Il-​Ħarsa Tal-​Bibbja

Kif Tistaʼ Tibżaʼ minn Alla taʼ Mħabba?

“HIENI L-​BNIEDEM LI JIBŻAʼ MILL-​MULEJ.”​—Salm 112:1.

JEKK “Alla hu mħabba,” bħalma tiddeskrivih il-​Bibbja, għala għandu jkun neċessarju li tibżaʼ minnu? (1 Ġwann 4:16) L-​imħabba u l-​biżaʼ ġeneralment huma meqjusin bħala inkompatibbli. Mela, liema rwol għandu jkollu l-​biżaʼ fir-​relazzjoni tagħna maʼ Alla? Għala tibżaʼ minn Alla taʼ mħabba? Ħarsa mill-​qrib lejn kif il-​kelma “biżaʼ” tintuża fil-​Bibbja tistaʼ tipprovdilna fehma aħjar fuq din il-​kwistjoni.

Fil-biċċa l-​kbira tal-​lingwi kelma waħda jistaʼ jkollha diversi tifsiriet, jiddependi mill-​kuntest. Nagħtu każ, f’xi lingwi wieħed jistaʼ jgħid: “Inħobbu l-​ġelat” kif ukoll, “Inħobbhom ’l uliedi.” Hemm differenza kbira fl-​intensità u fit-​tipi taʼ mħabba li qed jiġu espressi. B’mod simili, il-​Bibbja titkellem dwar tipi differenti taʼ biżaʼ. Meta tuża l-​kelma f’konnessjoni mal-​qima taʼ Alla, mhux qed tirreferi għal waħx, qatgħa, jew sens taʼ kastig imminenti. Minflok, il-​biżaʼ minn Alla jittrasmetti sentimenti pożittivi​—stagħġib, reverenza, u rispett profond. Dawn l-​emozzjonijiet nobbli huma marbutin maʼ l-​imħabba u l-​attrazzjoni lejn Alla, mhux xi istint biex taħrab jew tistaħba minnu.

Il-biżaʼ minn Alla jwarrab biżaʼ terrifikanti u tiranniku. Is-​salmista kiteb dwar il-​bniedem li jibżaʼ minn Alla: “Xejn ma jibżaʼ minn aħbar ħażina; qalbu qawwija bit-​tama tal-​Mulej.” (Salm 112:7) L-​ebda theddid minn bnedmin mill-​agħar jew minn Satana nnifsu ma jistgħu jegħlbu r-​rispett u r-​reverenza profondi tagħna lejn Jehovah. (Luqa 12:​4, 5) Lanqas m’għandna għalfejn nibżgħu nersqu lejn Alla fit-​talb. Minflok, f’dan il-​kuntest, “l-​imħabba . . . tkeċċi l-​biżaʼ ’l barra.”​—1 Ġwann 4:18.

Is-​Smewwiet u l-​Maestà taʼ Alla

Is-​Sultan David tal-​qedem kien raġel li jibżaʼ minn Alla. Hu kien mgħaġġeb meta kien qed jikkontempla dwar is-​sbuħija u l-​komplessità tal-​ħolqien. Hu esklama: “Infaħħrek; għax tal-​biżaʼ u tal-​għaġeb jien magħmul: tal-​għaġeb huma l-​egħmejjel tiegħek; u dan ruħi tafu tajjeb.” (Salm 139:​14, KŻ) Waqt li kien qiegħed jiċċassa lejn is-​sema bil-​lejl, hu esklama: “Is-​smewwiet ixandru l-​glorja taʼ Alla.” (Salm 19:2 [19:​1, NW]) Timmaġina li David kien imbeżżaʼ minn din l-​esperjenza? Għall-​kuntrarju, din qanqlitu biex ikanta tifħir lil Jehovah.

L-​għarfien miżjud li għandna llum dwar is-​smewwiet jagħtina raġuni saħansitra iktar qawwija biex nistagħġbu. Dan l-​aħħar, astronomi li wżaw it-​Teleskopju Hubble Space ittawlu fil-​fond fis-​smewwiet iktar minn kwalunkwe bniedem qabilhom. Għażlu parti mis-​sema li dehret vojta għal teleskopji fuq l-​art u ffokaw il-​Hubble fuq żona li fiha biss daqs ramla fina jekk iżżommha ’l bogħod f’idek. L-​istampa li rriżultat kienet iffollata, mhux bi kwiekeb individwali, imma b’galassji​—sistemi vasti li jikkonsistu f’biljuni taʼ kwiekeb—​li qatt qabel ma kienu dehru mill-​bniedem!

Il-kobor, il-​misteri, u l-​għeġubijiet taʼ l-​univers jimmeraviljaw lil wieħed li jkun qiegħed josservah bl-​attenzjoni. Madankollu, għeġubijiet bħal dawn huma sempliċi rifless tal-​glorja u l-​qawwa tal-​Ħallieq. Il-​Bibbja ssejjaħ lil Alla Jehovah l-​“Missier, l-​għajn tad-​dawl” u tgħidilna li hu qiegħed “jgħodd in-​numru tal-​kwiekeb; kollha jsejjħilhom b’isimhom.”​—Ġakbu 1:17; Salm 147:4.

L-immensità taʼ l-​univers tistaʼ tidher ukoll mill-​ħin meħud minn ġrajjiet ċelestjali. Id-​dawl mill-​galassji ffotografati mit-​Teleskopju Hubble Space kien ilu jivvjaġġa fl-​ispazju għal biljuni taʼ snin! M’għandniex inħossuna mgħaġġbin u jkollna reverenza profonda lejn il-​Wieħed li għamel il-​kwiekeb meta nqisu kemm aħna ġodda u ċkejknin meta mqabblin mal-​permanenza tas-​smewwiet? (Isaija 40:​22, 26) Li nirrealizzaw li dak Alla li ħalaq dan kollu ‘jiftakar fil-​bniedem u jaħseb fih’ ukoll, iżid l-​istima tagħna lejn il-​Ħallieq tagħna u jagħmilna nkunu rridu nsiru nafuh u nogħġbuh. (Salm 8:​4, 5 [8:​3, 4, NW]) Rispett u apprezzament sublimi bħal dan huwa dak li l-​Bibbja ssejjaħlu l-​biżaʼ taʼ Alla.

Alla li Jaħfer

Aħna lkoll imperfetti. Saħansitra meta nipprovaw nagħmlu t-​tajjeb, aħna nidinbu bla ma rridu. Meta jiġri hekk, għandna nibżgħu li nitilfu l-​favur taʼ Alla? Is-​salmista kiteb: “Jekk tal-​ħtijiet int tagħti kas, Mulej, Sidi, min jistaʼ jżomm sħiħ? Imma għandek hemm il-​maħfra, biex hekk inqimuk fil-​biżaʼ tiegħek.” (Salm 130:​3, 4) Li l-​‘Grandjuż li Għamilna’ għandu jkun daqshekk qalbu tajba u jaħfer, jispira apprezzament u rispett profondi fl-​adoraturi tiegħu.​—Isaija 54:​5-8, NW.

Il-biżaʼ minn Alla jimmotivana biex nagħmlu t-​tajjeb kif ukoll biex inżommu lura milli nagħmlu dak li Alla jgħid li huwa ħażin. Ir-​relazzjoni tagħna maʼ Missierna tas-​sema tistaʼ titqabbel maʼ dik taʼ missier uman twajjeb, mat-​tfal tiegħu. Xi drabi, it-​tfal forsi ma jiftakrux għala missierhom ma jkunx iridhom jilagħbu fit-​triq. Xorta waħda, meta jkunu se jiġru għal wara l-​ballun f’nofs triq li jgħaddi minnha t-​traffiku, il-​ħsieb tal-​projbizzjoni taʼ missierhom iżommhom lura​—x’aktarx isalvahom mill-​mewt. Bl-​istess mod, meta adult jibżaʼ minn Jehovah dan jistaʼ jżommu lura milli jikkommetti att li jistaʼ jirrovina l-​ħajjiet​—tiegħu stess u dawk taʼ oħrajn.​—Proverbji 14:27.

Biżaʼ mill-​Ġudizzju taʼ Alla

B’kuntrast maʼ dan, persuna li l-​kuxjenza tagħha ma żżommhiex lura milli tweġġaʼ lil Alla għandha għalfejn tkun beżgħana f’mod differenti ħafna. Sewwa sew bħalma gvernijiet umani jikkastigaw nies kriminali, Alla għandu d-​dritt jaġixxi kontra dawk li jagħmlu l-​ħażin apposta u ma jindmux. Minħabba li Alla temporanjament qiegħed jippermetti l-​ħażen xi wħud qegħdin jiħraxu iżjed f’korsa ħażina. Imma l-​Bibbja turi b’mod ċar li xi darba dalwaqt hu se jneħħi l-​elementi ħżiena kollha mill-​art. (Salm 37:​9, 10; Koħèlet 8:11; 1 Timotju 5:24) L-​uħud mill-​agħar li ma jindmux għandhom raġun jibżgħu mill-​kastig taʼ Alla. Madankollu, dan it-​tip taʼ biżaʼ m’huwiex ix-​xorta taʼ biżaʼ li tirrikkmanda l-​Bibbja.

Minflok, il-​Bibbja tassoċja l-​biżaʼ minn Jehovah maʼ affarijiet sbieħ fil-​ħajja​—il-​kant, il-​ferħ, it-​tama, l-​għerf, l-​għomor twil, il-​fiduċja, il-​prosperità, l-​isperanza, u s-​sliem, biex insemmu biss ftit.a Jekk inkomplu mexjin fil-​biżaʼ taʼ Jehovah, se ngawdu barkiet bħal dawn għal dejjem.​—Dewteronomju 10:​12-14.

[Nota taʼ taħt]

[Sors tal-Istampa fʼpaġna 26]

Korteżija taʼ l-​Osservatorju Anglo-Awstraljan, ritratt minn David Malin