna Ħielsa Mill-​inkwiet Sempliċement Ħolma?

“X’PAĊI hawn!” Il-​veduta mill-​foresta taʼ l-​arżnu li qiegħda fuq Redfish Lake fl-​istat taʼ Idaho, l-​Istati Uniti, kienet tassew serena. “Eżatt kif nimmaġina li tkun il-​ġenna,” qal il-​vjaġġatur.

Ix-xemx bdiet tiddi qawwija fuq il-​kosta tan-​Nofsinhar tal-​gżira Mediterranja taʼ Ċipru. Il-​mewġ beda jħaxwex bil-​mod max-​xatt. Bil-​qiegħda f’restorant fuq il-​quċċata taʼ rdum u b’din il-​veduta quddiemu, il-​viżitatur esklama: “Din hi l-​ġenna!”

Ħafna minna jgħożżu memorji taʼ xeni bħal dawn. Imma r-​residenti jirrealizzaw li ambjent bħal ġenna ħafna drabi jostor ir-​realtajiet ħorox tal-​ħajja taʼ kuljum: nirien fl-​għoljiet bil-​boskijiet fit-​tarf tar-​Rocky Mountains, tniġġis tal-​baħar li jeffettwa lill-​ħut u fl-​aħħar mill-​aħħar lill-​bniedem​—biex ma nsemmux il-​konflitti internazzjonali u interkomunali li jheddu l-​ħajja.

Ġenna​—X’inhi?

Int kieku kif timmaġina li tkun ġenna? The New Shorter Oxford English Dictionary joffri bħala l-​ewwel definizzjoni tiegħu: “Il-​ġnien t’Għeden deskritt f’Ġen[esi] 2, 3.” Dan jirreferi għad-​deskrizzjoni, li tinsab fl-​ewwel ktieb tal-​Bibbja, tar-​reġjun fejn Alla poġġa lill-​ewwel bniedem, Adam. F’dik il-​Ġenna oriġinali, siġar “li jpaxxu l-​għajn u bnina għall-​ikel” kienu jikbru bl-​abbundanza.​—Ġenesi 2:9.

It-tieni definizzjoni taʼ din il-​kelma fid-​dizzjunarju torbot il-​kelma “ġenna” maʼ “Sema, fit-​teoloġija Kristjana u Musulmana” imma mbagħad iżżid: “Issa prinċipalment poet[ika].” Għall-​vjaġġatur u l-​viżitatur tagħna, madankollu, il-​ġenna kienet “reġjun taʼ sbuħija jew għaxqa li tisboq,” it-​tielet definizzjoni tad-​dizzjunarju.

Sir Thomas More, l-​istatista Britanniku tas-​seklu 16, kiteb ktieb intitolat Utopia li fih iddeskriva pajjiż immaġinarju fejn il-​liġijiet, il-​gvern, u l-​kundizzjonijiet soċjali kienu perfetti. Tant ma kienx reali li llum Webster’s New Collegiate Dictionary jagħti definizzjoni waħda taʼ “Utopja” bħala “skema mhix prattika għal titjib fis-​soċjetà.”

Għas-segwaċi taʼ Jim Jones, il-​mexxej tas-​setta People’s Temple, Utopja kienet biċċa art lixxa fil-​ġungla taʼ Guyana. B’dispjaċir, fl-​1978 din il-​ġenna tant ittamata saret ix-​xena tal-​mewt taʼ iktar minn 900 minnhom​—esperjenza li twaħħax tabilħaqq! Bħala riżultat, in-​nies xi kultant jorbtu l-​kunċett taʼ ġenna maʼ setet strambi li l-​prattiċi tagħhom jaħsdu u jinkwetaw lil dak li jkun.

F’dinja fejn il-​kriminalità u l-​vjolenza huma taʼ theddida, fejn il-​mard jhedded kemm lill-​adulti kif ukoll lit-​tfal, u fejn il-​mibegħda u d-​differenzi reliġjużi jifirdu l-​komunitajiet, postijiet sbieħ, ħafna drabi ma jkunu xejn iktar minn sempliċement kisja minn barra. Mhux taʼ b’xejn li n-​nies jaħsbu li l-​ġenna m’hi xejn ħlief ħolma! Imma dan ma waqqafx lil xi nies milli jipprovaw isibu jew saħansitra jagħmlu ġenna għalihom infushom. Kemm kellhom suċċess?