Brimba li Tagħmilha taʼ Nemla

HEMM brimba żgħira li titkaxkar ġo bejta tan-​nemel u tgħix bil-​moħbi fost l-​għedewwa tagħha. Biex ma tinqabadx, tbiddel id-​dehra u l-​imġiba tagħha ħalli ma jindunawx biha. Dan hu importanti għax jekk in-​nemel iħossu fastidjat jistaʼ jsir aggressiv mhux ħażin. Għall-​brimba din hija daqsxejn taʼ sfida għaliex il-​mod kif inhi magħmula huwa differenti min-​nemla.

In-nemla għandha sitt saqajn u żewġ antenni, filwaqt li l-​brimba għandha tmien saqajn u m’għandhiex antenni. Mela l-​brimba kif tagħmel taʼ bir-​ruħha li hi nemla? Din tiġri fil-​bejta tan-​nemel fuq sitt saqajn, u t-​tnejn l-​oħra toħroġhom ’il barra biex jidhru qishom antenni.

Barra minn hekk, il-​brimba ċċaqlaq it-​taparsi antenni tagħha b’mod li jidhru qishom taʼ vera. Din ixxejjirhom b’tali mod li jidhru qishom antenni tan-​nemel. Sabiex tinħeba, din l-​esperta saħansitra kapaċi timita l-​mixja skossata u żigużajg tan-​nemel!

Il-brimba tipprova tkun nemla perfetta b’kull mod possibbli, għax biex tibqaʼ ħajja trid tingħaraf bħala residenta tal-​bejta tan-​nemel. Ġewwa l-​bejta, il-​brimba ssib il-​protezzjoni mill-​għedewwa naturali tagħha, fosthom qerd il-​brimb (spider wasp). L-​għasafar taʼ l-​għana, li għalihom il-​brimba hija ikla taʼ prima kwalità, ukoll iħalluha bi kwietha. Anki l-​brimb li jaqbad lil brimb ieħor jitqarraq mill-​“antenni” tal-​brimba li bihom tkun qed timita n-​nemel.

Madankollu, jekk għasfur, gremxula, jew xi ħliqa oħra tattakka lill-​bejta tan-​nemel, il-​brimba malajr terġaʼ tieħu s-​sura vera tagħha u taħrab. Il-​vista tal-​brimb hija aħjar minn dik tan-​nemel. Ukoll, il-​brimb jistaʼ jaqbeż, filwaqt li n-​nemel ma jistax. Dan kollu jagħmilhielu iktar faċli biex jaħrab.

Matul il-​ġurnata, il-​brimba tagħmel kulma tistaʼ biex in-​nemel tal-​bejta ma jindunax biha. Madankollu, bil-​lejl tqum fuq tagħha u taqbad lin-​nemel fl-​istess bejta fejn tkun bdiet tgħix! Jekk il-​brimba tinqabad tagħmel dan, tieħu vantaġġ mit-​tmien saqajn li għandha u tiżgiċċa.

Il-brimba mara għandha mnejn tingħaqad mal-​brimba raġel fil-​bejta tan-​nemel. Din mhux biss turi li hi leali lejn is-​sieħeb tagħha iżda tieħu wkoll l-​inizjattiva f’diversi affarijiet. Fil-​bejta tan-​nemel, din tibni kisja protettiva bil-​ħjut biex tipproteġi kemm lis-​sieħeb kif ukoll il-​bajd tagħha.

Bla dubju hemm wisq iktar x’nitgħallmu dwar din il-​brimba. Biss, dan japplika wkoll għall-​biċċa l-​kbira taʼ l-​ispeċi t’annimali fuq l-​art. Kemm se jkun sabiħ fil-​futur li nitgħallmu iktar dwar il-​ħlejjaq affaxxinanti t’Alla!

[Stampa f’paġna 26]

Brimba bejn żewġ nemliet

[Sors]

Bill Beatty