Iż-​Żwieġ Għandu Jkun Rabta Dejjiema

SKOND kif jispiċċaw ħafna films, iż-​żwieġ huwa mira mixtieqa. Taʼ spiss, ir-​raġel u l-​mara fl-​aħħar isibu lil xulxin, jiżżewġu, u jgħixu “kuntenti għall-​bqija taʼ ħajjithom.” Fil-​films, ġeneralment l-​istorja tispiċċa hemm.

Fir-realtà, it-​tieġ m’huwiex it-​tmiem, imma l-​bidu taʼ ħajja ġdida flimkien. U t-​tama hi li, kif juri Koħèlet 7:8, it-​tmiem ikun aħjar mill-​bidu.

Rabta għal Dejjem

Hemm bżonn li wieħed ikun bil-​għaqal u jara fil-​bogħod. Iż-​żwieġ irid ikollu pedament sod biex jibqaʼ u jkun sodisfaċenti. Inkella, l-​istress taʼ wara t-​tieġ jistaʼ jkun akbar mill-​istress taʼ qabel. Kristjan ma jistax jidħol għaż-​żwieġ bil-​ħsieb: ‘Jekk ma jirnexxix, dejjem nistaʼ niddivorzja.’ Iż-​żwieġ irid jitqies bħala rabta permanenti.

Ġesù għamilha ċara li ż-​żwieġ kellu jkun għal dejjem meta wieġeb il-​mistoqsija li xi ħadd staqsieh dwar jekk id-​divorzju kienx xieraq. Hu qal: “Ma qrajtux li sa mill-​bidu l-​Ħallieq għamilhom raġel u mara, u qal, ‘Minħabba f’hekk raġel iħalli lil missieru u ’l ommu u jingħaqad maʼ martu u t-​tnejn isiru ġisem wieħed’? Għalhekk m’humiex iżjed tnejn, imma ġisem wieħed. Mela dak li għaqqad Alla ma għandux jifirdu l-​bniedem.”—Mattew 19:4-6.

Wara t-​Tieġ

Intqal b’mod xieraq li fil-​ħajja taʼ Kristjan, iż-​żwieġ huwa l-​iktar ħaġa importanti wara d-​dedikazzjoni lejn Alla. Din taʼ l-​aħħar torbot lil dak li jkun mal-​Ħallieq għal dejjem, u l-​magħmudija turi dan il-​fatt quddiem kulħadd. Iż-​żwieġ huwa dikjarazzjoni pubblika taʼ rabta bejn żewġ persuni—għal dejjem. Ma jgħaddilekx minn moħħok li wieħed jiddedika ruħu lil Alla jew li jintrabat fiż-​żwieġ b’xi patt u kundizzjoni fejn jidħlu affarijiet serji. Għalhekk, dawk li qed jaħsbu fiż-​żwieġ jagħmlu tajjeb li jeżaminaw bir-​reqqa t-​twemmin, il-​miri, l-​attitudnijiet, u l-​karattru tal-​persuna li jkunu se jiżżewġu.

Waqt li jkunu qed isiru l-​preparamenti tat-​tieġ, huwa importanti li wieħed juri l-​qalb tajba, il-​konsiderazzjoni, u l-​ispirtu taʼ kooperazzjoni. Kwalitajiet bħal dawn huma jerġaʼ iktar importanti wara, biex iż-​żwieġ ikun taʼ suċċess. Għall-​ewwel, il-​miżżewġin friski jkunu jfuru bl-​imħabba, imma wara li jiżżewġu jridu jiftakru li kuljum, l-​imħabba “ma tfittixx dak li hu tagħha.” Meta tintwera sena wara l-​oħra, “l-​imħabba ma tintemm qatt.” (1 Korintin 13:5, 8) B’imħabba dejjiema, se jkun eħfef li jintwerew kwalitajiet bħas-​sabar, il-​ħniena, it-​tjieba, il-​ħlewwa, u r-​rażan—kollha frott taʼ l-​ispirtu t’Alla. Dawn il-​kwalitajiet huma neċessarji għal żwieġ taʼ suċċess.—Galatin 5:22, 23.

Il-parti diffiċli hija li wara l-​ġurnata tat-​tieġ tibqaʼ turi kwalitajiet bħal dawn. Madankollu, is-​sigriet għas-​suċċess biex turi dawn il-​kwalitajiet tajbin huwa dan: Ħobb lill-​persuna li żżewwiġt, u kun lest li tagħmel sagrifiċċji.

Ġesù qal li l-​akbar kmandament għall-​bnedmin huwa li tħobb lil Jehovah, u li l-​kmandament taʼ warajh huwa, “Ħobb il-​proxxmu tiegħek bħalek innifsek.” (Mattew 22:​39, KŻ) L-​iktar proxxmu qrib taʼ persuna miżżewġa huwa s-​sieħeb jew is-​sieħba tagħha, għax m’hemm xejn fuq l-​art li jistaʼ jgħaqqad lil żewġ individwi daqs iż-​żwieġ.

Madankollu, għaqda fiżika biss fiha nfisha mhix garanzija li tnejn se jaqblu emozzjonalment. L-​għaqda taʼ żewġ iġsma ma tfissirx li tnejn dejjem se jaqblu fil-​ħsieb. Biex l-​għaqda sesswali tagħti l-​akbar sodisfazzjon, irid ukoll ikun hemm it-​tieni tip t’għaqda—l-​għaqda tal-​qlub u taʼ l-​intenzjonijiet. Iktar iva milli le, il-​prezz li jrid jitħallas biex iż-​żwieġ jirnexxi hu li tagħmel sagrifiċċji għall-​persuna l-​oħra. Min għandu jagħmel is-​sagrifiċċji? Ir-​raġel? Il-​mara?

L-​Imħabba u l-​Ġieħ

Il-​Kelma t’Alla tikkmanda: “Fittxu li tistmaw lil xulxin.” (Rumani 12:10, korsiv tagħna.) Jekk tistaʼ, fittex li tagħmel is-​sagrifiċċju qabel ma s-​sieħeb jew is-​sieħba titlobulek. Wara kollox, xi ħaġa li tagħtiha wara li wieħed ikun ilu jitlob għaliha tkun diġà tilfet nofs il-​valur tagħha. Minflok, iż-​żewġ imseħbin fiż-​żwieġ għandhom jagħmluha d-​drawwa li jieħdu l-​inizjattiva biex jagħtu ġieħ lil xulxin.

Per eżempju, l-​irġiel għandhom il-​kmand biex ‘jagħtu lin-​nisa tagħhom il-​ġieħ li ħaqqhom, għax huma aktar dgħajfa minnhom biex ma jsibux tfixkil fit-​talb tagħhom.’ (1 Pietru 3:7) Jekk raġel ma jagħtix ġieħ lil martu, anki t-​talb tiegħu lil Alla se jiġi effettwat bl-​ikrah. Iżda, x’jiġifieri li wieħed jagħti ġieħ lil martu? Jiġifieri li jikkunsidra s-​sentimenti tagħha l-​ħin kollu, jismaʼ l-​opinjonijiet tagħha, u jħalli lilha tagħżel l-​ewwel f’diversi affarijiet fil-​biċċa l-​kbira tad-​drabi. U l-​mara tistaʼ tagħti ġieħ lil żewġha bl-​istess mod, billi taħdem biex tkun sieħba li tgħinu u tikkoopera miegħu.—Ġenesi 21:12; Proverbji 31:10-31.

Il-Kelma t’Alla tgħid: “L-​irġiel [għandhom] iħobbu n-​nisa tagħhom bħallikieku ġisimhom stess. Min iħobb ’il martu jkun iħobb lilu nnifsu. Qatt ħadd ma bagħad ’il ġismu stess, iżda jmantnih u jieħu ħsiebu, bħalma jagħmel Kristu mal-​[kongregazzjoni].” Ġesù kemm kien iħobbhom lis-​segwaċi tiegħu? Kien lest li jmut għalihom. Il-​Bibbja tgħid ukoll: “Kull wieħed minnkom [l-irġiel miżżewġa], għandu jħobb lil martu bħalu nnifsu.” (Efesin 5:28-33) U l-​Kelma t’Alla tgħid lin-​nisa miżżewġin biex “iħobbu . . . [u jkunu] ubbidjenti għal żwieġhom, ħalli l-​kelma taʼ Alla ma titkasbarx.”—Titu 2:4, 5.

Ittollera l-​Iżbalji

Minħabba li l-​bnedmin kollha jitwieldu imperfetti, kulħadd se jiżbalja. (Rumani 3:​23; 5:​12; 1 Ġwann 1:​8-10) Imma minflok ma tkabbar l-​iżbalji, ismaʼ mill-​parir tal-​Bibbja: “Fuq kollox, ħa jkollkom imħabba sħiħa lejn xulxin, għax l-​imħabba tgħatti kotra taʼ dnubiet.” (1 Pietru 4:8) L-​aħjar hu li żbalji żgħar ma noqogħdux naħsbu fuqhom, u ninjorawhom. Dan jistaʼ japplika wkoll għal żbalji iżjed serji. Kolossin 3:12-14 jgħid: “Ilbsu mela sentimenti taʼ ħniena, tjieba, umiltà, ħlewwa u sabar. Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-​Mulej ħafer lilkom, hekk agħmlu intom ukoll. U fuq kollox ilbsu l-​imħabba, li hi [“rabta perfetta li tgħaqqad,” NW].”

Kemm-il darba għandna naħfru l-​iżbalji u d-​dgħjufijiet normali tas-​sieħeb jew sieħba tagħna? Pietru staqsa lil Ġesù: “‘Mulej, xi kemm-il darba jrid jonqosni ħija biex jiena naħfirlu? Sa sebaʼ darbiet?’ ‘Ma ngħidlikx sa sebaʼ darbiet,’ wieġbu Ġesù, ‘imma sa sebgħa u sebgħin darba.’” (Mattew 18:21, 22) Ladarba Ġesù kien qed jgħid dan dwar dawk barra r-​rabta taż-​żwieġ, kemm hija iktar meħtieġa l-​maħfra bejn tnejn miżżewġin!

Għalkemm f’dawn l-​aħħar snin l-​istituzzjoni taż-​żwieġ ġiet attakkata, fl-​aħħar mill-​aħħar, iż-​żwieġ se jibqaʼ jeżisti għax kien Alla li waqqfu u kulma jagħmel hu huwa “tajjeb ħafna.” (Ġenesi 1:31) Mhux se jsir xi ħaġa antikwata. U jistaʼ jirnexxi, speċjalment fost dawk li jirrispettaw u jimxu mal-​kmandamenti t’Alla. Imma l-​isfida hi: Iż-​żewġ individwi se jżommu mal-​wegħda li għamlu fil-​ġurnata tat-​tieġ biex iħobbu u jgħożżu lil xulxin? Din tistaʼ tkun sfida kbira, u għandek mnejn ikollok titħabat biex tirbaħ. Imma r-​riżultati li jkollok se jkun jixirqilhom dan l-​isforz!

[Kaxxa f’paġna 10]

ID-​DIVORZJU U S-​SEPARAZZJONI

Alla, Dak li oriġina ż-​żwieġ, għamlu bl-​iskop li jkun għaqda permanenti. Imma hemm xi raġuni Skritturali biex individwu jiddivorzja lis-​sieħeb jew sieħba tiegħu—raġuni li tippermetti lil dak li jkun biex jerġaʼ jiżżewweġ jekk irid? Ġesù indirizza dan is-​suġġett billi qal: “Ngħidilkom: Kull min ikeċċi lil martu, ħlief minħabba ż-​żena, u jiżżewweġ oħra, jagħmel adulterju.” (Mattew 19:9, Karm Żammit; korsiv tagħna.) L-​infedeltà sesswali mill-​parti l-​oħra fiż-​żwieġ hija l-​unika bażi għal divorzju li jippermetti lill-​parti innoċenti biex terġaʼ tiżżewweġ.

Xi ħaġa oħra hi li l-​kliem tal-​Bibbja li nsibu fl-​1 Korintin 7:10-16, filwaqt li jinkuraġġixxi lill-​imseħbin miżżewġin biex jibqgħu flimkien, jippermetti s-​separazzjoni. Xi wħud, wara li jistinkaw ferm biex isalvaw iż-​żwieġ tagħhom, iħossu li ma jkollhom l-​ebda għażla oħra ħlief li jisseparaw. X’tistaʼ tkun bażi Skritturali aċċettabbli għal pass bħal dan?

Waħda hi nuqqas volontarju taʼ manteniment. Meta jiżżewweġ, raġel jerfaʼ r-​responsabbiltà li jmantni lil martu u lil uliedu. Ir-​raġel li minn rajh jonqos li jipprovdi l-​bżonnijiet materjali għall-​ħajja jkun “ċaħad il-​fidi u hu agħar minn wieħed li ma jemminx.” (1 Timotju 5:8) Mela s-​separazzjoni hija possibbli.

Bażi oħra hi l-​abbuż fiżiku estrem. Allura, jekk wieħed mill-​miżżewġin jabbuża fiżikament mill-​parti l-​oħra, il-​vittma tistaʼ tissepara. (Galatin 5:19-21; Titu 1:7) Alla “jobgħod ’il min iħobb id-​dnewwa.”—Salm 11:5.

Bażi oħra għal separazzjoni hija l-​ipperikolar assolut taʼ l-​ispiritwalità taʼ dak li jemmen—ir-​relazzjoni tiegħu jew tagħha m’Alla. Meta parti fiż-​żwieġ tkun topponi, forsi billi tuża l-​forza fiżika, u jkun sar impossibbli għall-​parti l-​oħra li ssegwi l-​qima vera u l-​ispiritwalità tagħha tkun fil-​periklu, xi wħud li jemmnu sabu li kien hemm bżonn li jisseparaw.a—Mattew 22:37; Atti 5:27-32.

Madankollu, jekk wieħed jikseb id-​divorzju f’ċirkustanzi bħal dawn, ma jkunx ħieles li jerġaʼ jiżżewweġ. Skond il-​Bibbja, l-​unika bażi leġittima għal divorzju li tippermetti ż-​żwieġ mill-​ġdid hija l-​adulterju jew “iż-​żena.”—Mattew 5:32, KŻ.

[Nota taʼ taħt]

[Stampa f’paġna 9]

Iż-​żwieġ għandu jitqies bħala arranġament dejjiemi

[Stampa f’paġna 10]

Ġesù qalilna li għandna naħfru “sebgħa u sebgħin darba”