Il-​Kirurġija Mingħajr Demm Il-​Benefiċċji Tagħha Jiġu Rrikonoxxuti

FL-​1996, ir-​Royal College of Surgeons of England ippubblika ktejjeb imsejjaħ il-​Code of Practice for the Surgical Management of Jehovah’s Witnesses (Kodiċi taʼ Prattika għat-​Trattament Kirurġiku tax-​Xhieda taʼ Jehovah). F’dan il-​ktejjeb, il-​kirurgi jagħmlu din l-​osservazzjoni: “Minħabba l-​perikli assoċjati mat-​trasfużjonijiet tad-​demm, ikun taʼ benefiċċju jekk wieħed jikkunsidra miżuri alternattivi meta dan ikun possibbli.”

Ir-rivista AHA NEWS, ippubblikata mill-​American Hospital Association, ukoll irrapportat dwar għala ġew irrikonoxxuti l-​benefiċċji tal-​kirurġija mingħajr demm. “Dak li beda bħala twemmin reliġjuż qed jevolvi fi preferenza medika u teknoloġija avanzata,” osservat din ir-​rivista li toħroġ kull ġimgħa. “Il-​mediċina u l-​kirurġija mingħajr demm, li f’parti huma mmotivati mid-​duttrini tax-​Xhieda taʼ Jehovah, qed javanzaw lil hinn mill-​bżonnijiet taʼ soċjetà spiritwali għal ġos-​swali taʼ l-​operazzjonijiet mal-​pajjiż kollu.”

Is-suġġett għala ħafna tobba qegħdin jippromwovu l-​kirurġija mingħajr demm ġie ppubblikat f’suppliment fl-​edizzjoni tal-​ħarifa taʼ l-​1997 tar-​rivista Time. “Il-​biżaʼ mill-​AIDS huwa biss raġuni waħda,” qal l-​artiklu. L-​artiklu rrapporta b’mod partikulari dwar ix-​xogħol li qiegħed isir fl-​Englewood Hospital’s New Jersey Institute for the Advancement of Bloodless Medicine and Surgery, f’Englewood, New Jersey.

Ir-rivista Time osservat: “Din l-​organizzazzjoni qiegħda fuq quddiemnett fost iktar minn 50 sptar ieħor fl-​Istati Uniti li issa qed jipprattikaw il-​kirurġija mingħajr demm. Mingħajr ma jużaw ebda demm tad-​donaturi, huma joffru għażla kbira taʼ proċeduri kirurġiċi li s-​soltu jkunu jinkludu t-​trasfużjonijiet, flimkien maʼ tekniki li jnaqqsu bil-​bosta, jew tistaʼ tgħid jeliminaw, it-​telf taʼ demm.”

Effettiva u Sigura

Fl-​introduzzjoni taʼ l-​artiklu fir-​rivista Time kien hemm l-​esperjenza taʼ Henry Jackson, li sofra emorraġija interna kbira li minħabba fiha tilef 90 fil-​mija taʼ demmu u l-​livell taʼ l-​emoglobina niżillu għal 1.7 grammi kull deċilitru, u dan kien perikoluż. Jackson ittieħed lejn l-​Englewood Hospital minn sptar ieħor fi New Jersey, fejn ma ridux jagħtuh il-​kura mingħajr ma jużaw trasfużjonijiet tad-​demm.

Fil-faċilità taʼ Englewood, taħt il-​kura taʼ Dr. Aryeh Shander, Jackson ingħata “formulazzjonijiet potenti ferm taʼ supplimenti tal-​ħadid u vitamini, kif ukoll ‘dożi qawwijin’ taʼ droga li tqawwi d-​demm, l-​erythropoietin sintetiku, li jistimula l-​mudullun biex jipproduċi ċ-​ċelloli ħomor tad-​demm. Finalment, injettawlu xi likwidi fil-​vini biex jistimulaw il-​ftit ċirkulazzjoni li kien għad fadallu.”

Ir-rivista Time irrapportat li ftit jiem wara, “irċevew telefonata mill-​ewwel sptar biex jistaqsu jekk Jackson kienx miet. Bla ma qagħad jaħbi s-​sodisfazzjon tiegħu, Shander qalilhom, ‘Mhux talli m’huwiex mejjet, imma talli jinsab tajjeb u lest biex joħroġ mill-​isptar, u dalwaqt jerġaʼ lura għall-​ħajja normali tiegħu.’”

F’intervista fuq it-​televixin fit-​28 taʼ Novembru, 1997, Dr. Edwin Deitch, id-​direttur mediku tal-​programm taʼ kura mingħajr demm fil-​University Hospital, fi Newark, New Jersey, spjega kif żviluppat ir-​riċerka dwar il-​kirurġija mingħajr demm: “Ix-​Xhieda taʼ Jehovah . . . kienu jieħdu battikata kbira biex jipprovaw isibu lil xi ħadd li jkun lest li jopera mingħajr demm. Xi wħud mir-​riżultati taʼ dawk l-​istudji wrew li huma kienu marru aħjar milli kien mistenni, [minn] nies li ħadu d-​demm.”

Dr. Deitch żied: “Id-​demm jistaʼ jdgħajjef is-​sistema taʼ l-​immunità u jikkaġuna problemi b’infezzjonijiet taʼ wara l-​operazzjoni; jistaʼ jżid ir-​riskju taʼ wieħed li jkollu kanċer rikorrenti, u għalhekk id-​demm, għalkemm kien taʼ benefiċċju f’ċerti ċirkustanzi, jirriżulta li għandu l-​ikrah tiegħu wkoll.” Dwar il-​kirurġija mingħajr demm, Dr. Deitch ikkonkluda: “B’mod ċar, il-​konsegwenzi fuq il-​pazjent ikunu aħjar għax ikun hemm inqas komplikazzjonijiet, u [din] tqum inqas flus. U, għalhekk, din hija tassew l-​aqwa fi kwalunkwe ċirkustanza.”

B’hekk, bħalma qalet ir-​rivista Time, “iktar u iktar pazjenti qegħdin jinsistu li jridu għażliet iktar siguri u effettivi mit-​trasfużjonijiet.” Ir-​rivista rrapportat ukoll: “Skond xi kalkoli, 25% tat-​trasfużjonijiet fl-​Istati Uniti m’hemmx bżonnhom. Hemm ukoll indikazzjonijiet li l-​pazjenti ma jittollerawx livelli għoljin taʼ emoglobina kif konna naħsbu qabel u li ż-​żgħażagħ speċjalment, għandhom ħażna taʼ demm ġewwa fihom. . . . [Shander] huwa konvint illi li nżommu lura milli nużaw id-​demm hija għażla vijabbli u preferibbli għall-​biċċa l-​kbira tal-​pazjenti.”

Għalkemm li xi ħadd ilaqqat xi marda mit-​trasfużjonijiet tad-​demm huwa wieħed mill-​akbar perikli, hemm perikli oħrajn. “Id-​demm maħżun, wara li jiġi mkessaħ u maħżun, ma jkollux il-​kapaċità li għandu d-​demm frisk biex iġorr l-​ossiġnu,” spjega Dr. Shander. “Għadna biss qed nibdew nifhmu x’inkunu qed nagħmlu meta nagħtu trasfużjoni.”

“Il-​Livell tad-​Deheb”

“Finalment,” ikkonkludiet ir-​rivista Time, “hemm il-​prezz: jekk kull trasfużjoni tkun tiswa bejn wieħed u ieħor $500 [Lm200], u maʼ dan jiżdiedu l-​ispejjeż amministrattivi, il-​kont totali jiġi bejn il-​biljun [Lm400 miljun] u ż-​żewġ biljun dollaru [Lm800 miljun] kull sena, u dan hu inċentiv biżżejjed biex wieħed jikkunsidra l-​alternattivi.” Il-​prezz inkredibbli tat-​trasfużjonijiet tad-​demm issa jidher li huwa waħda mill-​akbar raġunijiet għala l-​kirurġija mingħajr demm saret daqshekk popolari.

Sharon Vernon, id-​direttriċi tas-​Center for Bloodless Medicine and Surgery fis-​St. Vincent Charity Hospital, fi Cleveland, Ohio, qalet dan dwar it-​trattament taʼ pazjenti mingħajr l-​użu tad-​demm: “Dan qed jiżdied għaliex it-​tobba qegħdin jirrikonoxxu li l-​mediċina mingħajr l-​użu tad-​demm hija l-​livell tad-​deheb f’ambjent li qed jekonomizza. L-​esperjenza tagħna kienet li anki l-​kumpaniji taʼ l-​assigurazzjoni li mhux soltu tagħhom jaħdmu id f’id magħna, qed jibagħtulna n-​nies, għaliex dan jiffrankalhom il-​flus.”

B’mod ċar, il-​kirurġija mingħajr demm malajr qed tiġi rrikonoxxuta fil-​komunità medika, u dan minħabba għadd taʼ raġunijiet.

[Kaxxa fʼpagna 19]

DEĊIŻJONIJIET REĊENTI TAL-​QRATI

Żewġ deċiżjonijiet tal-​qrati li ttieħdu uffiċjalment fl-​istat taʼ Illinois, fl-​Istati Uniti, f’Novembru u Diċembru taʼ l-​1997 kienu sinjifikanti. Fl-​ewwel waħda, Mary Jones, waħda mix-​Xhieda taʼ Jehovah, ngħatat $150,000 [Lm60,000] għad-​danni għaliex kienet ingħatat trasfużjoni taʼ żewġ units taʼ demm fl-​1993, minkejja l-​oġġezzjoni ċara tagħha għal dan it-​tip taʼ kura. Din hi l-​akbar somma li qatt ħa xi Xhud għall-​ħsara emozzjonali li sofra bħala riżultat taʼ trasfużjoni tad-​demm mhix mixtieqa.

It-​tieni każ kien jinvolvi lil Xhud bl-​isem taʼ Darlene Brown, li dak iż-​żmien kienet tqila, u li ngħatat trasfużjoni bil-​forza minħabba t-​tarbija taʼ 34 ġimgħa li kellha fil-​ġuf. Fil-​31 taʼ Diċembru, 1997, il-​Qorti taʼ l-​Appell taʼ Illinois spjegat id-​deċiżjoni tagħha billi qalet li “trasfużjoni tad-​demm hija proċedura medika li tinvadi u li ma tippermettix lil adult kompetenti jerfaʼ r-​responsabbiltà taʼ dak li jsir fuq ġismu.” Il-​Qorti taʼ l-​Appell ġabret id-​deċiżjoni tagħha fil-​qosor billi qalet li “taħt il-​liġi taʼ dan l-​Istat, . . . ma nistgħux nimponu obbligu legali fuq mara tqila biex tagħti l-​kunsens tagħha għal proċedura medika li tinvadi.”

Fid-​9 taʼ Frar, 1998, il-​Qorti Għolja taʼ Tokyo reġġgħet lura d-​deċiżjoni taʼ qorti iktar baxxa, li kienet iddeċidiet li tabib kien iġġustifikat f’li jagħti trasfużjoni tad-​demm lil Misae Takeda waqt li kienet qed tiġi operata fl-​1992. Il-​Qorti Għolja ddikjarat li “d-​dritt tal-​pazjent li jagħżel il-​kura għandu jiġi rrispettat. Kienet xi ħaġa illegali li tingħata trasfużjoni tad-​demm.” Misae Takeda ngħatat kumpens taʼ 550,000 yen (Lm1,680) għad-​danni.