Il-Grillu u Għanjet Imħabbtu
B’TUL taʼ ħames ċentimetri biss jew inqas, jistaʼ jkun li ma jgħaddilekx minn moħħok li grillu għandu għalxiex jimpressjonak. Però, l-għanja taʼ dan il-grillu tisraq l-attenzjoni taʼ miljuni taʼ nies mad-dinja kollha. Din id-daqsxejn taʼ ħlejqa kif tgħanni, u għalfejn?
Hu interessanti li fost il-madwar 2,400 speċi taʼ grillijiet, l-irġiel biss jgħannu, jew iwerżqu. Il-grillijiet irġiel ma jużawx il-gerżuma biex jipproduċu din il-mużika, imma l-ġwienaħ. Ċerta enċiklopedija tispjega li l-grillijiet irġiel iżarżru billi jogħrku parti mill-ġewnaħ taʼ quddiem maʼ madwar 50 sa 250 sinna fuq il-ġewnaħ taʼ quddiem tan-naħa l-oħra. Il-frekwenza tat-twerżiq tiddependi fuq kemm snien jolqot kull sekonda. Dan it-tvenvin jimla l-arja bl-għanja li tant jingħaraf biha l-grillu.
Imma żgur li l-grillu raġel ma jgħannix biss biex ipaxxi lin-nies li jisimgħuh! Lanqas xejn! L-udjenza li qed jimmira lejha dan il-mużiċist hija xi sieħba għalih. Il-ktieb Exploring the Secrets of Nature jispjega: “Fit-tfittxija tiegħu għal sieħba, il-grillu raġel, li jikkomunika bis-sengħa, jgħanni tliet għanjiet differenti: waħda biex iħabbar li qiegħed hemm, waħda biex jinnamra u waħda biex ikeċċi lill-kompetituri mhux mixtiqin.” Xi grillijiet ikomplu jgħannu biex juru li qegħdin hemm sakemm grillu mara turi interess. Malli tismaʼ l-għanja mill-“widnejn” li għandha fuq saqajha taʼ quddiem, il-mara ma tkunx kuntenta b’li tkompli n-namur mill-bogħod. Hekk kif tasal fil-post minfejn ikun ġej il-ħoss, il-grillu raġel jibda jgħanni jgħaġġel bla waqfien l-għanja tan-namur. Din is-serenata tħoll lill-mara u tiġbidha lejn is-sieħeb tagħha, u ż-żewġ grillijiet jitgħammru.
Fl-Asja tal-Lvant xi nies irabbu l-grillijiet irġiel id-dar għax jieħdu pjaċir jisimgħu l-għanja tagħhom. Oħrajn jippreferu jgawdu din il-mużika fl-ambjent naturali tal-grillu. Ikun fejn ikun, l-għanja taċ-ċkejken grillu ssaħħar lin-nies li jisimgħuh madwar il-globu u jġib tifħir lil Dak li Ddisinjah.