Is-​Sbuħija taʼ li Toqgħod Tosserva l-​Għasafar

KEMM tkun differenti d-​dinja kieku m’hawnx għasafar! It-​tpespis tagħhom, l-​għana tagħhom, il-​kuluri u t-​titjir differenti tagħhom—dawn kollha jikkontribwixxu għall-​varjetà sabiħa tal-​ħajja. Imma kemm-il darba nieqfu nisimgħuhom u nosservawhom? Jekk int tgħix f’xi belt mimlija tgeġwiġ tan-​nies u storbju tat-​traffiku, għandek mnejn lanqas biss tinduna li hemm l-​għasafar fejn toqgħod int. Anki jekk tgħix fil-​kampanja, jistaʼ jiġrilek li lanqas biss tagħti kashom. Imma tixtieq tarahom mill-​qrib l-​għasafar li jgħixu fl-​inħawi tiegħek?

Jistaʼ faċilment jirnexxilek billi sempliċement tuża kontenitur bl-​ikel taʼ l-​għasafar. Li trid tagħmel hu li tpoġġi l-​kontenitur fil-​bitħa, f’post addattat fejn tkun tistaʼ tarah minn xi tieqa. Imbagħad, kulma għandek bżonn hija tromba u kamera tar-​ritratti b’lenti li tiffoka sew fuq l-​oġġett—u ftit paċenzja! Ħu ħsieb li jkollok biżżejjed films addattati għall-​veloċità u ktieb taʼ gwida fuq l-​għasafar bl-​istampi biex tidentifikahom. Imbagħad oqgħod osserva, ismaʼ, u ħu pjaċir!