L-​ilma U Saħħtek

“MA TISTAX tafda fuq meta jaqbdek l-​għatx biex tkun taf kemm ilma għandu bżonn ġismek,” tgħid ir-​rivista Health. Madankollu, li tixrob ħafna ilma huwa essenzjali għall-​benesseri fiżiku u emozzjonali tagħna, kif ukoll għall-​apparenza tagħna. Ġisimna kontinwament jitlef l-​ilma permezz taʼ l-​għaraq, id-​dmugħ, u l-​awrina kif ukoll permezz tan-​nifs. Dan il-​fluwidu mitluf għandu jiġi ssostitwit. X’inhu l-​ammont meħtieġ? Ħafna awtoritajiet jirrikkmandaw li tixrob minn taʼ l-​inqas tmien tazzi​—nofs gallun—​kuljum.

Għala? L-​ilma huwa vitali biex iġorr nutrijenti ġewwa ġisimna u biex jelimina ħmiġijiet. Huwa neċessarju biex jirregola t-​temperatura tagħna u biex jillubrika l-​ġogi tagħna. “Saħansitra l-​inqas nuqqas taʼ ilma jistaʼ jħallik għajjien . . . jew marid,” tinnota r-​rivista Health. “It-​telf taʼ l-​ilma huwa l-​kaġun li spiss jiġi injorat taʼ l-​għeja.” Ir-​rivista tirrikkmanda: “Tkunx imqarraq min-​natura likwida tal-​kafè u t-​tè, tas-​soft drinks li jkollhom il-​kafeina, u taʼ l-​alkoħol; dawn attwalment jikkontribwixxu biex jintilef l-​ilma.” Il-​kafeina u l-​alkoħol jaħdmu bħala dijuretiċi u jġagħlu lill-​ġisem jitlef l-​ilma.

Barra minn hekk, “il-​ġilda tiegħek għandha bżonn taʼ l-​ilma biex tibqaʼ ratba u flessibbli.” Biex jgħinu f’dan, moisturizers jistgħu wkoll jiġu applikati. Imma dawn ma jżidux l-​ilma li hemm f’ġisimna. Minflok, iħallu lega protettiva li tgħin biex jinżamm l-​ilma li jkun hemm diġà fil-​ġilda. Hekk kif nikbru, li nżommu dan l-​ilma jsir iktar importanti peress li maż-​żmien il-​ġilda tagħna titlef xi ftit mill-​abbiltà tagħha li tagħmel dan.

B’sogħba, fil-​parti l-​kbira tad-​dinja, sforz konsiderevoli huwa meħtieġ biex jinkiseb biżżejjed ilma safi u nadif. Imma dan l-​isforz huwa vallapena. Kun ċert li tixrob ħafna ilma, u ħu vantaġġ minn dan il-​mod sempliċi biex tkun tistaʼ tidher u tħossok fl-​aħjar tiegħek!