Int Tistaʼ Tagħżel Il-​Futur Tiegħek

FILWAQT li l-​qari tax-​xorti kien kunsidrat bħala “għemil intellettwali kbir fid-​dinja tal-​qedem,” din il-​ħaġa kienet “arti mwaqqgħa għaċ-​ċajt mill-​profeti Ebrej,” tosserva l-​arkeologa Joan Oates. Għala?

Minkejja li kienu mdawrin bi ġnus li kellhom ħarsa fatalistika lejn il-​ħajja, l-​Iżraeliti tal-​qedem ċaħdu l-​idea li hemm forza bla kontroll li tifformalhom ħajjithom. Fl-​istruzzjonijiet li ngħataw lill-​ġens, Alla kien qalilhom: “Ma għandu jkun hemm ħadd f’nofsok li . . . jeħber, min jitkixxef il-​ġejjieni, . . . [jew] min jobsor.”​—Dewteronomju 18:​10, 11.

Mingħajr l-​idea tad-​destin jew l-​użu taʼ nies li jaqraw ix-​xorti, l-​Iżraeliti setgħu jkunu fiduċjużi dwar il-​futur. Biex tispjega r-​raġuni għal dan, l-​enċiklopedija Kattolika Franċiża Théo tistqarr li l-​ġens kien jemmen li “l-​bniedem u d-​dinja ma kinux il-​vittmi taʼ xi forza bla kontroll. Alla kellu skop għall-​bniedem.” X’kien dan l-​iskop?

Id-​Destin u r-​Rieda Ħielsa

Lill-​Iżraeliti Alla wegħedhom paċi u prosperità jekk ikunu ubbidjenti għal-​liġijiet tiegħu. (Levitiku 26:​3-6) Iktar minn hekk, huma stennew Messija li kellu jistabbilixxi kundizzjonijiet taʼ tjieba fuq l-​art. (Isaija, kapitlu 11) Madankollu, il-​fatt li Alla wiegħed dawn l-​affarijiet ma kienx ifisser li n-​nies setgħu joqogħdu b’idhom fuq żaqqhom u jistennew l-​affarijiet jiġru waħedhom. Għall-​kuntrarju, intqalilhom: “Kull ma ssib x’tagħmel, agħmlu b’ħiltek kollha.”​—Koħèlet 9:10.

L-idea taʼ rieda ħielsa kienet ċentrali għal dan. L-​Iżraeliti kienu ħelsin li jaqdu lil Alla u jifformaw il-​futur tagħhom. Alla wegħedhom: “Jekk intom tisimgħu sewwa l-​ordnijiet tiegħi, li qiegħed nagħtikom illum, u tħobbu lill-​Mulej, Alla tagħkom, u sservuh b’qalbkom kollha u b’ruħkom kollha, jien nagħtikom fi żmienha x-​xita għal artkom, ix-​xita bikrija u x-​xita mwaħħra u tiġbor il-​qmuħ tiegħek, l-​inbid tiegħek u ż-​żejt tiegħek.” (Dewteronomju 11:​13, 14) Iżrael gawda l-​barkiet t’Alla meta n-​nies kienu ubbidjenti.

Preċiż qabel ma daħlu fl-​art li kien wegħedhom, Alla poġġa għażla quddiem il-​ġens taʼ Iżrael: “Ara jiena llum qegħedtlek quddiemek il-​ħajja u l-​ġid, il-​mewt u d-​deni.” (Dewteronomju 30:15) Il-​futur taʼ kull individwu kien jiddependi mill-​azzjonijiet u d-​deċiżjonijiet tiegħu stess. Jekk wieħed jaqdi lil Alla, dan kien se jfisser ħajja u barkiet għalih, mentri jekk wieħed jirrifjuta li jagħmel dan kien se jfisser tbatija. Imma xi ngħidu għal-​lum?

Il-​Kawża u l-​Effett

Aħna marbutin b’għadd taʼ liġijiet li saru għall-​ġid tagħna. Waħda minn dawn hija l-​liġi tal-​kawża u l-​effett, jew, bħalma tesprimiha l-​Bibbja, “Dak li bniedem jiżraʼ, dak huwa jaħsad.” (Galatin 6:7) Ladarba nirrikonoxxu dan il-​prinċipju, huwa possibbli li nikkunsidraw il-​probabbiltà taʼ ċerti ġrajjiet futuri.

Jekk insuqu bl-​addoċċ b’veloċità kbira, ikollna iktar ċans li jiġrilna xi inċident milli jekk insuqu b’attenzjoni. Jekk inpejpu, huwa iktar probabbli li niżviluppaw kanċer milli jekk ma npejpux. Veru, ġrajjiet bħall-​attakki terroristiċi li ssemmew fl-​artiklu tal-​bidu taʼ din is-​serje x’aktarx li mhux se jiġru lilna, u huwa għalxejn li noqogħdu nikkalkulaw il-​probabbiltà taʼ dan. Madankollu, billi nirrikorru għall-​idea tad-​destin m’aħna se naslu mkien. Din ma tgħidilna xejn dwar il-​preżent jew il-​futur. Twemmin f’gidba ma jipprovdi ebda assiguranza minn qabel għall-​futur. U lanqas li nwaħħlu f’Alla għal kulma jiġri.

X’Se Jkun il-​Futur Tiegħek?

Il-​futur tagħna ma nkitibx bil-​quddiem iżda huwa format mill-​preżent. Avolja l-​ħajja hija għotja mingħand Alla, il-​Bibbja tindika b’mod ċar li aħna għandna rwol fundamentali f’li niddeċiedu l-​preżent u l-​futur tagħna. Il-​fatt li għandna l-​għażla jew li nagħmlu lil Alla ferħan jew, għall-​kuntrarju, li nagħmlulu qalbu sewda, juri li Alla tana f’idejna miżura taʼ kontroll fuq ħajjitna.​—Ġenesi 6:6; Salm 78:40; Proverbji 27:11.

Iktar minn hekk, l-​Iskrittura Mqaddsa ripetutament tenfasizza li l-​futur tagħna huwa konness mas-​sabar tagħna u mal-​korsa taʼ ħajjitna, li ftit ikollhom tifsir kieku l-​affarijiet kienu diġà predestinati. (Mattew 24:13; Luqa 10:​25-28) Allura, jekk nagħżlu li nkunu ubbidjenti u leali lejn Alla, liema futur nistgħu nistennew?

Il-Bibbja tirrivela li l-​umanità għandha futur mill-​isbaħ. L-​art se tiġi trasformata f’ġenna fejn se jirrenjaw il-​paċi u s-​sigurtà. (Salm 37:​9-11; 46:​9, 10 [46:​8, 9, NW]) Dan il-​futur huwa żgur għaliex il-​Ħallieq li jistaʼ kollox se jwettaq il-​wegħdi tiegħu. (Isaija 55:11) Imma li niġu mberkin bil-​ħajja fil-​Ġenna taʼ l-​art ma jiddependix fuq id-​destin: din se titgawda bħala riżultat taʼ li b’ubbidjenza nagħmlu r-​rieda t’Alla f’dan iż-​żmien. (2 Tessalonikin 1:6-8; Apokalissi 7:​14, 15) Alla tana r-​rieda ħielsa u jinkuraġġina: “Agħżel il-​ħajja biex tgħix.” (Dewteronomju 30:19) X’se tkun l-​għażla tiegħek? Iktar milli fid-​destin, il-​futur tiegħek jinsab f’idejk.

[Stampi f’paġna 10]

Alla għandu l-​iskop li l-​umanità ubbidjenti tgawdi futur meraviljuż