Il-​Ħarsa tal-​Bibbja

Min Hu Ministru?

MATUL il-​lejla qabel ma Ġesù miet bħala sagrifiċċju, ħbiebu tal-​qalb kellhom argument sħun. Skond Luqa 22:24, inqalgħet “kwistjoni bejniethom dwar min minnhom kellu jinżamm bħala l-​akbar wieħed.” Din ma kinitx l-​ewwel darba li qam argument bħal dan fost l-​appostli taʼ Ġesù. Fil-​passat, kien hemm minn taʼ l-​inqas żewġ okkażjonijiet oħra fejn Ġesù kellu jikkoreġi l-​mod kif kienu jaħsbuha.

Kemm kien taʼ dwejjaq li f’dan il-​lejl kritiku, Ġesù sab li kellu jerġaʼ jfakkarhom x’għandu verament ikun ministru Kristjan. Hu qal: “L-​akbar fostkom għandu jġib ruħu taʼ l-​iżgħar wieħed, u min hu fuq l-​oħrajn iġib ruħu taʼ qaddej.”—Luqa 22:26.

M’għandniex nistagħġbu li l-​appostli kellhom idea żbaljata dwar l-​importanza tal-​pożizzjoni u l-​prominenza. Qabel ma ġie Ġesù, l-​eżempju prinċipali bħala mexxejja reliġjużi kien ngħata mill-​iskribi u l-​Fariżej. Minflok ma taw lin-​nies gwida u direzzjoni spiritwali, dawn il-​ministri foloz approvaw tradizzjonijiet u regoli riġidi li ‘għalqu s-​Saltna tas-​Smewwiet għall-​bnedmin.’ Dawn kienu individwi moħħhom biss fihom infushom u fil-​pożizzjoni u l-​prominenza. Dak li kienu jagħmlu kienu jagħmluh “għal għajnejn in-​nies.”—Mattew 23:4, 5, 13.

Tip Ġdid taʼ Ministru

Ġesù, madankollu, introduċa lid-​dixxipli tiegħu konċett ġdid taʼ ministeru spiritwali. Hu għallimhom: “Tħallux min isejjħilkom Rabbi, għax l-​Imgħallem tagħkom wieħed hu, u intom ilkoll aħwa. U ssejjħu lil ħadd missierkom fuq din l-​art, għax il-​Missier tagħkom wieħed hu, dak li hu fis-​smewwiet. . . . Il-​kbir fostkom għandu jkun il-​qaddej tagħkom.” (Mattew 23:8-11) Id-​dixxipli taʼ Ġesù ma kellhomx jimitaw lill-​mexxejja reliġjużi taʼ żmienhom. Jekk riedu jkunu ministri ġenwini, huma kellhom jimitaw lil Ġesù. X’eżempju ħalla?

Il-Bibbja taʼ spiss tuża l-​kelma Griega di·aʹko·nos għal “ministru.” The Encyclopedia of Religion tispjega li din il-​kelma ma tirrappreżentax xi pożizzjoni imma li l-​ministru għandu jħoss li jrid jaqdi lil dak li jiġi moqdi. Tgħid ukoll li biex Kristjan jifhem x’inhu ministeru huwa essenzjali li jimxi fuq l-​eżempju taʼ Kristu.

Fi qbil mat-​tifsira korretta tal-​kelma “ministru,” Ġesù ta kulma kellu biex jgħin lil ħaddieħor. “Bin il-​bniedem,” hu spjega bil-​paċenzja, “ma ġiex biex ikun moqdi, imma biex jaqdi u biex jagħti ħajtu b’fidwa għall-​kotra.” (Mattew 20:28) Ġesù uża l-​ħin, l-​enerġija, u l-​abbiltà li kellu mingħajr egoiżmu biex jgħin lil oħrajn fiżikament u spiritwalment. Għala? Għax hu tħassarhom lill-​folol taʼ nies abbużati spiritwalment li kienu jinġabru biex jarawh. Ried ikun t’għajnuna. Dik il-​ħaġa li qanqlet il-​ministeru tiegħu kienet l-​imħabba ġeneruża, u hu ried lid-​dixxipli tiegħu biex juru l-​istess attitudni taʼ li jagħtu.—Mattew 9:36.

Matul il-​korsa taʼ ħajtu, Ġesù ħalla l-​mudell għal ministri futuri. “Il-​ħsad huwa kbir,” hu qal, “iżda l-​ħaddiema ftit. Itolbu mela lil Sid il-​ħsad biex jibgħat ħaddiema għall-​ħsad tiegħu.” (Mattew 9:37, 38) Iva, il-​ministri taʼ Kristu kellhom ikunu ħaddiema fl-​akbar xogħol li qatt rat id-​dinja—li jipprovdu faraġ spiritwali lill-​umanità kollha billi jippridkaw u jgħallmu l-​aħbar tajba tas-​Saltna t’Alla.—Mattew 28:19, 20.

Dak li tant kien jispikka fil-​ħarsa li kellu Ġesù dwar kif kellu jimministra kien dan il-​fatt li hu ffoka fuq li jagħti u fuq li jaqdi l-​bżonnijiet t’oħrajn. Hu għallem lill-​ministri tiegħu biex ikunu ħaddiema, sajjieda u rgħajja spiritwali, u mhux nies misterjużi u taʼ skola kbira, lebsin ilbies u tlellix speċjali.—Mattew 4:19; 23:5; Ġwann 21:15-17.

Il-​Ħarsa tal-​Bibbja

B’sogħba, matul is-​sekli, dan il-​konċett għoli u mingħajr egoiżmu li l-​ministri huma predikaturi u għalliema li jagħmlu sagrifiċċji persunali ġie mgħawweġ. Dak li fil-​bidu kien il-​ministeru Kristjan żviluppa f’istituzzjoni formali u skond il-​ġerarkija. Ġew ifformati komunitajiet reliġjużi u bil-​gradi li ngħataw prestiġju u qawwa u li taʼ spiss kienu jiġimgħu ġid kbir. Dan ħoloq firdiet. Żviluppat klassi tal-​kleru li kienet devota l-​iktar biex tamministra s-​sagramenti reliġjużi u twiddeb lil min jiżbalja. Fis-​sekli taʼ wara, il-​Kristjanità taʼ l-​ewwel seklu nbidlet minn reliġjon attiva fejn kulħadd kien ministru għal waħda passiva fejn l-​uniċi wħud li setgħu jippridkaw u jgħallmu kienu dawk il-​ftit awtorizzati u mogħtija taħriġ speċjali.

Madankollu, il-​Bibbja tidentifika lil ministru Kristjan, mhux mill-​ilbies distintiv, mir-​ritwal elaborat, mis-​salarju, jew skond x’jgħid il-​gvern, imma mix-​xogħol bla egoiżmu li jagħmel. L-​appostlu Pawlu semma x’attitudni għandhom juru l-​ministri Kristjani. Hu inkuraġġihom biex ‘ma jagħmlu xejn għall-​ftaħir fieragħ imma biex ikunu umlin.’—Filippin 2:3.

M’hemmx dubju li Pawlu kien jipprattikah dak li għallem. Billi mexa mill-​qrib maʼ l-​eżempju taʼ Kristu, hu qatt ma fittex ‘l-​interessi tiegħu, imma tal-​ħafna biex isalvaw.’ Hu fehem u tassew ħass li kellu r-​responsabbiltà li ‘jxandar l-​Evanġelju b’xejn,’ għax qal, “bla ma nfittex id-​dritt li jagħtini l-​Evanġelju stess.” Hu ma kienx qed ‘ifittex il-​glorja tal-​bnedmin.’—1 Korintin 9:16-18; 10:33; 1 Tessalonikin 2:6.

X’mudell li jispikka taʼ ministru Kristjan veru! Dawk li jimitaw l-​eżempju mill-​aqwa tiegħu u jimxu wara l-​eżempju taʼ bla egoiżmu li ħalla Ġesù Kristu, ikunu qed juru li huma ministri veri t’Alla. Dan jagħmluh billi jagħtu bl-​abbundanza minn dak kollu li għandhom biex jipprovdu għajnuna spiritwali u l-​faraġ taʼ l-​aħbar tajba lil oħrajn.—1 Pietru 2:21.